Փաստ ինֆո

«Սյունիքի նախկին մարզպետ Սուրիկ Խաչատրյանը մեղադրյալ չէ ու չի լինելու, սա վերջնականապես իմացեք»,- այսօր տեղի ունեցած մամուլի ասուլիսի ժամանակ հայտարարել է  ՀՀ  Փաստաբանների պալատի նախագահ Ռուբեն Սահակյանը, ով Սուրիկ Խաչատրյանի տան մոտ ս.թ. հունիսի 1-ին տեղի ունեցած միջադեպի գործով պաշտպանում է Խաչատրյանի որդու` Տիգրան Խաչատրյանի շահերը։

 

Ռ.Սահակյանի դիտարկմամբ,   հունիսի 1-ին տեղի ունեցած միջադեպի մանրամասները հասարակությանը ճիշտ չի ներկայացվում։  Ըստ նրա, նախքան նախկին մարզպետի մոտ տեղի ունեցած միջադեպը, Ավետիք Բուդաղյանի և Սուրիկ Խաչատրյանի թիկնապահ Զարզանդ Նիկողոսյանի միջև տեղի է  ունեցել  վիճաբանություն, որից վրդովված սույն գործով  մեղադրյալ Արտակ Բուդաղյանը, վերցնելով որսորդական հրացանը, գնացել  է Խաչատրյանների տան մոտ և հայհոյանքներով զուգորդված սպանության տարաբնույթ սպառնալիքներ տվել Խաչատրյանների գերդաստանի անդամներին՝ պահանջելով  կանչել Սուրիկ Խաչատրյանին: Եղբոր գալուց հետո, ըստ փաստաբանի, Ավետիք Բուդաղյանը հակասական վարքագիծ է դրսևորել՝ հանելով է իր մոտ գտնվող ատրճանակը եւ  սպառնալով կրակել, եթե մոտենան եղբորը, ապա հայհոյել Խաչատրյանին՝ կրկին պահանջելով կանչել նրան։  Այդ պահին նրան են մոտեցել Սուրիկ Խաչատրյանի կինը՝ Լորետա Բարսեղյանը, նրա որդին՝ Տրդատ Խաչատրյանը և տան աշխատակցուհի Կարինե Հարությունյանը՝ խնդրելով, որ Բուդաղյանները չկրակեն, գնան և գան առավոտյան: Սակայն Արտակ Բուդաղյանը շարունակել է սպանության սպառնալիքներ տեղալ: 

 

«Մոտենալով նրանց և վախենալով, որ Արտակ Բուդաղյանը կկրակի՝ Լորետա Խաչատրյանը բռնել է Արտակ Բուդաղյանի հրացանի փողը և փորձել  թույլ չտալ, որ կրակի: Տրդատ Խաչատրյանը փորձել է օգնել մորը, սակայն Արտակ Բուդաղյանը աջ ձեռքի արմունկով հարվածել է նրան և մի կողմ շպրտել: Հակասական վարքագիծ դրսևորող Ավետիք Բուդաղյանը, հայհոյելով Սուրիկ Խաչատրյանին՝ միաժամանակ փորձել է թույլ չտալ, որ եղբայրը կրակի՝ ասելով, որ պետք չէ։ Լորետա Խաչատրյանը, Կարինե Հարությունյանը և Ավետիք Բուդաղյանը միասին փորձել են նրա ձեռքից խլել հրազենը և թույլ չտալ, որ կրակի կամ հրազենի փողը բարձրացնել դեպի վեր, որ կրակոցի դեպքում տուժողներ չլինեն»,- պատմեց փաստաբան Ռուբեն Սահակյանը։ 

 

Ըստ նրա, տեսագրության մեջ երեւում է, որ ժամը 23։07։30 -ին Արտակ Բուդաղյանը, կտրուկ շարժում կատարելով հրել  է և վայր գցել Ավետիք Բուդաղյանին, որի ձեռքին այդ ողջ ընթացում ատրճանակ է եղել: Երկու վայրկյան անց Ավ. Բուդաղյանը ոտքի է կանգնել և կրկին փորձել  եղբոր ձեռքից խլել զենքը , սակայն 23։07։36-ին երբ ձեռքը գցել է դեպի իրենից խուսափող եղբոր զենքը, կրկին վայր է ընկել ավազների վրա: Այդ ժամանակ , ինչպես երևում է տեսանյութում, Արտակ Բուդաղյանը մնացել է միայնակ, և նրան ոչ ոք չի խանգարել. երկու կանայք մոտ մեկ-երկու մետր ետ են գնացել: 

 

Ռուբեն Սահակյանը տեղեկացրեց, որ ըստ Տիգրան Խաչատրյանի, ով լսելով, որ Արտակ Բուդաղյանը շարունակում է սպառնալիքները և տեսնելով, որ նա  միայնակ  մնալով զենքը պահում է իրենց վրա,  և ոչ ոք ու ոչինչ չի խանգարում նրան կրակելու համար, մտավախություն ունենալով, որ նա կկրակի և կիրականացնի իր սպառնալիքները, անհրաժեշտ պաշտպանության այլ տարբերակ չտեսնելով՝ ժամը 23.07.39-ին, այսինքն՝ Արտակ Բուդաղյանի միայնակ մնալուց ընդամենը երեք վայրկյան անց, հորը օրինական կարգով պատկանող «Տոզ» տեսակի որսորդական հրացանից կրակել է։ Ըստ փաստաբանի, Տիգրան Խաչատրյանը, որսորդական հրացանը վերցրել է հյուրատնից՝ սպառնալիքներից հետո: 

 

Փաստաբանի գնահատմամբ` Տիգրան Խաչատրյանի համար առաջացել է անհրաժեշտ պաշտպանության նոր վիճակ եւ նա գիտակցելով, որ հապաղելը կարող է անդառնալի հետևանքներ ունենալ իր եւ իր հարազատների համար՝ երկու անգամ կրակել է Ավետիք Բուդաղյանի վրա և վիրավորել նրան: