Փաստ ինֆո

Օգոստոսի 14-ին կայացած ստուգողական խաղում Հայաստանի ազգային հավաքականը 0:2 հաշվով պարտվեց Ալբանիայի ընտրանուն: Վերադարձից հետո գլխավոր մարզիչ Վարդան Մինասյանը պատասխանել է ՀՖՖ պաշտոնական կայքի հարցերին:

-Ինչպիսի՞ն է ընդհանուր տպավորությունը խաղից:

 -Կարելի է ասել, որ առաջին խաղակեսը վատ չստացվեց, որովհետև տղաները հիմնականում կատարեցին մեր առաջադրանքը: Պարզապես, չօգտագործեցին մրցակցի դարպասը գրավելու հնարավորությունները, իսկ ալբանացիները իրենց պահերը չվատնեցին: Երկրորդ խաղակեսում այնքան էլ լավ հանդես չեկանք. դա, հավանաբար, պայմանավորված է այն հանգամանքով, որ շատ փոփոխություններ կատարեցինք, և ֆուտբոլիստների միջև խաղակցվածությունը կորավ: Ընդհանուր առմամբ, խաղից այդքան էլ գոհ չեմ: Հանդիպումը նաև ցույց տվեց, որ որոշ ֆուտբոլիստներ ֆունկցիոնալ առումով այնքան էլ պատրաստ չէին: Կամո Հովհաննիսյանը լավագույն մարզավիճակում չէր: Լևոն Հայրապետյանը, բնականաբար, այդքան երկար չխաղալուց հետո դեռ չի հասցրել օպտիմալ մարզավիճակ ձեռք բերել: Լավ վիճակում չէր նաև Խաչատուրովը, որը վերջին հանդիպումներում խաղալու քիչ ժամանակ էր ունեցել: Խոսել եմ բոլոր տղաների հետ և զգուշացրել, որ պետք է ամեն ինչ անեն Չեխիայի և Դանիայի հավաքականների հետ հանդիպումներին լավ մարզավիճակում ներկայանալու համար:

 -Խաղից առաջ նշել էիք, որ պետք է աշխատել դիրքային գրոհների բարելավման վրա: Այդուհանդերձ, կրկին որոշակի դժվարություններ կային պաշտպանությունից գրոհի անցնելու ժամանակ:

 -Այո, որոշակի դժվարություններ կային: Հենց այդ պատճառով երկրորդ խաղակեսում սկսեցինք խաղալ 4 կիսապաշտպանով՝ առանց աջ կիսապաշտպանի: Խնդիրն այն է, որ ստիպված էինք փոխարինել Մարկոսին, որովհետև նա դժվարությամբ էր տեղաշարժվում խաղադաշտում: Հենց այդ պատճառով կրկին սկսեցինք ավելի շատ խաղալ եզրերով: Բնականաբար, դիրքային գրոհների բարելավման համար դեռ շատ պետք է աշխատենք մարզումների ընթացքում, իսկ այս անգամ մեր ժամանակը շատ քիչ էր: Բացի այդ, 7 խաղացողներ մեզ միացան արդեն Ալբանիայում: Որոշ դրվագներում առաջին խաղակեսում մեր խաղը վատ չէր ստացվում, կարճ փոխանցումներն անցնում էին, բայց, ցավոք, մեզ չհաջողվեց գոլ խփել: 

 -Կարողացա՞ք կատարած փոփոությունների միջոցով տեսնել այն, ինչ ուզում էիք:

 -Հիմնականում, այո: Փոփոխությունների նպատակը տարբեր խաղացողների որոշակի դիրքերում ստուգելն էր, ինչպես նաև պաշտոնական հանդիպումներին քիչ մասնակցող ֆուտբոլիստներին խաղալու հնարավորություն տալը: Չեմ ուզում անդրադառնալ խաղացողներին առանձին-առանձին, հիմնականում տեսա այն, ինչ ուզում էի:

 -Ձեր կարծիքով կայի՞ն ֆուտբոլիստներ, որոնք ինչ-որ չափով խնայում էին իրենց:

-Իհարկե ոչ: Ուղղակի բոլոր ֆուտբոլիստներն էլ ենթագիտակցորեն հասկանում են ընկերական և պաշտոնական խաղերի տարբերությունը: Այդ խնդիրը միայն մեզ մոտ չէ: Եթե դուք նայեք նույն օրը կայացած մյուս խաղերը, կտեսնեք, որ նմանատիպ խնդիրներ ունեին նաև մյուս հավաքականները: Նույն Գերմանիայի հավաքականը սեփական հարկի տակ չկարողացավ հաղթել Պարագվայի հավաքականին: Մեզ համար առավել կարևոր է վերլուծություններ անել ու հնարավորինս լավ պատրաստվել մոտակա խաղերին:

 -Ինչպիսի՞ ազդեցություն ունեցավ թիմի վրա Հենրիխ Մխիթարյանի բացակայությունը:

 -Մխիթարյանը թիմի առաջատարներից է և, բնականաբար, նրա բացակայությունը չէր կարող չզգացվել: Այս անգամ նրա դիրքում խաղում էր Մարկոսը, որը նույնպես մեր հիմնական կազմի խաղացող է, բայց, ցավոք, լավ մարզավիճակում չէր: Ֆուտբոլում մանրուքներ չկան, և եթե ֆուտբոլիստը չի խաղում իր թիմի հիմնական կազմում, դա չի կարող չանդրադառնալ նրա մարզավիճակի վրա: Եթե 11 ֆուտբոլիստներից նույնիսկ չորսը չունեն մշտական խաղային պրակտիկա, դա անպայման ազդում է ընդհանուր թիմի վրա: Իսկ, օրինակ, Գևորգ Ղազարյանի մոտ հակառակ պատկերն է: Նա վերջին շրջանում խաղում է շատ խիտ գրաֆիկով, այդ պատճառով նրա մոտ նկատվում էր որոշակի հոգնածություն: Մինչև սեպտեմբերի 6-ը՝ Չեխիայի հավաքականի հետ հանդիպումը, 3 տուր կա և մեր ֆուտբոլիստները պետք է ամեն ինչ անեն օպտիմալ մարզավիճակում լինելու համար:

 -Իսկ ինչո՞վ էր պայմանավորված Օզբիլիսի՝ անընդհատ կենտրոն տեղախոխվելը:

 -Մենք Արազին որոշակի ազատություն էինք տվել, քանի որ նա եզրից տեղափոխվելով կենտրոն, կարողանում է սրություն ստեղծել: Իսկ ընդհանրապես, կրկնում եմ, սխեմաների առկայությունը ժամանակակից ֆուտբոլում պայմանական է: Հատկապես հարձակման գիծը պետք է լինի ճկուն, որպեսզի կարողանա անակնկալի բերել մրցակցին:

 -Ի՞նչ խնդիր է առաջադրված հավաքականին վերջին 4 խաղերից առաջ:

-Արդեն ապացուցել ենք, որ ունենք լավ թիմ, որը կարող է հաղթել ցանկացած մրցակցի: Մեկ անգամ արդեն ասել եմ, կարող եմ նորից կրկնել, որ մեզ պակասում է միայն կայունությունը: Բայց կորցնելու ոչինչ չունենք, այնպես որ ձգտելու ենք յուրաքանչյուր խաղում հասնել առավելագույն արդյունքի: