Փաստ ինֆո

ԱՄՆ-ի նախագահ Բարաք Օբաման հայտարարել է, որ ԿՀՎ-ի նախկին աշխատակից Սնոուդենը, եթե գտնում է, որ գաղտնի տեղեկություն տարածելու իր կողմից կատարված  արարքը ճիշտ է, ապա պետք է ներկայանա դատարան և դա ապացուցի: «Եթե իրականում նա համարում է, որ ճիշտ է վարվել, ապա, ինչպես ամերիկայի  յուրաքանչյուր քաղաքացի, նա կարող է գալ այստեղ, կանգնել դատարանի առջև` իր փաստաբանի հետ և պաշտպանել  սեփական տեսակետը», ընդգծել է ԱՄՆ նախագահը նախօրեին  Սպիտակ տանը կայացած մամլո ասուլիսի ժամանակ, հաղորդում է «interfax»-ը:

Ինքը, նախագահ Օբաման, Սնոուդենին հայրենասեր չի համարում: Լրատվական գործակալությունը նշում է, որ «Իփսոս» սոցիոլոգիական ծառայության կատարած սոցհարցումների համաձայն, ամերիկացիների 31 տոկոսը գտնում է, որ ԿՀՎ-ի նախկին աշխատակիցը, ով   իրականացրեց  գաղտնի տեղեկատվության արտահոսք,  հայրենասեր է, իսկ 23 տոկոսը համարում է, որ Սնոուդենը դավաճան է:

Մամլո ասուլիսում, այնուամենայնիվ, Օբաման  նշել է, որ  Ազգային անվտանգության գործակալության  գործունեությունը տեղեկություններ հավաքելու մասով պետք է ավելի թափանցիկ դարձվի: «Ես կոնգրեսի հետ կաշխատեմ «Հայրենասիրական ակտի»  մեջ  համապատասխան փոփոխություններ կատարելու ծրագրի ուղղությամբ, որը կկարգավորի հեռախոսային խոսակցությունների տվյալների հավաքումը»,- ասել է Օբաման:

Նա ընդգծել է, որ ոչ միայն ինքը, այլ նաև «ողջ ամերիկյան ժողովուրդը պետք է վստահի տվյալների հավաքման ծրագրին: Այդ նպատակով, ասել է նախագահը,  կգաղտնազերծվեն հատուկ ծառայությունների գործունեությունը ներկայացնող նոր տվյալներ: «Ես հանձարարել եմ հետախուզական ծառայություններին հրապարակել որքան հնարավոր է շատ տեղեկատվություն այդպիսի ծրագրերի մասին: Մենք արդեն գաղտնազերծել ենք աննախադեպ ծավալի տեղեկատվություն՝   Ազգային անվտանգության գործակալության մասին, բայց մենք կարող ենք էլ ավելի հեռուն գնալ»,- ասել է Օբաման: