Փաստ ինֆո

Հենրիկ Մխիթարյանը արդեն մասնակցել է բունդեսլիգայի երկու հանդիպման, որը, իհարկե, բավարար չէ Դորտմունդի «Բորուսիայում» նրա հեռանկարները գնահատելու համար, սակայն նախնական պատկերացում տալիս է:

Մխիթարյանը դորտմունդցիների ամենաթանկ ձեռք բերումն է ակումբի պատմության մեջ: Դա ինքնստինքյան պարտավորեցնող է, բայց միաժամանակ նաև հոգեբանորեն ճնշող գործոն է: Հայ կիսապաշտպանը առայժմ չի ցուցադրում արտառոց խաղ, որը կարդարացներ նրա համար վճարած 30 մլն դոլարը: Ավելին, կարծես թե, օտար մարմնի տպավորություն է թողնում: Հավանաբար, դա պայմանավորված է այն հանգամանքով, որ «Շախտյորից» տեղափոխվելու ձգձգված պատմության, այնուհետև վնասվածքի պատճառով նա գործնականում բաց թողեց նախապատրաստական շրջանը: Թերևս, դրանով է բացատրվում Հենրիկի ակնհայտ ծանրաշարժությունը խաղադաշտում: Բացի այդ, Մխիթարյանը փխրուն տպավորություն է թողնում գերմանական ուժային և կոշտ ֆուտբոլի խորապատկերում: Վերջապես, ակնհայտ է, որ դեռ չի համակերպվել «Բորուսիայի» խաղաոճին: Սովորության համաձայն, հաճախ ապավինում է կարճ փոխանցումներին, ինչն ամենևին էլ ստեղծագործական երանգ չի հաղորդում խաղին: Դորտմունդցիներին, կարծես, ավելի հոգեհարազատ է միջին հեռավորության փոխանցումների միջոցով գրոհ կազմակերպելը: 

Այդ պարագայում «Բորուսիայի» գլխավոր մարզիչ Յուրգեն Կլոպի գերխնդիրն է գտնել և մշակել Մխիթարյանի որակները արդյունավետ օգտագործելու տարբերակներ: Իսկ ընտրության հնարավորություն իրոք կա:

Այդ առումով ուշագրավ են NBC Sports-ի վերլուծաբան Ռիչարդ Ֆարլինի դիտարկումները  բունդեսլիգայի առաջնության 3-րդ տուրի «Բորուսիա» - «Վերդեր» խաղից հետո։ Հեղինակի կարծիքով, Մխիթարյանն առայժմ չի դրսևորում «Բավարիա» տեղափոխված Մարիո Գյոտցեին համարժեք փոխարինող դառնալու հավակնություններ, քանզի չունի վերջինիս ստեղծագործական ջիղը։ «Դոնեցկի «Շախտյորի» կիսապաշտպան Հենրիխ Մխիթարյանի ձեռքբերումը դրական արձագանք է առաջացրել, սակայն Հայաստանի հավաքականի կիսապաշտպանը չունի Մարիո Գյոտցեի ստեղծագործական որակները։ 21-ամյա գերմանացու բացակայությամբ «Բորուսիային» խաղը զրկվել է մտավոր բաղադրիչից, առանց որի դժվար է ծնկի բերել մրցակիցներին։ Այդ հանգամանքը Կլոպին ստիպել է վերանայել թիմի խաղը կառուցելու մոտեցումները։ Բավական է նշել, որ այս մրցաշրջանում «Բորուսիայի» խփած 7 գոլերից 6-ը գրանցվել են երկրորդ խաղակեսում։ Դա չի նշանակում, որ Մխիթարյանը վատ ֆուտբոլիստ է։ Նա նախաձեռնող է, սակայն ոչ ստեղծագործող։ «Շախտյորում» խաղում էին Ֆերնանդինիոն եւ այլ ստեղծագործող ֆուտբոլիստներ, որոնց շնորհիվ հայ մարզիկը բացահայտում էր բնատուր որակները։ Հնարավոր է, գերմանական ակումբն էլ պետք է նույն տարբերակին դիմի, որպեսզի առավելագույն օգուտ ստանա հայ կիսապաշտպանից»,- նկատում է հոդվածագիրը։

Նշենք, որ չնայած «Բորուսիան» շահել է Գերմանիայի առաջնության մեկնարկային երեք հանդիպումները, սակայն թիմի խաղը տակավին հում տպավորություն է թողնում: Թերևս, Կլոպին ժամանակ է պետք ամռանը թիմում տեղի ունեցած փոփոխությունները մարսելու համար: Հուսանք, որ երբ դա տեղի ունենա Մխիթարյանը արժանիորեն կզարդարի դորտմունդյան փունջը և տրանսֆերային սխալի մասին խոսակցությունների տեղիք չի տա: 

Հեղինակ` Հրայր Նազարյան