Փաստ ինֆո

Ֆուտբոլի Հայաստանի ազգային հավաքականը այսօր մեկնեց Ալբանիա, որտեղ օգոստոսի 14-ին՝ Երևանի ժամանակով 22:45-ին ստուգողական հանդիպում կանցկացնի այդ երկրի ընտրանու հետ: 

Նախամեկնարկային հավաքին մասնակցած խաղացողներից գլխավոր մարզիչ Վարդան Մինասյանը ընտրել է 14-ին. դարպասապահներ՝ Ռոման Բերեզովսկի («Դինամո» Մոսկվա, Ռուսաստան), Գևորգ Կասպարով («Զոբ Ահան», Իրան), պաշտպաններ՝ Հրայր Մկոյան, Արթուր Ավագյան (երկուսն էլ «Գանձասար»), Կամո Հովհաննիսյան («Փյունիկ»), Լևոն Հայրապետյան («Վիձև», Լեհաստան), կիսապաշտպաններ՝ Դավիթ Մանոյան («Փյունիկ»), Արթուր Եդիգարյան («Կայրաթ», Ղազախստան), Արաս Օզբիլիս («Սպարտակ» Մոսկվա, Ռուսաստան), Մարկոս Պիզելի («Կրասնոդար», Ռուսաստան), Գևորգ Ղազարյան («Շախտյոր» Կարագանդա, Ղազախստան), Նորայր Ասլանյան («Վիլլեմ II», Հոլանդիա), հարձակվողներ՝ Յուրա Մովսիսյան («Սպարտակ» Մոսկվա, Ռուսաստան), Արթուր Սարկիսով («Ուրալ», Ռուսաստան):

Արդեն Տիրանայում թիմին կմիանան Կառլեն Մկրտչյանը («Մետալուրգ» Դոնեցկ, Ուկրաինա), Արտյոմ Խաչատուրովը («Տիրասպոլ», Մոլդովա), ինչպես նաև երիտասարդական հավաքականի ֆուտբոլիստներ Վարազդատ Հարոյանը, Տարոն Ոսկանյանը, Աղվան Պապիկյանը, դարպասապահ Գոռ Մանուկյանը (չորսն էլ «Փյունիկ») և Սարգիս Ադամյանը («Հանզա» Ռոստոկ, Գերմանիա):

Փաստորեն, «Քեմալ Մուստաֆա» մարզադաշտում հավաքականի առաջատարներից չենք տեսնի Հենրիկ Մխիթարյանին, Էդգար Մանուչարյանին, Վալերի Ալեքսանյանին, վնասվածք ունեցող Ռոբերտ Արզումանյանին: Վերստին հետաձգվում է Միխաիլ Մարկոսովի նորամուտը: Ի դեպ, Հայաստանում հավաքականին վերջինը միացավ Ռոման Բերեզովսկին, որը չնայած Ռուսաստանի առաջնության 4-րդ տուրում «Թերեքի» հետ խաղում ստացած փոքր վնասվածքին կօգնի մեր ազգային թիմին: