Փաստ ինֆո

Երևանի քաղաքապետարանի մոտ այս պահին շարունակվում է երիտասարդ ակտիվիստների երեկ երեկոյան սկսված նստացույցը:

Միաժամանակ ակցիայի մասնակիցները մայրաքաղաքի փողոցներում օրվա ընթացքում պաստառներ են փակցնելու և թռուցիկներ տարածելու՝քաղաքապետարանի տրանսպորտի վարչության պետ Հենրիկ Նավասարդյանի և «Երևանտրանս»-ի տնօրիեն Միսակ Համբարձումյանի պաշտոնանկության պահանջով: 

Ակցիայի կազմակերպիչները նաև հայտարարում են, որ այսօր 15:00-ին Մաշտոցի պուրակում ակցիայի մասնակիցների համար «Ինչպես վարվել ոստիկանության հետ» թեմայով դասընթաց են անցկացնելու, որի նպատակն է խուսափել  իրավապահների հետ հնարավոր բախումներից:

Նշենք, որ մինչ այդ, այսօր առավոտյան արդեն նմանատիպ մեկ այլ դասընթաց էլ կազմակերպվել էր քաղաքապետարանի դիմաց հավաքվածների համար:

Նստացույցի մասնակիցներին կոչ էր արվում տարածքը պահել մաքուր, աղբը թափել միմիայն հատկացված տեղերում, չտրվել սադրանքների, լինել զուսպ, կարգապահ, ժպտալ և հարգալից լինել միմյանց ու բոլորի հանդեպ, բանավեճերի, խոսակցությունների չբռնվել ոստիկանության ներկայացուցիչների հետ, չվիճել, չկոպտել, խոսել հարգալից, դիմելով՝ «պարոն ոստիկան» արտահայտությամբ: Միաժամանակ, նստացույցի մասնակիցներին արգելվում է օգտագործել ոգելից խմիչքներ, թմրանյութերեր, բայց թույլատրվում է ծխել:

Ի դեպ, «Չենք վճարելու 150 դրամ» շարժման ակտիվիստները հայտարարում են, որ նստացույցը շարունակելու են նաև այսօր ողջ օրվա ընթացքում և առաջիկա գիշերը: 

Իսկ 20:00-ին նախանշված է հավաք, որի ընթացքում որոշվելու են հետագա անելիքները: Իսկ քննարկումները կանցնեն  քաղաքապետարանի դիմաց, թե Մաշտոցի պուրակում, կորոշվի 20:00-ին Մաշտոցի պուրակում նախանշված հավաքի ընթացքում:

Նշենք, որ ակցիան հստակ կազմակերպիչներ չունի և բոլոր որոշուները կայացվում են համատեղ հավաքների և քննարկումների արդյունքում: