Փաստ ինֆո

Մինչ հասարակությունը սպասում էր քաղաքապետի` այսօր առավոտից խոստացված հայտարարությանը, քաղաքապետարանը քիչ առաջ տեղեկատվություն տարածեց առավոտյան քաղաքապետի մոտ կայացած խորհրդակցության մասին:

Հաղորդագրության  մեջ նշված է, որ քաղաքապետի և Երևանի ավագանու խմբակցությունների անդամների հանդիպման  ժամանակ քննարկվել են մայրաքաղաքի տրանսպորտային ոլորտի հետ կապված հարցեր:

Անդրադառնալով ուղևորափոխադրումների վարձը վերանայելու հարցին՝  Տարոն Մարգարյանն ասել է. «Եթե մենք ուզում ենք քաղաքակիրթ տրանսպորտային համակարգ ունենալ, ապա 100 դրամով դա անհնար է ապահովել: Այս կերպ մենք չենք կարողանա թարմացնել շարժակազմը և ապահովել բոլոր այն պահանջները, որոնք այս տարիների ընթացքում եղել են մեր բնակիչների կողմից տրանսպորտի ոլորտի կանոնակարգման և զարգացման հարցում:  Այս սակագնով դրան հասնելը անհնար էր»:

Տարոն Մարգարյանը նաև նշել է, որ միաժամանակ պետք է խիստ վերահսկողություն իրականացվի սպասարկման բարձր որակի ապահովման, մասնավորապես երթուղիների սահմանված չվացուցակների պահպանման, երեկոյան ու առավոտյան ժամերին անհրաժեշտ մեքենաքանակի ապահովման ուղղությամբ: Ըստ քաղաքապետի, կբացառվի նաև միկրոավտոբուսներով սահմանված նստատեղերից ավելի անձանց տեղափոխումը: 

Իսկ ինչ վերաբերում է խմբակցությունների անդամների բարձրացրած այն հարցին ու մտահոգություններին, թե քաղաքացիներից շատերը 150 դրամ ուղեվարձ ուղղակի ի վիճակի չեն վճարել, քաղաքապետը պատասխանել է, թե առաջիկայում կստեղծվի հասարակական կազմակերպություններից ու շահագրգիռ անձանցից կազմված հանձնաժողով, որը համակողմանիորեն կուսումնասիրի և մեխանիզմներ կառաջարկի որոշումն առավել ամբողջական և օպտիմալ դարձնելու համար. «Հիմնական շեշտը մենք դնելու ենք վճարման միասնական համակարգի ներդրման վրա, որը սոցիալապես խոցելի խմբերին կառաջարկի տարբերակներ: Այս կերպ մենք կբարձրացնենք նաև ուղևորափոխադրումներ իրականացնող ընկերությունների սոցիալական պատասխանատվությունը»,- ընդգծել է Տարոն Մարգարյանը: 

Քաղաքապետարանի պաշտոնական տեղեկատվությունն այսքանով սահմանափակվում է, ըստ էության, որեւէ նոր բան չասելով ուղեվարձի 50 տոկոսանոց թանկացման դեմ բողոքող երևանցիներին, մինչդեռ քաղաքապետի տեղակալ Կամո Արեյանն  այսօր կառավարության ղեկավարին խոստացել էր, թե քաղաքապետարանում ընթացող քննարկումների ավարտին Տարոն Մարգարյանն անձամբ է հանդես գալու հայտարարությամբ:

Հիշեցնենք, որ տրանսպորտի ուղեվարձի թանկացումից հետո Տարոն Մարգարյանն առ այսօր հրապարակավ այս հարցի շուրջ պարզաբանում  չէր ներկայացրել:

Նշենք, նաեւ, որ այսօր առավոտյան  կառավարության նիստում վարչապետ Տիգրան Սարգսյանն անդրադառնալով հիշյալ խնդրին հայտարարել էր, թե սոցաիալական կարևոր նշանակություն ունեցող որոշումներն այսուհետ կկայացվեն հանրային քննարկումների արդյունքում: «Կարծում եմ, որ տրանսպորտի սակագնի փոփոխությունը հենց այդ ոլորտին վերաբերող խնդիր է, և մենք պարտավոր ենք այսուհետև այդ որոշումները կայացնելուց առաջ կազմակերպել հրապարակային, հանրային քննարկումներ և դեբատներ»,- ասել էր վարչապետը: