Փաստ ինֆո

 

ՀՀ փաստաբանների պալատի խորհրդի անդամ, փաստաբան Լուսինե Սահակյանի պաշտոնական գրությանը Շիրակի մարզի դատախազությունն անմիջապես ուղարկել է ոստիկանություն՝ օրենքով սահմանված կարգով  ընթացք տալու համար:  Այս մասին «Փաստինֆո»-ի թղթակցին հայտնեց ՀՀ գլխավոր դատախազի խորհրդական Սոնա Տռուզյանը: 

 

Հուլիսի 16-ին  Լ.Սահակյանը պաշտոնական գրությամբ դիմել էր Շիրակի մարզի դատախազին՝ հայտնելով, որ  Գյումրիի նախկին քաղաքապետ Վարդան Ղուկասյանի դստեր փեսացուի սպանության գործով նույն օրվա դատական նիստին որպես վկա հրավիրված Վ. Ղուկասյանը վիրավորական արտահայտություններ է արել, այդ թվում՝ ամբաստանյալ Հարություն Սարգսյանի պաշտպան Լ.Սահակյանի հասցեին: 

 

Դատախազի ցուցումով ոստիկանությունում նյութեր են նախապատրաստվում նաև   ամբաստանյալի հոր՝  Սամվել Սարգսյանի կողմից  բուժօգնություն ստանալու համար հիվանդանոց դիմելու ծանուցման հետ կապված:  Ս.Սարգսյանը հրաժարվել է հանցագործության մասին հաղորդում տալուց, սակայն, ինչպես նշեց Ս.Տռուզյանը, ոստիկանությունում նյութեր նախապատրաստվում են՝ հաշվի առնելով, որ հիվանդանոցից ստացվել է ահազանգ, ինչը պաշտոնապես գրանցվել է ոստիկանությունում։

 

Նշենք, որ սա այս գործի շրջանակում պաշտպանական կողմի նկատմամբ ճնշումների առաջին դեպքը չէ: Ապրիլի 5-ի դատական նիստի ժամանակ նույնպես Լուսինե Սահակյանի հասցեին հնչել էին սպառնալիքներ ու վիրավորական արտահայտություններ, ինչը դատարանի կողմից անարձագանք էր մնացել: Հիշյալ սպանության մեջ մեղադրվող Հարություն Սարգսյանի պաշտպան Լ.Սահակյանը «Փաստինֆո»-ի թղթակցին հայտնել էր, որ դատարանում նախկին քաղաքապետի կողմնակիցների կողմից իր պաշտպանյալի հարազատների ու ընկերների հասցեին սպառնալիքներ անընդհատ են հնչում, սակայն իր հասցեին դրանք հնչել են առաջին անգամ: Փաստաբանի կարծիքով՝ սպառնացող անձինք նպատակ ունեին դատարան հրավիրված վկայի՝ մտավոր հիվանդությամբ տառապող երեխայի վրա ճնշում գործադրել ու դատարանում գոռգոռոցներով ու սպառնալիքներով վախեցնել նրան: Երեխան մեղադրող կողմի համար առանցքային վկա է, ըստ գործի նյութերի, նա տեսել է, թե ինչպես է Հ.Սարգսյանը նստում Կարեն Եսայանի մեքենան:

 

ՀՀ փաստաբանների պալատի նախագահ Ռուբեն Սահակյանը դիմում էր ներկայացրել ՀՀ գլխավոր դատախազին՝ խնդրելով փաստաբանի հասցեին սպառնալիքների փաստով քրեական գործ հարուցել: Գլխավոր դատախազությունը  դիմումն ուղարկել էր  ոստիկանության Շիրակի մարզի քննչական բաժին՝ հանձնարարելով փաստի առթիվ նյութեր նախապատրաստել։ Արդյունքում քրեական գործ էր հարուցվել ՀՀ քրեական օրենսգրքի 347-րդ հոդվածի հատկանիշներով՝ Նախնական քննություն վարելու կամ արդարադատություն իրականացնելու հետ կապված սպառնալիքը կամ բռնի գործողությունները, իսկ  Լուսինե Սահակյանը ճանաչվել էր այդ գործով տուժող: