Փաստ ինֆո

Ազգային ժողովի «Ժառանգություն» խմբակցության անդամ, Եվրոպայի խորհրդի Խորհրդարանական վեհաժողովում հայկական պատվիրակության անդամ, ԵԽԽՎ հավասարության և խտրականության դեմ պայքարի հանձնաժողովի և ԵԺԿ խմբակցության անդամ Զարուհի Փոստանջյանը ՌԴ-ում տեղի ունեցած ողբերգական ճանապարհատրանսպորտային պատահարի հետևանքով կալանավորված ՀՀ քաղաքացի Հրաչյա Հարությունյանի հարցով հուլիսի 29-ին դիմել է եվրոպացի պաշտոնատար անձանց: 

 

Պատգամավորը, մասնավորապես, խնդրել է «Ուշադրության կենտրոնում պահել Հ.Հարությունյանի խախտված իրավունքների վերաբերյալ դեպքը և պահանջել Ռուսաստանի Դաշնության իշխանություններից անհապաղ միջոցներ ձեռնարկել՝  պատասխանատվության կանչելու «Ռուսաստան 1ե «Լուրերե հաղորդաշարի լրագրող Օլգա Սկոբեևային և Մոսկվա քաղաքի քաղաքապետ Սերգեյ Սոբիանինովին` այլատյացության և ռասիզմի տարածման համար, իսկ իրավապահ մարմինների և բժշկական հաստատության ներկայացուցիչների նկատմամբ` անհապաղ քննություն սկսել` Հրաչյա Հարությունյանի պատիվը և արժանապատվությունը նվաստացնելու փաստովե:

 

​Եվրոպայի խորհրդի գլխավոր քարտուղար Թյորբորն Յագլանդին, ԵԽ նախարարների կոմիտեի նախագահ Էդվարդ Նալբանդյանին, ԵԽԽՎ մշտադիտարկման հանձնաժողովի նախագահ Անդրեաս Հերկելին, ՌԴ տարածքում մշտադիտարկում իրականացնող հանձնաժողովի  համազեկուցողներ Թեոդորա Բակոյանիսին, Անդրեաս Գրոսսին և հանձնաժողովի անդամներին, ԵԽԽՎ հավասարության և խտրականության դեմ պայքարի հանձնաժողովի նախագահ Թինա Ակետոֆին և հանձնաժողովի անդամներին, ԵԽԽՎ իրավական հարցերի և մարդու իրավունքների հանձնաժողովի նախագահ Քրիստոֆեր Չոպին և հանձնաժողովի անդամներին, ԵԽԽՎ մարդու իրավունքներ հանձնակատար Նիլս Մուզնիկսին, Ռասիզմի և անհանդուրժողականության դեմ եվրոպական հանձնաժողովի բյուրոյի ղեկավար Եվա Սմիթին և բյուրոյի անդամներին, ԵԽԽՎ ազգային պատվիրակությունների ղեկավարներին ուղղված նամակում, մասնավորապես, ասված է.

 

«Սույն նամակով տեղեկացնում եմ Ձեզ` 2013 թվականի հուլիսի 13-ին Ռուսաստանի Դաշնության Մոսկվա քաղաքի մոտ՝ Նոր Մոսկվա քաղաքում, տեղի ունեցած ողբերգական ճանապարհատրանսպորտային պատահարի հետևանքով կալանավորված Հայաստանի Հանրապետության քաղաքացի Հրաչյա Հարությունյանի ոտնահարված իրավունքների մասին:

 

Հրաչյա Հարությունյանի նկատմամբ տեղի ունեցող հետապնդումն ակնհայտ է դարձրել Ռուսատանի Դաշնությունում տեղ գտած և օրեցօր մեծացող ռասիզմը և այլատյացությունը:  Կասկածյալ Հրաչյա Հարությունյանը հիվանդանոցից դատարան է ներկայացվել կանացի հագուստով:

 

Ռուսաստանի Դաշնության պետական հեռուստաալիքի` «Ռուսաստան 1»,  «Լուրեր» հաղորդաշարով տեսանյութ է թողարկվել (տես` http://www.youtube.com/watch?v=J2c6qrfbp-w#at=21) որտեղ ազգությամբ հայ տղամարդու նկատմամբ, նվաստացուցիչ պայմաններում, ոչ միայն անցկացվել է  դատավարություն, այլև տեսանյութի հեղինակ` Օլգա Սկոբեևան նվաստացնող, վիրավորող, անմեղության կանխավարկածը խախտող մեկնաբանություններով է հանդես եկել՝ հատկապես շեշտադրում կատարելով տղամարդու ազգային պատկանելությանը: Բացի վերը նշվածից տեսանյութում Մոսկվայի քաղաքապետ` Սերգեյ Սոբիանինովը, հանդես է եկել հայտարարությամբ, որով սպառնացել է օտարերկրյա քաղաքացիների նկատմամբ խտրական մոտեցման քաղաքականություն կիրառել:  

 

2013 թվականի հուլիսի 13-ին տեղի ունեցած ողբերգական դեպքի հետևանքով զոհվել էր 18 մարդ, մի քանի տասնյակ մարդիկ ստացել էին տարբեր տեսակի վնասվածքներ: Հրաչյա Հարությունյանը, ով եղել է մասնավոր ընկերությանը պատկանող անսարք Կամազ բեռնատար ավտոմեքենայի վարորդը, նույնպես ստացել էր տարբեր մարմնական վնասվածքներ, առանց անհրաժեշտ բժշկական օգնություն ստանալու, նա տեղափոխվել էր դատարան և անմիջապես կալանավորվել: Այս պահին նա գտնվում է Մոսկվայի «Մատրոսկայի տիշինա» մեկուսարանի հիվանդանոցային բաժնում:

 

Նման ողբերգական իրադարձություն հնարավոր է տեղի չունենար, եթե Ռուսաստանի Դաշնությունը, լինելով Եվրոպայի Խորհրդի անդամ, չլիներ ամենակոռումպացված երկրներից մեկը: 

 

Բոլորիս հայտնի է Ռուսաստանի Դաշնությունում տիրող համատարած կոռուպցիան, հայտնի են արդարդատության համակարգի արատները, բայց, երբ այս ամենին գումարվում է ռասիզմը և այլատյացությունը, ակհայտ վտանգվում է ոչ միայն իրավունքի գերակայությունը, այլ նաև բազմազգ Ռուսաստանի Դաշնությունում այլ ազգի ներկայացուցիչների  կյանքի և արժանապատվության իրավունքը: 

 

Հիմք ընդունելով վերոգրյալը՝ խնդրում եմ` ուշադրության կենտրոնում պահել Հայաստանի Հանրապետության քաղաքացի Հրաչյա Հարությունյանի խախտված իրավունքների վերաբերյալ դեպքը և պահանջել Ռուսաստանի Դաշնության իշխանություններից անհապաղ միջոցներ ձեռնարկել՝ պատասխանատվության կանչելու «Ռուսաստան 1» և «Լուրեր» հաղորդաշարի լրագրող Օլգա Սկոբեևային և Մոսկվա քաղաքի քաղաքապետ Սերգեյ Սոբիանինովին` այլատյացության և ռասիզմի տարածման համար, իսկ իրավապահ մարմինների և բժշկական հաստատության ներկայացուցիչների նկատմամբ անհապաղ քննություն սկսել` Հրաչյա Հարությունյանի պատիվը և արժանապատվություն նվաստացնելու փաստով»: