Փաստ ինֆո

Խնդիրը ոչ թե նրանում է, որ տրանսպորտի գինն է բարձր, այլ մեր աշխատավարձերն են ցածր: Այսօր լրագրողների հետ հանդիպմանը  նման կարծիք հայտնեց «Սոցիոմետր» սոցիոլոգիական  կենտրոնի տնօրեն Ահարոն Ադիբեկյանը՝ հավելելով, որ գնաճը շարունակվելու է և եթե Հայաստանը բենզինը, նավթը, գազը ձեռք է բերում միջազգային գներով, ապա տրանսպորտի ինքնարժեքն էլ պետք է լինի միջազգային գներին համապատասխան:

Երևանում միկրոավտոբուսներից օգտվում են բնակչության 45 տոկոսը, 20 տոկոսը քաղաքային ավտոբուսներից, 8 տոկոսը մետրոյից, 2 տոկոսը տրոլեյբուսից, սեփական մեքենաներով և տաքսիներով  երթևեկողների թիվն էլ կազմում է 12,5-ական  տոկոս և ընդամենը 1 տոկոսն օգտվում է ծառայողական մեքենաներից:

Ստացվում է, որ տրանսպորտի թանկացումը մեծապես ազդելու է Երևանի բնակչության 65 տոկոսի վրա, այսինքն՝միկրոավտոբուսներից և քաղաքային ավտոբուսներից օգտվողների վրա:

Լուծումները տարբեր են,- նշում է Ադիբեկյանը  ու հավելում, որ կանայք ևս պետք է պայքարեն, որպեսզի բարձրացնեն իրենց աշխատավարձերը,քանի որ նրանք ևս մտնում են խոցելի խմբերի մեջ։ Ըստ նրա,  նույն աշխատանքի համար կանայք ավելի քիչ են վաստակում:

«Սոցիոմետր» սոցիոլոգիական  կենտրոնի տնօրենն առաջարկում է ինչպես ամբողջ աշխարհում, այնպես էլ  Հայաստանում ներդնել ճկուն գնային համակարգ` առավոտյան լինի 100 դրամ, կեսօրից հետո 150, իսկ երեկոյան ժամերին էլ 200 դրամ: