Փաստ ինֆո

Ինչպես քիչ առաջ կառավարության նիստում հայտարարեց փոխքաղաքապետ Կամո Արեյանը, Երևանի քաղաքապետն այս պահին հանդիպում է Երևանի ավագանու խմբակցությունների  հետ՝ քննարկելու տրանսպորտի ուղեվարձի թանկացմա հետ կապված հարցերը:

Քննարկումների ավարտին, ըստ Կամո Արեյանի, քաղաքապետը հանդես է գալու հրապարակային հայտարարությամբ:

Այսօր կառավարության նիստի մեկնարկին, վարչապետ Տիգրան Սարգսյանն անդրադարձավ ուղեվարձի թանկացման հարցին և դրա շուրջ քաղաքացիների բողոքի ակցիաներին:

Վարչապետը մասնավորապես նշեց, որ բողոքը բացառապես ինքնաբուխ է, սոցիալական, չունի քաղաքական ուղղվածություն, թեև, որոշ քաղաքական ուժեր փորձ են անում այն քաղաքականացնել:

Վարչապետը նաև կարևորեց, որպեսզի սոցաիալական կարևոր նշանակություն ունեցող որոշումներն այսուհետ կայացվեն հանրային քննարկումների արդյունքում: «Կարծում եմ, որ տրանսպորտի սակագնի փոփոխությունը հենց այդ ոլորտին վերաբերող խնդիր է, և մենք պարտավոր ենք այսուհետև այդ որոշումները կայացնելուց առաջ կազմակերպել հրապարակային, հանրային քննարկումներ և դեբատներ»,- ասաց վարչապետը:

Ի դեպ, նշենք, որ այսօր կառավարությունը նաև գաղտնի ռեժիմով լսելու է փոխքաղաքապետի զեկուցումը: Նախապես  կառավարության կայքում տեղադրված նիստի օրակարգում որպես զեկուցող գրված էր քաղաքապետ Տարոն Մարգարյանի անունը, սակայն  այսօր առավոտյան այն փոխարինվեց փոխքաղաքապետ Կամո Արեյանի անունով:

Նշենք, որ Տարոն Մարգարյան  այսօր կառավարության նիստին չի մասնակցում: 

Կառավարության նիստն այս պահին ուղեկցվում է ուղեվարձի դեմ բողոքի 5-րդ օրը շարունակվող ակցիայով:

Հեղինակ` Նելլի Դանիելյան