Փաստ ինֆո

Դիվանագիտական կենսաչափական անձնագրերի տպագրությունն այս տարեվերջին վերջապես իրողություն կդառնա:

Հիշեցնենք, նախապես հայտարարված ժամկետը 2012թ-ի տարեվերջն էր:

Բանն այն է, որ դիվանագիտական անձնագրերը, ի տարբերություն ՀՀ շարքային քաղաքացիների կենսաչափական անձնագրերի, որոնք տպագրվում են Ոստիկանությունում, պետք է տպագրվեին ԱԳՆ-ում, մինչդեռ այս գերատեսչությունը չուներ համապատասխան տեխնիկական և ծրագրային հնարավորություններ:

Դրանք ապահովելու համար ՀՀ կառավարությունը լեհական PWPW ընկերության հետ պայմանավորվածություն  էր ձեռք բերել:

Սակայն, անհրաժեշտ գումարը կառավարությունը որոշել էր հատկացնել միայն 2012թ-ի դեկտեմբերի 13-ին: Իսկ քանի որ աշխատանքները պետք է կատարվերին մինչև այդ տարեվերջ, լեհական ընկերությունը հրաժարվեց նման սեղմ ժամկետում դրանք կատարելուց: Արդյունքում պայմանագիրը չկնքվեց, իսկ գումար հատկացնելու մասին կառավարության որոշումը ուժը կորցրած ճանաչվեց:

Եվ, ահա, 8 ամիս անց կառավարությունն այսօր դարձյալ որոշում է կայացրել այդ նույն նպատակի համար գումար հատկացնելու մասին:

Ընդ որում, եթե անցյալ տարի հատկացվել էր ընդամենը 7.5 մլն դրամ, ապա այս անգամ գումարը շատ ավելի մեծ է` 11.1 մլն:

Բանն այն է, որ այս անգամ նույն այդ լեհական ընկերությունը արդեն նաև համապատասխան սարքավորումների գումար էլ է պահանջել: Օրինակ` լամինացիոն սարքն արժե 2 942 000 դրամ, համակարգչային տեխնիկան` 600 000, իսկ ծրագրային մոդիֆիկացման ծառայությունը նախկինի պես գնահատվել է 7.5 մլն դրամ:

Ստացվում է, մեկ անգամ իր պարտավորությունը ժամանակին չկատարելու դիմաց մեր կառավարությունը հիմա ստիպված է ավելի թանկ վճարել: