Փաստ ինֆո

Երևանի Աջափնյակ և Դավթաշեն վարչական շրջանների ընդհանուր իրավասության դատարանի դատավոր  Դավիթ Բալայանի վարույթ է ընդունվել մանկական պոռնկագրական բնույթի սիրողական տեսանյութերին առնչվող  հերթական գործը:  Ինչպես տեղեկանում ենք «Դատալեքս» տեղեկատվական համակարգի միջոցով, ըստ մեղադրանքի,  24-ամյա Միքայել Ամատունին իր բնակարանում գտնվող համակարգչի միջոցով՝ ստանալով համացանցի հասանելիություն, 2012 թվականի հոկտեմբեր ամսից պարբերաբար ներբեռնել և իր համակարգչի տվյալների պահպանման համակարգում պահել է 255 մանկական պոռնկագրական բնույթի սիրողական տեսանյութեր և հաղորդագրությունների միջոցով 16 տարին չլրացած անձանց առաջարկել է դիտել մանկական պոռնոգրաֆիա պարունակող տեսահոլովակներ:  Գործի իրեղեն ապացույցի թվում են՝  16 լազերային սկավառակներ  և համակարգիչ: 

Մ.Ամատունուն մեղադրանք է առաջադրվել ՀՀ քրեական օրենսգրքի  142-րդ հոդվածի առաջին  մասով՝ երկու դրվագ,  34-142-րդ հոդվածի առաջին մասով,  263-րդ հոդվածի երկրորդ մասով՝ երկու դրվագով, այն է՝ համապատասխանաբար՝   անառակաբարո գործողություններ, դրանց փորձ, համակարգչային համակարգի միջոցով մանկական պոռնոգրաֆիայի ներկայացնելը կամ համակարգչային համակարգում կամ համակարգչային տվյալների պահպանման համակարգում մանկական պոռնոգրաֆիայի պահպանելը, խափանման միջոց է ընտրվել կալանավորումը: 

Քրեական գործ հարուցելու և նախաքննության ընթացքի մասին ժամանակին հաղորդագրություն էր տարածել  ՀՀ գլխավոր դատախազության մամուլի ծառայությունը: Ըստ այդմ, փաստաբանի գրավոր հաղորդման հիման վրա Ոստիկանության Կազմակերպված հանցավորության դեմ պայքարի գլխավոր վարչությունում նախապատրաստված նյութերով պարզվել էր, որ անհայտ անձը, 12-14 տարեկան տղաների հետ սեռական հարաբերություններ ունենալու նպատակով, 2013թ. ապրիլ ամսվա ընթացքում «Odnoklassniki.ru» սոցիալական կայքում ծանոթացել է անչափահաս՝ 2004 թվականին ծնված Կարենի հետ (անունը փոխված է) և համացանցային նամակագրության միջոցով վերջինիս հետ քննարկել հնարավոր սեռական հարաբերությունների, դրանց ձևերի և   սեռական օրգանների մասին։

Բացի այդ, նույն կայքի միջոցով նույն անձը Կարենին ցուցադրել է մանկական պոռնկագրական բնույթի տեսանյութ` չիմանալով, որ վերջինիս փոխարեն նամակագրությունն իր հետ վարում է նրա հայրը:

Նախապատրաստված նյութերով ապրիլի 18-ին  ՀՀ գլխավոր դատախազության ՀՀ ազգային անվտանգության մարմիններում քննվող եւ կիբերհանցագործությունների գործերով վարչությունում   հարուցվել էր քրեական գործ`   անչափահասի նկատմամբ անառակաբարո գործողություններ կատարելու փորձի և համակարգչային համակարգի միջոցով մանկական պոռնոգրաֆիա ներկայացնելու դեպքերի առթիվ՝ ՀՀ քրեական օրենսգրքի 34-142-րդ հոդվածի 1-ին մասով և 263-րդ հոդվածի 2-րդ մասով: Քրեական գործի նախաքննությունը հանձնարարվել էր  ՀՀ  ոստիկանության քննչական գլխավոր վարչության  հատկապես կարևոր գործերով քննության վարչությանը:

Ոստիկանության համապատասխան ստորաբաժանումների, ինչպես նաև  քրեական գործով դատավարական ղեկավարում իրականացնող դատախազության համապատասխան վարչության աշխատակիցների համատեղ մշակած համալիր գործողությունների ծրագրի եւ օպերատիվ իրականացված միջոցառումների արդյունքում պարզվել էր   վերը թվարկված գործողությունները կատարած անձի ինքնությունը, նրա  բնակարանում կատարված խուզարկության ժամանակ առգրավված համակարգչի զննությամբ հայտնաբերվել են մանկական պոռնոգրաֆիա պարունակող բազմաթիվ տեսանյութեր։ Միքայել Ա.-ն ապրիլի 19-ին ձերբակալվել էր։