Փաստ ինֆո

Երևանի Կենտրոն և Նորք-Մարաշ վարչական շրջանների դատարանում՝  դատավոր Մնացական Մարտիրոսյանի նախագահությամբ, այսօր մեղադրող Գևորգ  Երեմյանը  միջնորդեց ոստիկանության Երևանի վարչության Կենտրոնականի բաժնի քրեական հետախուզության բաժանմունքի օպերլիազորներ Խաչիկ Բախբուդարյանին և Արտակ Բարսեղյանին դատապարտել 4-ական տարվա ազատազրկման՝  2 տարով զրկել որոշակի պաշտոններ զբաղեցնելու իրավունքից: Մեղադրողը դատարանի ուշադրությունը հրավիրեց մեղմացուցիչ հանգամանքների վրա՝ երկու ամբաստանյալներն ունեն մինչև 14 տարեկան մեկական երեխա, ամուսնացած են,  նախկինում դատապարտված չեն եղել, բնութագրվում են դրական:   

Հիշեցնենք, որ օպերլիազորները մեղադրվում են ՀՀ քրեական օրենսգրքի 309-րդ հոդվածի 2-րդ մասով՝բռնության զուգորդմամբ պաշտոնեական լիազորություններն անցնելը, և 314-րդ հոդվածով՝ պաշտոնեական կեղծիք։

Ըստ մեղադրող կողմի,պաշտոնեական լիազորություններն անցնելու,մասնավորապես, խոշտանգումներ կատարելու, և պաշտոնեական կեղծիք կատարելու մեղադրանքը հիմնավորված է նախաքննությամբ ձեռք բերված ու դատաքննությամբ հետազոտված ապացույցներով, և  ամբաստանյալների կողմից մեղադրանքը չընդունելն, ըստ մեղադրողի,անհիմն է ու ունի պատասխանատվությունից խուսափելու նպատակ: Դատախազի գնահատմամբ, մեղադրանքը հիմնավորված է  տուժող Ռոբերտ  Հովսեփյանի, վկաների ցուցմունքներով, ընդ որում, մեղադրողը որոշ վկաների պարագայում արժանահավատ համարեց նրանց նախաքննական ցուցմունքները, իսկ դատաքննական ցուցմունքներն   որակեց որպես հակասական ու գործով ձեռք բերված ապացույցներից չբխող:  Մեղադրանքը, ըստ Գ.Երեմյանի, հաստատվում է նաեւ  դատաբժշկական փորձագետի եզրակացությամբ, ըստ որի տուժող Ռ.Հովսեփյանը, մասնավորապես,  ստացել է ձախ ականջի թմբկաթաղանթի տրավմատիկ թափածակում, որի հետևանքով նրա առողջությանը հասցվել է միջին ծանրության վնաս՝ առողջության տևական քայքայմամբ: 

Մեղադրողը հիմնավորված է համարում նաև պաշտոնեական կեղծիք կատարելու մեղադրանքը՝   գողության կասկածանքով Ռոբերտ Հովսեփյանն ու նրա 4 ընկերները բերման են ենթարկվել 2012թ. հոկտեմբերի   3-ին, ժամը 23-ի սահմաններում, այլ ոչ թե  հոկտեմբերի 4-ին 15-ին, ինչպես պնդում են ոստիկաններն ու  ինչպես արձանագրված է բերման ենթարկվածների ցուցակում:

Մեղադրողն որպես լրացուցիչ փաստարկ նշեց, որ այլ ոստիկանների վերաբերյալ ևս  գործից  մաս է անջատվել, դրանով ներկայումս նախաքննություն է ընթանում:  

Պաշտպանական կողմը, հակառակը, գտնում է, որ մեղադրանքն ապացուցված չէ, ամբաստանյալների գործողություններում բացակայում է հանցակազմը, ուստի պետք է կայացվի արդարացման դատավճիռ: Ամբաստանյալների պաշտպան Լիպարիտ Սիմոնյանը դատարանի ուշադրությունը հրավիրեց, որ ՀՀ քրեական օրենսգրքի 309-րդ  հոդվածը իրավական որոշակիության առումով չի համապատասխանում ՀՀ Սահմանադրության և Մարդու իրավունքների եվրոպական կոնվենցիայի պահանջներին:  Բացի այդ, հստակ չէ նաև մեղադրանքը՝   նախաքննական մարմինը չի ճշտել, թե ի՞նչ ասել է  էական վնաս հասցնել՝ տուժողի՞ն, թե՞ պետության օրինական շահերին: Պաշտպանն ընդգծեց, որ ոստիկանների ջանքերի շնորհիվ բացահայտվել է  հանցագործությունը, իսկ Ռ.Հովսեփյանը օրինական ուժի մեջ մտած դատավճռով մեղավոր է ճանաչվել գողություն կատարելու մեջ: 

Ըստ Լ.Սիմոնյանի, իր պաշտպանյալները գործել են իրենց լիազորությունների շրջանակում, բռնություն չեն գործադրել,  պաշտոնեական կեղծիք չեն կատարել: Իսկ տուժողի նկատմամբ ֆիզիկական ուժ ու մարտավարական հնարք է կիրառվել, քանի որ նա  չի ենթարկել ոստիկանների օրինական պահանջներին ու փորձել է փախուստի դիմել: Տուժողի  ցուցմունքն արժանահավատ չէ, նպատակ ունի խուսափել պատժից և  ինչ-որ կերպ չեզոքացնել գողություն կատարելու վերաբերյալ նրա ինքնախոստովանական ցուցմունքները:  

Ըստ պաշտպանական կողմի,  այլ ոստիկանների վերաբերյալ մաս անջատելը զսպաշապիկ հագցնելու նպատակ  է ունեցել, որպեսզի ոստիկանները իրականությանը չհամապատասխանող ցուցմունքներ տան, սակայն նրանք  «չընկրկեցին և իրականությանը համապատասխանող  ցուցմունքներ տվեցին դատարանում»: 

Մեղադրանքը պետք է հիմնվի ապացույցների, այլ ոչ ենթադրությունների վրա՝ փորձագետը չի կարողացել պարզել տուժողի ստացած ականջի վնասվածքի պատճառ դարձած հարվածի  վաղեմության ժամկետը:Տուժողի հեռախոսային խոսակցությունների գաղտնալսմամբ պարզվել է, որ  վերջինս վիճաբանել է տաքսիստի հետ, ով իր իսկ արտահայտությամբ «տվեց գլուխ-մլուխս կոտրեց»:Որպես նախաքննական մարմնի կողմից թույլ տրված խախտում պաշտպանը նշեց այն, որ  իր պաշտպանյալներն առանց ճանաչման  ներկայացվելու մասնակցել  են քննչական գործողությանը:  

Ամբաստանյալ Խ. Բախբուդարյանի պաշտպան Արայիկ Ալվանդյանն իր հերթին նշեց, որ ՀՀ ոստիկանապետ Վլադիմիր Գասպարյանը՝չսպասելով ծառայողական քննության ավարտին, ամբաստանյալների հասցեին ինչ-ինչ արտահայտություններ է իրեն թույլ տվել, ինչով խախտել է անմեղության կանխավարկածի սկզբունքը:       

Օգոստոսի 30-ի դատական նիստում պաշտպանական ճառերով հանդես կգան ամբաստանյալները: 

Ի դեպ, ոստիկանների կողմնակիցները դատարանի շենքի մուտքի դիմաց  բողոքի ակցիա էին կազմակերպել, նրանք պաստառներ էին պարզել՝ պահանջելով կայացնել արդար դատավճիռ:

Հեղինակ` Սոնա Մաշուրյան