Փաստ ինֆո

Թերթի ուշադրության կետնրոնում է հունիսի 1-ի` Սուրեն Խաչատրյանի տան մոտ տեղի ունեցած դեպքը: Այս կապակցությամբ թղթակիցը զրուցել է Արտակ Բուդաղյանի փաստաբան Հայկ Ալումյանի հետ:

Նա իր խոսքում մասնավորապես նշել է, որ արդեն հայտնի է, թե ում պատկանող զենքից է սպանվել Ավետիք Բուդաղյանը` միաժամանակ նշելով, որ ավելին ասել, փակագծերը բացել չի կարող, քանի որ դրանով կբացահայտի նախաքննության գաղտնիությունը:

«Կարող եմ ասել միայն, որ Բուդաղյանների վրա կրակած մի զենքի մասին խոսելը սխալ է, այստեղ մի զենքի մասին չէ խոսքը»,- ասել է Հայկ Ալումյանը:

Թղթակցի հարցին, թե արդյոք Բուդաղյանները մի՞ զենքից են ստացել հրազենային վնասվածքներ, փաստաբանը պատասխանել է` ոչ, տարբեր:

Հնչեցված այն հարցին, թե արդյոք Սուրիկ Խաչատրյանի որդուն առաջադրված մեղադրանքն ապացուցվե՞լ է փորձաքննությամբ, Հայկ Ալումյանը պատասխանել է. «Իհարկե, այն էլ` բազմաթիվ ապացույցներով, փորձաքննության մի շարք եզրակացություններվ: Ասեմ նաև, որ փորձաքննության արդյունքների եզրակացությամբ հաստատվել է նաև այն, ինչը այդքան ջանասիրաբար փորձում էր հերքել հակառակ կողմը. Սուրիկ Խաչատրյանի որդին եղել է թմրանյութի ազդեցության տակ»:

Փաստաբանը նաև նշել է, որ այն զենքերը, որոնցից արձակված կրակոցներից վիրավորվել է գնդապետ Բուդաղյանը և սպանվել նրա եղբայրը, Ս.Խաչատրյանի տանից առգրավված այն մյուս զենքերի հայտնի ցանկում չեն եղել :

«Եթե իրոք հաստատվի մեր աղբյուրի պնդումը, ապա դա կվկայի, որ Ս.Խաչատրյանի տանը օրինականից զատ, այլ զենքեր էլ են եղել, ինչի պատասխանատվությունը արդեն կգնա նախկին մարզպետի ուղղությամբ»,- ասել է Հայկ Ալումյանը :

Հոդվածն ամբողջությամբ կարդացեք «Իրավունք» օրաթերթի` 02.08.2013թ. համարում: