Փաստ ինֆո

«Ժամանակ»-ի զրուցակիցն է Շիրակի մարզի ոստիկանապետ Կարեն Բաբակեխյանը: Թղթակիցը հարցեր է ուղղել Կ.Բաբակեխյանին` մասնավորապես կապված նախօրեին Վ.Ղուկասյանի դեմ հարուցված քրեական գործին և դատարանի շենքում Ս.Հարությունյանին ծեծի ենթարկելուն:

Ինչպես հիշեցնում է թերթը, Շիրակի մարզի ոստիկանությունում հարուցվել է քրեական գործ` Կ.Եսայանի սպանության գործով դատական նիստի ժամանակ հնչած վիրավորանքների կապակցությամբ: Սակայն  գործ չի հարուցվել դատարանի նախասրահում տեղի ունեցած միջադեպի առթիվ: Այդ միջադեպի արդյունքում ամբաստանյալի հայրը` Սամվել Հարությունյանը, նախաինֆարկտային վիճակով տեղափոխվել էր հիվանդանոց: Բժիշկների ախտորոշմամբ` Ս.Հարությունյանի մոտ եղել է հիպերտոնիկ կրիզ, նախաինֆարկտային վիճակ և աջ ազդրի սալջարդ:

Ըստ մամուլում տեղ գտած հրապարակումների` նրան հարվածել են Վ.Ղուկասյանի կողմնակիցները:

Թղթակցի հարցին, թե ինչու քրեական գործ չի հարուցվել միջադեպի կապակցությամբ, Բաբակեխյանը պատասխանել է, որ պատճառը տուժողի կողմից հայտարարություն չտալն է, ով, ըստ ոստիկանապետի, հրաժարվում է հայտարարություն տալ` հենվելով իր առողջական վիճակի վրա:

Կ.Բաբակեխյանը նաև նշել է. «Հուսով ենք` հետագայում կտա, պիտի որ տա: Ի վերջո մարդը հիվանդանոց է գնացել, պիտի ինչ-որ կերպ բացատրի, թե ինչու է հիվանդանոց գնացել, կամ, ի վերջո, ով է իրեն ծեծել: Ինքը հայտատարել է հիվանդանոց մտնելիս, որ իրեն ծեծի են ենթարկել»:

Իսկ թղթակցի այն դիտարկմանը, որ մամուլի հրապարակումները  հիմք են` քրեական գործ հարուցելու համար, այնտեղ են եղել լրագրողներ, Կ.Բաբակեխյանն ասել է. «Ի՞նչ են գրել միջադեպի մասին: Ես բավական մեծ քանակությամբ մարդ եմ բերել էստեղ, ոչ մեկն ականատես չի եղել:

Կարո՞ղ եք բացատրել շահագրգռվածությունը քրեական գործ հարուցելու, կարող եք ինձ դա բացատրել, որ անպայման պետք է քրեական գործ հարուցվի: Եթե այսօր կան արդեն նյութեր, դա բավարարա հիմք չի հանդիսանում, պետք է անպայման հարուցվի քրեական գործ, հա՞»:

Հոդվածն ամբողջությամբ կարդացեք «Ժամանակ» օրաթերթի` 18.07.2013թ. համարում: