Փաստ ինֆո

Թերթն անդրադարձել է Արարատի, Շիրակի և Կոտայքի մարզերում հայտնաբերված չարաշահումների թեմային` նշելով, որ առայժմ միակ պատժվողը Արարատի մարզպետարանի գյուղատնտեսության և բնապահպանության վարչության նախկին պետ Տիգրան Վիրաբյանն է:

«Հրապարակ»-ը հիշեցնում է, որ «ՀՀ հողօգտագործողներին մատչելի գներով դիզելային վառելանյութի ձեռքբերման նպատակով  պետական աջակցության» 2012-2013թթ. ծրագրերի իրականացման գործընթացում առանձնապես խոշոր չափերի պետական միջոցների յուրացում կատարելու համար Տ.Վիրաբյանին մեղդարանք էր առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 314-րդ հոդվածի 1-ին մասով: Նրա նկատմամբ որպես խափանման միջոց ընտրվել էր կալանավորումը:

Ֆինանսների նախարարության վերահսկողական տեսչությունը դեռևս հունիսի սկզբին  ստուգումների արդյունքում խոշոր չարաշահումներ էր բացահայտել դիզվառելիքի բաշխման գործընթացում: Արդյունքում` ՀՀ հատուկ քննչական ծառայությունում հունիսի 21-ին հարուցվել է քրեական գործ` ՀՀ քրեական օրենագրքի 179-րդ հոդվածի 3-րդ մասի 1-ին կետով, 308-րդ հոդվածի 2-րդ մասով, 314-րդ հոդվածի 1-ին մասով:

Թերթի ունեցած տեղեկություններով` առաջիկայում բավականին ուշագրավ նորություններ կհրապարակվեն, իսկ երեկվա դրությամբ, ինչպես լրատվամիջոցին հայտնել են ՀՔԾ-ից, այլ ձերբակալվածներ կամ կալանավորվածներ չկան:

Նախաքննությունը շարունակվում է :

Թղթակիցը զրուցել է Կոտայքի մարզպետ Կովալենկո Շահգալդյանի հետ, ով տեղեկացրել է, որ մարզպետարանը բնականոն հունով աշխատում է, աշխատանքից հեռացվածներ չկան: Նույն կերպ է պատասխանել նաև Շիրակի մարզպետ Ֆելիքս Ցոլակյանը` միայն հավելելով. «Մեզ մոտ խնդիր-բան չկա, մեզ մոտ կար անփութություն, կար սխալ աշխատանք»: Թղթակցի այն հարցին, թե դրանք չեն ենթադրում քրեական պատասխանատվություն, Շիրակի մարզպետը պատասխանեռլ է, որ դա քննության ավարտից հետո միայն պարզ կլինի:

Հոդվածն ամբողջությամբ կարդացեք «Հրապարակ» օրաթերթի` 03.08.2013թ. համարում: