Փաստ ինֆո

Գերմանիայում ահռելի դոպինգ սկանդալ է հասունանում, որի շրջապտույտում կարող են հայտնվել երկրի տարբեր ժամանակների հռչակավոր մարզիկներ:

Գերմանիայի օլիմպիական մարզական միությունը ձևավորել է անկախ հանձնաժողով, որը պետք է ուսումնասիրի XX դարի երկրորդ կեսում ԳՖՀ-ում խթանիչներին առնչվող փորձերի մասին գերմանացի գիտնականների զեկույցը: Օլիմպիական միության ներկայացուցիչ Քրիստիան Կլաուեն ИТАР-ТАСС-ին հայտնել է, որ միայն ուսումնասիրությունից հետո պարզ կլինի, թե ինչպիսի պատժամիջոցներ են կիրառվելու և ում նկատմամբ: «Առայժմ դժվար է ասել, թե այդ ամենը ինչպիսի հետևանք կունենա սկանդալում ներգրավված մեր մարզիկների, բժիշկների, քաղաքական գործիչների և պաշտոնյաների համար: Սպասում ենք հանձնաժողովի առաջարկություններին, որը միությանը կհուշի, թե ինչ է պետք անել հանուն օլիմպիական շարժման և գերմանական սպորտի լավ ապագայի»,- նշել է նա:

Իսկ մինչ այդ, քննադատության թիրախ է դարձել երկրի ֆինանսների գործող նախարար Վոլֆգանգ Շոյբլը, որը 1976 թվականին լինելով բունդեսթագում Քրիստոնեա-դեմոկրատական միության խմբակցության անդամ, կոչ է արել նպաստել գերմանացի մարզիկների արդյունքների աճին՝ այդ թվում դեղամիջոցների կիրառմամբ: Նախարարն արդեն հայտարարել է, որ նման բան չի հիշում:

Այս խորապատկերում հասարակությունը ավելի համառորեն է պահանջում օրենքի ուժով արգելել մարզիկներին դոպինգ օգտագործել: Գերմանիայի ֆուտբոլային միության նախագահ Վոլֆգանգ Նիրսբախը արդեն հայտարարել է, որ հաջորդ մրցաշրջանից բունդեսլիգայի խաղացողները մեզից բացի նաև արյան անալիզ կհանձնեն: Այնուհանդերձ, մտավախություն կա, որ ազգային օլիմպիական կոմիտեն ոչ միշտ շահագրգռված կլինի արդար հետաքննություն անցկացնել, իսկ տեղական մակարդակով դատավարությունները կձգձգվեն: