Փաստ ինֆո

«Արմենիա Թըդեյ» լրատվական կայքի համակարգող Արգիշտի Կիվիրյանն այսօր բացարկ է հայտնել  Հատուկ քննչական ծառայության քննիչին: Վերջինս չի համաձայնել, որ Ա.Կիվիրյանի հետ եկած նրա 30 փաստաբանները մասնակցեն նրա հարցաքննությանը,  նա թույլ է տվել, որ քննչական գործողությանը ներկա գտնվի միայն նրանցից մեկը: Ինչպես «Pastinfo»-ի թղթակցին հայտնեց Ա.Կիվիրյանի փաստաբան Լուսինե Սահակյանը, Ա.Կիվիրյանը որպես քննիչին բացարկ հայտնելու հիմք նշել է նրա կողմնակալ լինելը: Ըստ Ա.Կիվիրյանի, քննիչի կողմից անտեսվում է փաստաբանների հետ քննչական գործողությանը ներկայանալու իր իրավունքը: Կողմնակալության մասին վկայում է նաև այն, ըստ Ա.Կիվիրյանի, որ  ոստիկանների կողմից իրեն ծեծի ենթարկելու փաստի առնչությամբ  քրեական գործ չի հարուցվել, ինքը ՝ Ա.Կիվիրյանը գործով տուժող չի ճանաչվել,  և  պետք է հարցաքննվի  միայն որպես վկա:  Նա հրաժարվել է ցուցմունք տալ և հայտարարել է, որ իր գրավոր ցուցմունքը քննչական մարմնին կուղարկի փոստով:  

Ի դեպ նշենք, որ Ա.Կիվիրյանի փաստաբանները լինելու պատրաստակամություն են հայտնել արդեն 150-ից  ավելի փաստաբաններ, նրանց թիվն, ըստ Լ.Սահակյանի, ժամ առ ժամ ավելանում է: 

Ոստիկանների և «Արմենիա Թըդեյ» լրատվական կայքի համակարգող Արգիշտի Կիվիրյանի միջև Կոմիտաս 5 հասցեում օգոստոսի 24-ի միջադեպի փաստով ՀՀ ոստիկանությունում քրեական գործ է հարուցվել՝ ՀՀ քրեական օրենսգրքի 316-րդ հոդվածի հատկանիշներով՝ Իշխանության ներկայացուցչի հանդեպ բռնություն:Գործը հարուցվել է՝ ոստիկանության ՊՊԾ գնդի դասակի հրամանատարի զեկուցագրի հիման վրա, ըստ որի՝ ոստիկանության բաժին տեղափոխելիս Ա.Կիվիրյանը ոստիկանական ավտոմեքենայի մեջ բռունցքով հարվածել, կծել ու հայհոյել է   ոստիկանին: Ա.Կիվիրյանն իր հերթին հաղորդում է ներկայացրել, ըստ որի՝ ոստիկանության ծառայողները հայհոյել, ծեծել են իրեն ու պատճառել մարմնական վնասվածքներ: ՀՀ գլխավոր դատախազի հանձնարարությամբ՝ միջադեպի վերաբերյալ բոլոր նյութերն ուղարկվել են ՀՀ հատուկ քննչական ծառայություն: