Փաստ ինֆո

ՈւԵՖԱ-ն հաստատել է Չեմպիոնների լիգայի ընթացիկ խաղարկության և կազմակերպության սուպերգավաթի մասնակիցների միջև եկամուտների բաշխման կարգը: Այդ նպատակով տրամադրվելու է շուրջ 1,34 մլրդ եվրո:

Մեդիաիրավունքներից և կոմերցիոն պայմանագրերից ստացված գումարի մոտ 75 տոկոսը՝ առավելագույնը 530 մլն եվրո, հատկացվելու է ակումբներին: Մնացած 25 տոկոսը կմնան ՈւԵՖԱ-ում և կծախսվեն կազմակերպչական, վարչական կարիքները հոգալու, ինչպես նաև ազգային ֆեդերացիաներին, ակումբներին և լիգաներին, այսպես կոչված, համերաշխության գումարները վճարելու համար: Եթե նույն աղբյուրներից ստացված գումարը նախատեսվածից շատ լինի, ապա ակումբներին կհատկացվի ոչ թե 75, այլ 82 տոկոսը: 

Բացի այդ, ինչպեսև անցյալ տարի, Չեմպիոնների լիգայից ստացված գումարից 40 մլն եվրոն կուղղվի Եվրոպայի լիգայի մասնակիցներին: Երեք միլիոն էլ կառանձնացվի Չեմպիոնների և Եվրոպայի լիգաների որակավորման փուլերում անհաջողության մատնված թիմերին վճարելու համար: 55 միլիոն էլ կհատկացվի որակավորման վերջին փուլի մասնակից 20 ակումբներին վճարելու համար: Նրանցից յուրաքանչյուրը միանվագ 2,1 մլն եվրո կստանա:

Այդ ամենից հետո Չեմպիոնների լիգայի և սուպերգավաթի համար խաղի մասնակիցներին կմնա 1, 285 մլրդ եվրո: Դրանից 500,7 միլիոնը կբաշխվի ֆիքսված վճարումների տեսքով (խմբային փուլ անցնելու, այնտեղ գրանցած արդյունքների և փլեյ-օֆում հաջողությունների համար): Իսկ 409,6 միլիոնը տարբեր չափաբաժիններով կբաշխվի Չեմպիոնների լիգայի մասնակիցների միջև (սկսած խմբային փուլից)՝ հեռուստաշուկայում նրանց գրանցած եկամտաբերությանը համապատասխան: 

Չեմպիոնների լիգայի նախորդ խաղարկության խմբային մրցաշարի բոլոր 32 մասնակիցները կստանան առնվազն 8,6 մլն եվրո: Իսկ մրցաշարի հաղթող «Բավարիան» կստանա 37,4 միլիոն՝ գումարած հեռուստաիրավունքների վաճառքից հասանելիք բաժինը: 

Միաժամանակ, խմբային փուլում յուրաքանչյուր հաղթանակը թիմերին կբերի 1 մլն, իսկ ոչ-ոքին՝ 500 հազարական եվրո: 1/8 եզրափակիչ անցնելու համար յուրաքանչյուր ակումբ կստանա 3,5 մլն եվրո, քառորդ եզրափակիչի ուղեգիրը մասնակիցներին կհարստացնի ևս 3,9, իսկ կիսաեզրափակիչինը՝ 4,9 միլիոն եվրոյով: Մրցաշարի հաղթողը կստանա լրացուցիչ 10,5 մլն եվրո, իսկ եզրափակիչ խաղում պարտված թիմը՝ 6,5 մլն եվրո:

Խմբային փուլ չանցած բոլոր ազգային առաջնությունների հաղթողները կստանան 200 հազարական եվրո: Որակավորման առաջին փուլից պայքարն ավարտած թիմերը կստանան 150 հազար, երկրորդից՝ 175, իսկ երրորդից՝ 200 հազարական եվրո: Ըստ այդմ, 2-րդ փուլում պարտված Գյումրիի «Շիրակը» մրցաշարին մասնակցելու համար կստանա առնվազն 375 հազար եվրո՝ չհաշված մյուս հավելավճարները:

Այս տարվա օգոստոսի վերջին Պրահայում կայանալիք սուպերգավաթի համար խաղի հաղթողը կպարգևատրվի 3 մլն եվրոյով, իսկ պարտված թիմը կստանա 2,2 մլն եվրո: