Փաստ ինֆո

«Ֆորմուլա-1»-ը ղեկավարող ընկերությունը ֆինանսական բարդ սխեմա է օգտագործում, որի շնորհիվ նկատելիորեն կրճատում է հարկային վճարումները: 

Independent-ի տեղեկություններով, արքայական ավտոարշավի ղեկավարությունը 2011 թվականին, ունենալով ընդհանուր առմամբ 1,5 մլրդ դոլարի շահույթ, միայն 1,5 միլիոն է փոխանցել բրիտանական բյուջե: Ընդ որում, ընկերության եկամուտը հասնում է մի քանի հարյուր միլիոնի: Մանավորապես, անցյալ տարի կազմել է 465 մլն դոլար: «Ֆորմուլա-1»-ը դրան հասել է վարկերի հաշվին, որոնք վերցնում է իր իսկ կազմում գտնվող օֆշորային ընկերություններից: Բրիտանական հարկային և մաքսային ծառայությունների հետ համաձայնագրով, որն ուժի մեջ է մինչև 2017 թվականը, այդ վարկերի համար վճարվող տոկոսները կրճատում են ընկերության հարկային պարտականությունները: 2011-ին «Ֆորմուլա-1»-ը իր իսկ ընկերություններից փոխառել է 3,9 մլրդ դոլար: Այդ սխեմայի մանրամասները բացահայտվել են «Ֆորմուլա-1»-ի բորսա դուրս գալու կապակցությամբ:

Independent-ը հայտնում է նաև, որ «Ֆորմուլա-1»-ին առնչվող ընկերությունները, ներառյալ բուն «Ֆորմուլա-1»-ը, 8 թիմեր և շարժիչներ մատակարարող երկու ընկերություններ, 2011-ին վճարել են 2,9 մլն դոլարի հարկ: Մինչդեռ, նրանց ընդհանուր եկամուտը կազմել է 3,2 մլրդ դոլար: Բայց պարզվել է, որ «Ֆորմուլա-1»-ի մաս կազմող 12 ընկերություններից հարկ են վճարել միայն երկուսը:

Հարկ է նկատել, որ Մեծ Բրիտանիայում ընկերությունների եկամտահարկի ստանդարտ դրույքը 24 տոկոս է, սակայն «Ֆորմուլա-1»-ի թիմերը սովորաբար խուսափում են վճարումներից, քանի որ ամբողջ գումարը ծախսում են բոլիդների զարգացման վրա: