Փաստ ինֆո

 

25-ամյա Քրիստինե  Գալստյանը մեղադրվում է  2012 թվականի հունիսի 13-ին ժամը 10:00-ի սահմաններում, Վարդենիսի  անասնաբուժական, անասնաբուծական դեղորայքի առևտրի կետից  «Գարանտեքս» /կլերատ/ տեսակի մկնասպան պատրաստուկ  ձեռք բերելու և  նույն օրը ժամը 13:30-ի սահմաններում սեփական երեխաներին խմեցնելու մեջ: Մինչ այդ, նշված պատրաստուկից խմել է նաև ինքը՝ մայրը: 

 

Կենցաղային խնդիրների պատճառով   իր երկու անչափահաս որդիներ Նորիկ և Նարեկ  Ավետիսյանների սպանության և ինքնասպանության փորձը բարեբախտաբար դժբախտ վախճան  չի ունեցել՝ փրկել է  շրջապատի մարդկանց զգոնությունը: Քրիստինե Գալստյանը կատարածի մասին բջջային հեռախոսով հայտնել է իր հարսին՝ Թամարա Ջանոյանին, վերջինս էլ այդ մասին  հայտնել է բնակարանատեր Օֆելյա Սիմոնյանին, որտեղ մայրն ու որդիները հյուրընկալվել էին, բնակարանատերն էլ՝ կանչել է հարևանությամբ բնակվող Ռուզաննա Սարգսյանին և  բժշկական շտապ օգնության խումբ, որը  նրանց տեղափոխել է   «Վարդենիսի հիվանդանոց»  ՊՓԲԸ, այնուհետև Երևան` համապատասխան բուժում ստանալու նպատակով: Կատարվածի հետևանքով ընտանիքը  մկնդեղով սուր թունավորում է  ստացել և Նորիկ ու Նարեկ Արկադիի Ավետիսյանների, Քրիստինե Գալստյանի առողջությանը պատճառվել է միջին ծանրության վնաս` առողջության տևական քայքայումով:

 

Քրիստինե Գալստյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 2-րդ մասի 1-ին կետով՝  երկու կամ ավելի անձանց սպանության փորձ:

 

Առաջադրված մեղադրանքում Քրիստինե Գալստյանն իրեն լիովին մեղավոր է ճանաչել և ցուցմունք տվել, որ իր ամուսնու և սկեսրայրի համար է այդ քայլին գնացել, քանի որ նրանք իրեն միշտ ճնշել են: Ութ տարի ընդհանրապես չի իմացել, թե ամուսնական կյանքն ինչ բան է, վեճերն ու կռիվները եղել են ամեն ամիս, ամեն տարի՝  ֆինանսական հարցերի շուրջ: Չորս տարվա հարս է եղել և չի իմացել, թե ոսկեղենն ինչ բան է, այն բանկերում է եղել: 

 

Վեճեր և կռիվներ են եղել, երբ ցանկացել է գնալ հայրական տուն, անհեթեթ խանդի առիթ է հանդիսացել  որպես հարգված հարս  «իրենց հորաքրոջ ամուսնուն» համբուրելը՝   ասել են, ինչու է հարսը համբուրում հորաքրոջ ամուսնուն: Մասնավորապես, սկեսրայրն իրեն անբարոյականի պիտակ է կպցրել: Երբ կրտսեր որդին երկու տարեկան է եղել, այդ ժամանակ  էլ ինքը դեղահաբեր է խմել:  Մկնդեղ խմելու ու որդիներին խմեցնելու քայլին գնացել է «զանգերի և անբարո խոսքերի ճնշվածության պատճառով»: Ընդ որում սկզբից ինքն է խմել, 15 րոպե անց զանգահարել է ամուսինը, անբարո խոսքեր ասել իրեն, ինքն էլ մտածելով, որ եթե ինքը չլինի, թող իր երեխաներն էլ չլինեն,անգիտակցաբար խմեցրել է իր որդիներին: 

 

Ամբաստանյալ Քրիստինե Գալստյանի ինքնախոստովանական ցուցմունքից բացի մեղարդանքը  հիմնավորվել է գործով ձեռք բերված և հետազոտված այլ  ապացույցներով ևս:

Տուժողների օրինական ներկայացուցիչ, ամբաստանյալի ամուսին  Արկադի  Ավետիսյանը իր բացատրությունում նշել է, որ  2012 թվականի ապրիլի 29-ին ինքը մեկնել է ՌԴ` արտագնա աշխատանքի: Այդ ընթացքում ընտանիքը վարձով բնակվել է Արթիկ քաղաքում` նորմալ վիճակում: Մայիսի 30-ին գումար է ուղարկել, որ երեխաներին նորմալ պահի: 2012 թվականի հունիսի 3-ին կամ 4-ին, կոնկրետ չի հիշում, հայրը՝ Նորիկ Ավետիսյանը զանգահարել է իրեն և ասել, որ Քրիստինեն գնացել է իր մոր ծնունդը և խմած է տուն եկել: Դրանից հետո ինքը զանգահարել է Քրիստինեին, այդ հարցի շուրջ զրուցել կնոջ հետ, բայց վերջինս հրաժարվել է և պատճառաբանել, որ ինքը խմած չի եղել: Մոտ 2-3 օր անց նորից զանգել և ասել են, որ Քրիստինեն ընտանիքը վերցրել և գնացել է: Այնուհետև պարզել է, որ Քրիստինեն «Օդնոկլասսնիկի»  կայքի միջոցով կապի մեջ է եղել տարբեր մարդկանց հետ: Իսկ դրանից հետո զանգել է Քրիստինեին, բայց վերջինս միացնելով հեռախոսը, չի խոսել: Մտել է այդ սայթը և տեսել, որ ինչ-որ Գարիկ Մարտիրոսյանի հետ կապի մեջ է: 2012 թվականի հունիսի 10-ին վերադարձել է Հայաստան, մինչև հունիսի 13-ը չի կարողացել գտնել նրան և երեխաներին: Հունիսի 13-ին կամ հունիսի 14-ին մամուլից տեղեկացել է, որ Ակունք գյուղում ինքնասպան լինելու նպատակով մկնդեղ է խմել, ինչպես նաև նույն դեղից տվել է երեխաներին՝Նորիկին և Նարեկին` նրանց սպանելու համար, սակայն այդ մասին իմացել են և նրանց տեղափոխել հիվանդանոց: Ինքը Քրիստինեին չի սպառնացել և չի հայհոյել:

 

Տուժողների օրինական ներկայացուցչի կողմից ներկայացված համացանցի «Համադասարանցիներ»  սոցիալական կայքից արտատպված փաստաթղթերի զննության արձանագրության համաձայն, «Համադասարանցիներ» սոցիալական կայքի միջոցով Քրիստինե Գալստյանը սեռական և սեքսուալ բնույթի հաղորդագրություններ է ուղարկել և ստացել տարբեր անձնացից: 

 

Գործով վկա Օֆելյա Սիմոնյանը  ցուցմունք է  տվել այն մասին, որ Քրիստինե Գալստյանն իր ամուսնու ընկերոջ աղջիկն է, որն իրեն հյուր էր գնացել: Այդ իր հեռախոսին զանգ է եկել՝  ամբաստանյալի հարս  Թամարան իրեն ասել է, որ շուտ գնա Քրիստինեենց մոտ, քանի որ երեխաներին դեղ է խմեցրել և չթողնի, որ երեխաներին քնեցնի: Անմիջապես երեխաներին քնից արթնացրել է, հարևաններին ձայն է տվել և շտապ օգնություն են կանչել: Շտապ օգնության գալուց հետո իրենց տեղափոխել են հիվանդանոց, առաջին բուժօգնություն ցույց տալուց հետո տեղափոխել են Երևան: Դրանից հետո որևէ մեկի հետ ոչ մի կապ չի ունեցել: 

 

Ըստ վկա Ռուզաննա Սարգսյանի ցուցմունքի, 2012 թվականի հունիսի 13-ին գտնվել է իր տանը, երբ ժամը 13-ից 14-ի սահմաններում հարևանությամբ բնակվող Օֆելյան ձայն է տվել և իրեն շատ շտապ կանչել իրենց տուն` ասելով, որ Քրիստինեն ինչ-որ դեղ է տվել երեխաներին: Անմիջապես ինքը գնացել է նրանց տուն, տեսել է, որ երեխաները վատ են: Օֆելիային ասել է շտապ օգնություն զանգիր, հետո նաև Քրիստինեին է հարցրել, թե ինչ է տվել երեխաներին, սակայն, նա չի պատասխանել: Ամբաստանյալի  6-ամյա ավագ որդին  ցույց է տվել կողքի սենյակի հատակի տակ դրված դեղը և ասել, որ դրանից է իր մայրը տվել իրենց: Հանել և տեսել է, որ այն վարդագույն հատիկավոր դեղ է: Այդ ժամանակ արդեն շտապ օգնության աշխատակիցները հասել են, ինքն այդ դեղը տվել է նրանց և ասել, որ դրանից են խմել, որից հետո շտապ օգնությունով նրանց տեղափոխել են հիվանդանոց: 

 

Վկա Թամարա   Ջանոյանը   ցուցմունք է տվել առ այն, որ իր տալ Քրիստինե Գալստյանն դեպքից մեկ օր առաջ  զանգահարել է իրեն և նոր իմացել են իր տեղը: Դեպքի օրը Քրիստինեն հաղորդագրություն է ուղարկել իր հեռախոսահամարին և գրել, որ  «Թամ ջան,  մորս լավ կնայես, ես ձեզ սաղիտ շատ սիրում եմ, քուր ջան»: Հետ է զանգահարել, Քրիստինեն պատասխանել է, որ անձնական վիրավորանքի պատճառով երեխաներին դեղ է տվել: Անմիջապես հեռախոսն անջատել է և միանգամից զանգահարել է Օֆելյային և ասել, որ երեխաներին շուտ արթնացնի: Դրանից որոշ ժամանակ անց Օֆելիայից իմացել է, որ նրանց տեղափոխել են հիվանդանոց:

 

«Վարդենիսի հիվանդանոց» ՊՓԲԸ շտապօգնության բժիշկ Սուսաննա  Մակարյանի նախաքննական ցուցմունքի համաձայն, ինքը տեսել է հիվանդանոցի մանկական բաժանմունք տեղափոխված  երկու անչափահաս երեխաների՝ 6 և  3 տարեկան և նրանց մորը: Նրանց թունավորման փաստը ճշտելու ժամանակ երեխաների մայրն ասել է, որ ինքը երեխաներին մկնդեղ է խմեցերել և ինքն էլ է խմել: Այդ հանգամանքը հաստատել է նաև Ակունք գյուղի բնակչուհի Օֆելյա Սիմոնյանը, որի տանը հյուրընկալված են եղել նրանք: Բուժօգնություն ցուցաբերելու ժամանակ երեխաները հայտնել են, որ մկնդեղն իրենց մայրն է խմեցրել, ինչպես նաև նշել են, որ մայրն ավելի շատ է խմել: Այդ փաստը հաստատվել է նաև ստամոքսի լվացման պարունակության պատկերով: Ինքը հարցրել է Քրիստինեին, թե ինչի համար է մկնդեղ խմել և խմեցրել իր երեխաներին, սակայն վերջինս իր հարցին չի պատասխանել և սկսել է լաց լինել:

 

«Վարդենիսի հիվանդանոց»  ՊՓԲԸ-ի շտապ օգնության կայանի հերթապահ բուժքույր, վկա Ամալյա  Մարգարյանի ցուցմունքի համաձայն, 2012 թվականի հունիսի 13-ին հիվանդանոցում եղել է հերթապահության: Ժամը 13:00-ից 14:00-ի սահմաններում Գեղարքունիքի մարզի Ակունք գյուղից շտապօգնության կանչ է եղել, հայտնել են, որ տանը ընտանիքով թունավորվել են: Անմիջապես ավագ բուժքույր Ֆիոլետա Հովհաննիսյանի հետ մեկնել են դեպքի վայր Օֆելյա Սիմոնյանի բնակարան: Երբ հասել են այնտեղ վերջինս հայտնել է, որ մայրը և երկու երեխաները մկան դեղ են խմել: Անմիջապես մորը և երեխաներին տեղափոխել են Վարդենիսի հիվանդանոց, որտեղ գրեթե ողջ անձնակազմով բուժօգնություն են ցուցաբերել նրանց, որից հետո վերջիններս տեղափոխվել են Երևան՝  նեղ մասնագիտական բուժման համար: Հիվանդանոցում պարզվել է, որ մայրը Քրիստինե Գալստյանը և նրա երկու անչափահաս որդիները Նարեկ և Նորիկ Ավետիսյանները Ակունք գյուղում հյուր են եղել: Օֆելյա Սիմոնյանի տանը, այնտեղ եղած կանանցից մեկը, որին չի ճանաչում, իրեն տվել է պոլիէթիլենային տոպրակով փաթաթված վարդագույն հատիկներ և հայտնել, որ Քրիստինեն դրանից է խմել և խմեցրել իր երեխաներին: Ինքն այդ տոպրակով դեղը իր հետ բերել է հիվանդանոց և ներկայացրել ոստիկանության աշխատակիցներին: 

 

Տաքսու վարորդ  Շիրակ  Ղասաբյանը վկայել է, որ  անծանոթ  աղջկան և նրա երկու երեխաներին տարել է Վարդենիս, որտեղ հրապարակի շրջակայքից կոշիկ է գնել երեխայի համար, որից հետո այդ աղջիկն իրեն հարցրել է, թե որտեղից կարող է մկնդեղ գնել, ինքը նրան ցույց է տվել Վարդենիսի ավտոկայարանի մոտ գտնվող անասնաբուժական դեղատունը: Այդ աղջիկն իջել է իր ավտոմեքենայից, որից հետո ինքն էլ է իջել, մկնդեղ է գնել, որից հետո ինքը նրանց տարել է Ակունք:  

 

Ըստ փորձագետ Իշխան Գևորգյանի ցուցմունքի,  «Գարանտեքս» տեսակի նյութը հանրության համար վտանգավոր է: Եթե փարձաքննությամբ հիմնավորվել է, որ դա հանդիսանում է մկնդեղ, դա արդեն թույն է: Նույնիսկ դրա 0.1 գրամը մահացու է: Կյանքի և առողջության համար դա վտանգավոր է:

 

Ըստ ամբուլատոր դատահոգեբուժական և դատահոգեբանական համալիր փորձաքննության եզրակացության, Քրիստինե Գալստյանը որևէ հոգեկան հիվանդությամբ չի տառապել և չի տառապում, սակայն արարքը կատարելու պահին նա գտնվել է հոգեկան գործունեության ժամանակավոր հիվանդագին խանգարման մեջ`«Ռեակտիվ դեպրեսիվ խանգարում, սուիցիդալ փորձով», ինչն արտահայտված չի եղել այն աստիճանի, որ զրկեր Ք.Գալստյանին իր գործողությունների համար իրեն հաշիվ տալու և դրանք ղեկավարելու ընդունակությունից: Ուստի Քրիստինե Գալստյանին իրեն մեղսագրվող արարքի նկատմամբ հարկ է ճանաչել մեղսունակ:

 

Գեղարքունիքի մարզի ընդհանուր իրավասության առաջին ատյանի դատարանը՝դատավոր Վահագն Մելիքյանի նախագահությամբ, 2013 թվականի մայիսի 6-ի դատավճռով Քրիստինե  Գալստյանին մեղավոր  է  ճանաչել ՀՀ քրեական օրենսգրքի 34-104-րդ հոդվածի 2-րդ մասի 1-ին կետով և դատապարտել ազատազրկման 12  տարի ժամկետով:

 

Քրիստինե Գալստյանի նկատմամբ ստորագրություն չհեռանալու մասին ընտրված խափանման միջոցը փոփոխվել է, ընտրվել կալանավորումը, և ամբաստանյալը կալանքի է վերցվել դատական նիստի դահլիճում:

 

Ամբաստանյալ Քրիստինե  Գալստյանի նկատմամբ պատիժ նշանակելիս դատարանը հաշվի է առել, որ նա  անկեղծորեն զղջացել է, համատիրության կողմից դրականորեն է բնութագրվում,  նախկինում արատավորված չի եղել  և խնամքին մինչև 14 տարեկան երկու անչափահաս երեխա ունի` Նորիկ Ավետիսյան, ծնված` 20.10.2006 թվականին և Նարեկ  Ավետիսյան, ծնված` 20.10.2009 թվականին:

 

Ամբաստանյալը բողոքարկել է դատավճիռը՝ միջնորդելով վերանայել այն, նշանակել նոր պատժաչափ և պայմանականորեն այն չկիրառել: Վերաքննիչ բողոքը քննվում է ՀՀ Վերաքննիչ քրեական դատարանի դատավոր Մանուշակ  Պետրոսյանի նախագահությամբ: