Փաստ ինֆո

Մուրացկանությամբ զբաղվելու համար երկու և ավելի երեխաների հավաքագրելու, նրանց շահագործելու և գողության մեջ ներգրավելու  փաստով հարուցված քրեական գործի նախաքննությունն ավարտվել է   ու   ուղարկվել դատարան: 

Այսպես, ըստ մեղադրական եզրակացության, գործով մեղադրյալ Արման  Գիվարգիզովը  2013թ. հունվարի կեսերին Մաշտոցի պողոտայում գտնվող ինտերնետ ակումբում ծանոթացել է գործով տուժող, անչափահաս Արարատի հետ, ապա օգտվելով անփաչահասի խոցելի վիճակից՝  վերջինս փախել էր  տնից, բնակության վայր չուներ, հայրը վաղուց լքել էր ընտանիքը ու  մեկնել ՌԴ,  մուրացկանությամբ զբաղվելու համար հավաքագրել  ու մինչև մարտի 19-ը  շահագործել է նրան: Ընդ որում, այս և մյուս դեպքերում շահագործել է  անչափահասներին՝ ըստ իրավիճակի կեղծ խոստումներ տալով: Արարատի դեպքում  գործի են դրվել    երեխայի  համար անձնագիր ու վարորդական իրավունքի վկայական ձեռք բերելու, իր հետ ՌԴ Ռոստով քաղաք տանելու, մեծահարուստ աղջկա հետ ամուսնացնելու և բարեկեցիկ կյանքով ապահովելու, ընտանիքից հեռացած նրա հորը գտնելու և նրանց հանդիպումը կազմակերպելու  կեղծ խոստումները: Արդյունքում, քրեական գործի նյութերի համաձայն,  մեղադրյալը   ստացել ու տնօրինել է Երևանի տարբեր փողոցներում վերջինիս կողմից մուրացկանությամբ վաստակած, ընդհանուր՝ մոտ 250.000 ՀՀ դրամ գումարը:

2013թ. հունվարի 18-ին  Արման Գիվարգիզովը նույն ինտերնետ ակումբում ծանոթացել է նաև գործով տուժող, անչափահաս, «թեթև աստիճանի մտավոր հետամնացություն վարքային նշանակալի խանգարումներով» ախտորոշմամբ սակավամտությամբ և իր գործողությունների նշանակությունը հասկանալու և դրանք ղեկավարելու ունակությունից զրկված Վռամի հետ:  Նույն կերպ օգտագործելով մուրացկանությամբ զբաղվող երեխայի վիճակի խոցելությունը՝  հիվանդությունն ու ծնողական հսկողությունից դուրս մնալու առումով, այս անգամ  նրա համար անձնագիր ու վարորդական իրավունքի վկայական ձեռք բերելու կեղծ խոստումից բացի խոստացել է  բջջային հեռախոս գնել, դերասանի կարիերա,  և մուրացկանությամբ զբաղվելու համար նույն օրը հավաքագրել է Վռամին:  2013թ. հունվարի 19-ին ու 20-ին անչափահասին  շահագործելու ընթացքում մեղադրյալն, ըստ մեղադրական եզրակցության,  ստացել ու տնօրինել է Երևանի տարբեր փողոցներում նրա կողմից մուրացկանությամբ վաստակած, ընդհանուր՝ շուրջ 7.400 ՀՀ դրամ գումարները:

Արման Գիվարգիզովը  2013թ. հունվարի վերջերին, գործով դեռևս չպարզված օրը, Երևանի Թումանյան և Նալբանդյան փողոցների խաչմերուկում տեսել է «Թիվ 1 հատուկ կրթահամալիրի» սան, մուրացկանությամբ զբաղվող, սույն գործով տուժող, տասնութ տարին չլրացած Միսակին,  ծանոթացել  նրա հետ: Օգտագործելով ծնողական հսկողությունից դուրս մնալու առումով վերջինիս վիճակի խոցելիությունը,  այս անգամ անչափահասին շահագրգռելով 250.000 ՀՀ դրամ  աշխատավարձով  որպես թիկնապահ աշխատանքի  ընդունելու կեղծ  խոստումով,  բոլորի համար կիրառելի այլ՝   նրա համար անձնագիր և վարորդական իրավունքի վկայական ձեռք բերելու, իր հետ ՌԴ Ռոստով քաղաք տանելու և բարեկեցիկ կյանքով ապահովելու կեղծ խոստումներով, մուրացկանությամբ զբաղվելու համար հավաքագրել է Միսակին և շուրջ 5 օր  շահագործել նրան՝ ստանալով և տնօրինելով Երևանի տարբեր փողոցներում մուրացկանությամբ նրա վաստակած, ընդհանուր՝  շուրջ 25.000 ՀՀ դրամ գումարները:

Սակայն ըստ մեղադրական եզրակացության,  գործը մուրացկանությամից ստացած շահը կենտրոնացնելով չի ավարտվել, Արման Գիվարգիզովն  կազմակերպել ու անչափահասներին ներգրավել է գողության մեջ:    2013թ. հունվարի վերջերին, գործով դեռևս չպարզված օրը, իր կողմից շահագործման վիճակում գտնվող Արարատին, Միսակին և իրենց հետ նույն հարկի տակ բնակվող անչափահաս Ա. Հովհաննիսյանին հայտնել է, որ պատրաստվում է զբաղվել օգտագործված եվրոպական հագուստի առևտրով, որի համար իրեն անհրաժեշտ է 50.000 ՀՀ դրամ և քանի որ տղաները չեն կարող այդքան գումարը  1-2 օրում մուրացկանությամբ հավաքել այդքան գումար, ուստիեւ պետք է կատարեն գողություն։  Նրա կազմակերպմամբ, անչափահասները ներգրավվել են հանցագործության մեջ։  Մասնավորապես «Գոլդուեյ» ՍՊԸ-ին պատկանող՝ «Շկոդա» մակնիշի՝ Տ7181 համարանիշի ավտոմեքենայից գաղտնի հափշտակել են գազի գլանանոթը՝ «Գոլդուեյ» ՍՊԸ-ին պատճառելով զգալի չափերով՝ 120.000 ՀՀ դրամի գույքային վնաս: Գողացված գազի գլանանոթը Ա.Հովհաննիսյանը մի քանի օր անց  30.000 ՀՀ դրամով վաճառել է և գումարը տվել Արման  Գիվարգիզովին։

Վերջինիս մեղադրանք է առաջադրվել   ՀՀ քրեական օրենսգրքի 132-րդ  պրիմ 2 հոդվածի 2-րդ մասի 1-ին կետով՝  երեխայի կամ հոգեկան խանգարման հետևանքով իր արարքի  բնույթն  ու նշանակությունը գիտակցելու կամ դա ղեկավարելու հնարավորությունից զրկված անձի թրաֆիկինգըկամ շահագործումը, որը  կատարվել է երկու կամ ավելի անձանց նկատմամբ,  165-րդ հոդվածի 1-ին մասով՝   անչափահասին հանցանքի կատարման մեջ ներգրավելը,  և   38-177-րդ հոդվածի 2-րդ մասի 1-ին և 3-րդ կետերով՝  շինություն ապօրինի մուտք գործելով՝  մի խումբ անձանց կողմից նախնական համաձայնությամբ,  գողության կազմակերպում:

Հեղինակ` Սոնա Մաշուրյան