Փաստ ինֆո

 

Լրագրողական մի շարք կազմակերպություններն այսօր հանդես են եկել հայտարարությամբ՝ կոչ անելով «Վճարում ենք 100 դրամ» շարժման ակտիվիստներին լրատվամիջոցներից դժգոհություններ արտահայտելու համար ընտրել օրինական և քաղաքակիրթ մեթոդներ։ Գնահատելով այս շարժման կարևորությունը՝ Խոսքի ազատության պաշտպանության կոմիտեն, Մեդիա նախաձեռնությունների կենտրոնը (նախկինում՝  Մամուլի աջակցության «Ինտերնյուս»  ՀԿ), Երևանի Մամուլի ակումբը, Ժուռնալիստների «Ասպարեզ» ակումբը, «Բազմակողմանի տեղեկատվության ինստիտուտ–Հայաստան»-ը, «Լրագրողներ հանուն ապագայի» ՀԿ-ն ընդգծում են,  որ նման հրապարակային միջոցառումներին ցանկացած լրատվամիջոցի աշխատակցի գործունեության խոչընդոտումը հարիր չէ ժողովրդավարական բնույթ կրող շարժմանը։

 

Մյուս կողմից՝ հայտարարության հեղինակները կոչ  են  անում հայաստանյան ԶԼՄ-ներին եւ մասնավորապես՝  հեռուստաընկերություններին,  պատշաճ ուշադրություն ցուցաբերելու այս և  քաղաքացիական այլ շարժումներին ու դրանց առնչվող իրադարձությունները լուսաբանել անաչառորեն՝ հաշվի առնելով քաղաքացիների տեղեկացված լինելու իրավունքի ապահովման անհրաժեշտությունը։

 

«Մենք՝ ներքոստորագրյալներս, լավատեղյակ լինելով հայաստանյան լրատվական դաշտի թերություններին ու խնդիրներին և հասկանալով երիտասարդ ակտիվիստների դժգոհությունը հեռարձակվող լրատվամիջոցների մեծ մասի հաճախ կողմնակալ լուսաբանումներից, այնուամենայնիվ, անթույլատրելի ենք համարում հեռուստաընկերությունների աշխատակիցների մասնագիտական գործունեության խոչընդոտումը։  Գտնում ենք, որ այդ գործողությունները խախտում են ոչ միայն օրենսդրությունը,   այլև՝ մարդկային տարրական էթիկան»,- նշվում է հայտարարության մեջ։

 

Նշենք, որ հայտարարության համար առիթ է հանդիսացել  հուլիսի 31-ի միջադեպը. «Վճարում ենք 100 դրամ»  շարժման երիտասարդ ակտիվիստները Մաշտոցի պուրակում տեղի ունեցած հանրային քննարկման ժամանակ խոչընդոտել են «Հ1»,  «Արմնյուզ»  և «Շանթ»  հեռուստաընկերությունների նկարահանող խմբերի գործունեությանը։

 

Օգոստոսի 2-ին շարժման մասնակիցների անունից տարածված հայտարարությամբ՝ ակտիվիստներն իրենց այդ գործողությունը մեկնաբանել են որպես ինքնաբուխ բոյկոտի ակցիա, որն ուղղված չէր կոնկրետ լրագրողների դեմ, այլ՝ հեռուստաընկերությունների, որոնց ներկայացուցիչները, ըստ հայտարարության հեղինակների, ժամանել էին միայն այն պատճառով, որ պուրակի քննարկմանը ներկա էր Հանրային խորհրդի նախագահ Վազգեն Մանուկյանը։ Ակտիվիստների կարծիքով՝ հեռուստաընկերություններն իրականում հետաքրքրված չէին գործընթացի լուսաբանմամբ և  այս տասն օրվա մեջ գրեթե անուշադրության են մատնել պայքարը։