Փաստ ինֆո

Հասարակական տրանսպորտի ոլորտում ստեղծված այսօրվա վիճակի համար մասնագետները մեղադրույմ են տրանսպորտի նախարար Գագիկ Բեգլարյանին: Այս թեմային նվիրված նրանց հրավիրած ասուլիսում, սակայն, այդպես էլ չհնչեցին նախարարի հրաժարականի իրավական հիմքերը, փոխարենը հնչեց ևս մեկ պահանջ՝ Երևանի ավագանում անվստահություն հայտնելու:

Չքննադատելով հանդերձ երիկտասարդ ակտիվիստների քայլերը՝ Երևանի քաղաքապետարանի տրանսպորտի վարչության պետի և «Երևանտրանս» ՊՓԲԸ տնօրենի հրաժարականի պահանջի ուղղությամբ, այսօր հրավիրված ասուլիսի մասնակից հասարակական հատվածի ներկայացուցիչները համոզմունք հայտնեցին, թե նախ և առաջ հարկավոր է պահանջել Տրանսպորտի և կապի նախարար Գագիկ Բեգլարյանի հրաժարականը:

«Հասարակական տրանսպորտն այսօր աշխատում է 2001թ-ի հայեցակարգով, որով և որոշվել է, որ մրցութային կարգով մասնավորներին պետք է գծեր հատկացվեն ուղեվորափոխադրումներ իրականացնելու համար»,- ասաց  «Հասարակական դիրքորոշում» ՀԿ նախագահ Գևորգ Դոստուրյանը, հավելելով, որ քաղաքապետարանը, փաստորեն, առաջնորդվում է կառավարության այս որոշմամբ: ՀԿ նախագահի համոզմամբ, ոլորտի պատասխանատուները  քաջ գիտակցել են, որ երկրում արձանագրվող գնաճը հանգեցնելու է նաև տրանսպորտի գների բարձրացմանը, սակայն ժամանակին միջոցներ չեն ձեռնարկել: Հենց այս քայլերը չձեռնարկելու համար էլ բանախոսը մեղադրում է Գագիկ Բեգլարյանին: Լրագրողների այն դիտարկմանը, թե 2001թ-ին Գագիկ Բեգլարյանը դեռ տրանսպորտի նախարար չէր, «Ավտովարորդների պաշտպանության լիգա» ՀԿ նախագահ Վարդան Փանոսյանը պատասխանեց, թե մրցույթները թեև անցկացնում է քաղաքապետարանը, բայց վերջինը շարժվում է կառավարության մշակած քաղաքականությամբ: Մինչդեռ, իրենց համոզմամբ, հենց նախարարությունը պետք է կառավարությունում հանդես գա հասարակական տրանսպորտի ոլորտում սուբսիդիա կիրառելու կամ այն պետականացնելու նախաձեռնությամբ:

Իսկ թե ինչու մասնագետները չեն պահանջում քաղաքապետ Տարոն Մարգարյանի հրաժարականը, «Հասարակական դիրքորոշում» ՀԿ նախագահ Գևորգ Դոստուրյանը նշեց. «Ուրեմն ես Գագիկ Բեգլարյանին թողեմ, պահանջեմ Տարոնի՞ հրաժարականը, Ճանապարհային ոստիկանության պետի՞ հրաժարականը, Բեգլարյանին էլ թույլ տամ, որ իրա թևերը բացի ասի՝ Տղերք, սաղիս հրաժարակա՞նն են պահանջում: Ոչ, դու ես իմ նախարարը, վերջ, ես ոչ մեկի հետ գործ չունեմ»:

Ի դեպ, ինչպես պարզ դարձավ ասուլիսի հետագա ընթացքից, բանախոսները շատ ավելի դժգոհ էին տաքսիների լիցենզավորման համար նախարարության սահմանած պահանջներից, քանի որ նրանց գերակշիռ մասը հատկապես տաքսի ծառայություններ մատուցող ընկերությունների ներկայացուցիչներ կամ անհատ տաքսիստներ էին:

Իսկ օրինակ, ասուլիսին մասնակցող «Սպառողների միության»  նախագահ  Արմեն Պողոսյանը հայտարարեց Երևանի ավագանուն անվստահություն հայտնելու իր դիրքորոշման մասին՝ հընթացս տեղեկացնելով, որ ինքը Բեգլարյանի հրաժարականի պահանջին չի միացել:

 «Ով ինչ ուզում անում է, ո՞ւր է ավագանին»,- հռետորական հարց հնչեցրեց Արմեն Պողոսյանը և հավելեց. «Ավագանուն մենք հայտարարում ենք անվստահություն և ուղարկում ենք տուն, բացի միջազգային գրոսմայստերից»:  

Հեղինակ` Նելլի Դանիելյան