Փաստ ինֆո

Այսօր առավոտից քաղաքապետարանի հարակից տարածքում մեկնարկել է ուղեվարձի թանկացման դեմ բողոքի ակցիան:

Թեև Ոստիկանությունը փորձում էր ակցիայի մասնակիցներին թույլ չտալ մոտենալ քաղաքապետարանի շենքին՝ փակելով քաղաքապետարան տանող ճանապարհները, սակայն, բողոքի ակցիայի մասնակիցներին, այնուամենայնիվ, հաջողվել է ճեղքել ոստիկանների կազմած շղթան և մոտենալ շենքին:

Ցուցարարները «100 դրամ», «ուղեվարձը 100 դրամ», «Չենք վճարելու 150 դրամ» գրություններով ցուցանակներ են վեր պարզել:

Երևան քաղաքի վարչության պետի ծառայության գծով տեղակալ Վալերի Օսիպյանը բողոքի ակցիան լուսաբանող լրագրողների հարցերին ի պատասխան հայտարարել է, որ ցուցարարները խախտում են հասարակական կարգը և երթևեկության կանոնները և խոստացել է, որ ամենաակտիվները բերման կենթարկվեն ոստիկանություն: Գնդապետ Օսիպյանը նաև իբրև օրինակ ամենաակտիվներից մեկի՝ Արեգ Գևորգյանի անունն է նշել:

Ոստիկանության Երևան քաղաքի ծառայության բաժնի պետ Կարեն Մովսիսյանն էլ հաստատել է տեղեկությունները, որ երեկ երեկոյան Ոստիկանության Կենտրոնի բաժին բերման են ենթարկվել կանգառներում բողոքի ակցիաների կազմակերպիչներից երեքին: 

Այս հարցի շուրջ Վալերի Օսիպյանը հայտարարել է, որ նրանց վերաբերյալ նյութեր են նախապատրաստվում, քանի որ,  նրա խոսքով, բերման ենթարկվածները ոտքերով հարվածել էին ոստիկաններին:

Հեղինակ` Նելլի Դանիելյան