Փաստ ինֆո

Ակնհայտ է, որ Ռուսաստանը քաղաքականացնում է  մերձմոսկվայում ավտովթարի խնդիրը և միամտություն է  այդ պարագայում օբյեկտիվ դատավարություն ակնկալելը: Լրագրողների հետ այսօրվա հանդիպմանն այս մասին նշեց  Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը:   Ըստ քաղաքագետի, ռուսաստանյան լրատվամիջոցներում անընդհատ թմբկահարվող «водитель – армянинսн»-ը   սխալ արտահայտություն է  և տրամադրում է մեր դեմ»:  Ստեփան Գրիգորյանը  հավելեց, որ անթույլատրելի  է ռուսական բոլոր ալիքներով այդ դեպքն այդքան ուռճացնելը: Ըստ նրա, շատ կարևոր է,  որ մինչև դատավարությունը  հայազգի վարորդ Հրաչյա Հարությունյանի Հայաստան վերադառնալու  հարցը բարձրացվի: Գործի արդար քննության համար կարևոր է նաև պարզել, թե  ուղևորատար ավտոբուսի վարորդը խմած եղել է, թե ոչ: Ըստ Ս.Գրիգորյանի,  տեսանյութից պարզ երևում է, որ վարորդը  ոչ մի կերպ չի արձագանքում:

ՀՀ փաստաբանների պալատի անդամ, փաստաբան Ռուբեն Բալոյանն էլ իր հերթին ընդգծեց, որ Հ.Հարությունյանը  հայտնվել է բավական ծանր կացության մեջ, իսկ ցուցադրված տեսանյութից   պարզ երևում է, որ արգելակման խափանումը եղել է մինչև շրջադարձը և  եթե տրանսպորտային միջոցները  ճակատ ճակատի   բախվեին,  ապա զոհերի թիվը շատ ավելի շատ կլիներ: Ըստ փաստաբանի, հայ վարորդը  վտանգելով իր կյանքը,  ճիշտ է կողմնորոշվել: 

Մեկնաբանելով ավտովթարի պատճառների վերաբերյալ շրջանառվող վարկածներից մեկն առ այն, որ Հ. Հարությունյանի վարած տրանսպորտային միջոցը անսարք վիճակում է եղել, փաստաբանը նկատեց, որ   այդ դեպքում պետք է պատասխանատվության ենթարկվի նաև տվյալ տրանսպորտային միջոցի շահագործումը թույլ տված  պատասխանատու անձը: 

Ռուբեն Բալոյանը նկատեց նաև, որ   ավտովթարների գործերով առհասարակ անձին կալանավորում են այն դեպքում, երբ ապացուցվում է, որ նա մեղավոր  է՝ հակառակ դեպքում դա կարելի է գնահատել որպես անմեղության կանխավարկածի սկզբունքի խախտում: Այս պահի դրությամբ, ըստ փաստաբանի,  Հրաչյա Հարությունյանի մեղքը ապացուցված չէ: Պետք է կատարվեին  դատաավտոտեխնիկական և այլ համալիր փորձաքննություններ  և երբ դրանց  եզրակացությունների հիման վրա  պարզվեր,  որ Հ.Հարությունյանը կարող էր հայտնաբերել  նշված անսարքությունը և որևէ միջոցներ չի ձեռնարկել այդ ուղղությամբ, ապա այդ դեպքում «համաձայն կլինեի, որ նրա մեղքը առկա է»,- ասաց փաստաբանը: Նա   նաև համոզմունք հայտնեց,  որ դատապարտվելուց հետո Հրաչյա Հարությունյանին կարտահանձնեն Հայաստանին՝  հետագա պատիժն այստեղ կրելու համար: