Փաստ ինֆո

Լոնդոնի դատարանը «Ֆորմուլա-1»-ի խոշոր սեփականատերերից մեկին՝ բրիտանալյուքսեմբուրգյան «Սի Վի Սի» խմբին պարտադրել է ներկայացնել արքայական ավտոարշավի ղեկավարման պատկառելի փաթեթի ձեռքբերմանն առնչվող 7-ամյա վաղեմության գործարքի բոլոր ներքին փաստաթղթերը:

Այդ մասին տեղեկացնում է Financial Times թերթը նշելով, որ դատարանը պատրաստվում է լսել գերմանական «Կոնստանտին մեդիա» խմբի հայցը: Վերջինս պնդում է, որ 2006 թվականին գերմանական «Բայերն ԼԲ» բանկը  «Ֆորմուլա-1»-ի կապիտալի բաժնետոմսերի 47 տոկոսը իջեցված գնով է վաճառել «Սի Վի Սի»-ին: Ցուցմունքներ տալու համար դատարան է հրավիրվել «Ֆորմուլա-1»-ի նախագահ, բրիտանացի հայտնի գործարար Բերնի Էքլսթոունը, որի դատական խնդիրները կրկնապատկվեցին: Դատը, ենթադրաբար, կսկսվի հոկտեմբերի 28-ին և կտևի 6 շաբաթ:

2006-ի ապրիլին «Բայերն ԼԲ»-ն 820 մլն դոլարով բաժնետոմսերի 47 տոկոսը վաճառել էր «Սի Վի Սի»-ին, որը, ինչպես նշում է Financial Times-ը, մեկ տարի անց այն գնահատեց 2,8 մլրդ դոլար: Հիմա «Կոնստանտին մեդիան», որն անուղղակիորեն մասնակցել է գործարքին, 171 մլն դոլարի փոխհատուցում է պահանջում «Սի Վի Սի»-ից: Լոնդոնյան դատը հաջորդելու է Գերմանիայի դատարանի վճռին, որը ազատազրկման է դատապարտել «Բայերն ԼԲ» բանկի վարչության նախկին ղեկավար Գերհարդ Գրիբկովսկուն: Վերջինս 44 մլն դոլարի կաշառք է վերցրել «Ֆորմուլա-1»-ի իր բաժնեմասը վաճառելու համար: