Փաստ ինֆո

Հասարակական տրանսպորտի  ուղեվարձը  150 դրամ դարձնելու Երևանի քաղաքապետարանի որոշումը  հիմնավորված չէ  և  անօրինական: «Իրազեկ և պաշտպանված սպառող» ՀԿ  ներկայացուցիչ Բաբկեն Պիպոյանը   խորին համոզմունք հայտնեց, որ այսօր քաղաքապետարանը չի կարող ապահովել տրանսպորտով երթևեկելու  արժանավայել պայմաններ, որպեսզի բոլոր ուղևորները  երթևեկեն նստած, ուստի  «քանի դեռ տեղափոխվում ենք վատ պայմաններում,  սահմանված 100 դրամը նորմալ է»: 

ՀԿ ներկայացուցիչը  նշեց նաև, որ որոշ քաղաքացիներ արդեն հայտարարել են վարչական դատարան դիմելու մտադրության մասին: Նա  պատրաստակամություն հայտնեց հարցը  դատարանում վիճարկող քաղաքացիներին  տրամադրել «Իրազեկ և պաշտպանված սպառող»  ՀԿ-ի  կողմից կատարված հաշվարկները,  ըստ որոնց  100 դրամ ուղեվարձի դեպքում էլ երթուղայիների սեփականատերերը գերշահույթ են ստանում:   «Մենք ոչ թե գործատուներ ենք ունեցել,  այլ առաքյալներ, ովքեր  այսօր փորձում են  տպավորություն ստեղծել, որ մեր փոխարեն իրենք են վճարել»,- նշեց ՀԿ ներկայացուցիչը: Նա  կոչ արեց հանրային ճնշում  գործադրել և անպայման դիմել Վարչական դատարան: 

«Հասարակական տրանսպորտը 100 դրամ» հասարակական նախաձեռնության հիմնադիր անդամ Լուսինե Մնացականյանն իր հերթին խնդիրը լուծելու սեփական տարբերակը առաջարկեց՝ կոչ անելով պարզապես չվճարել 150 դրամ: Հասարակական նախաձեռնության հիմնադիր անդամն  այսօր առավոտյան արդեն իսկ փորձարկել է  տրանսպորտի թանկացման դեմ պայքարի իր միջոցը՝  երթևեկել է տրանսպորտով և վճարել 100 դրամ, իսկ ավելացված 50 դրամի փոխարեն տվել է թղթի մի կտոր՝  «50 դրամ» գրառմամբ:

Ակտիվիստը այդ կտրոններից բաժանել է նաև   տրանսպորտում գտնված ուղևորներին և կոչ արել, որ շարունակեն վճարել 100 դրամը և վարորդին փոխանցեն այդ կտրոնը:  «Մեր վարորդները շատ կիրթ և հասկացող մարդիկ են,  և սա իրենց դեմ ուղղված չի, իսկ այդ թղթի կտորները նրանք կտանեն,  կտան իրենց գործատերերին և կասեն, որ ժողովուրդը հրաժարվում է վճարել այդ 50 դրամները»,- նշեց  «Հասարակական տրանսպորտը 100 դրամ» հասարակական նախաձեռնության հիմնադիրը: