Փաստ ինֆո

 

Երևանի  Էրեբունի և Նուբարաշեն վարչական շրջանների դատարանը՝ դատավոր Արտուշ Գաբրիելյանի նախագահությամբ, այսօր հետաձգեց ՀՀ արդարադատության նախարարության «Նուբարաշեն» ՔԿՀ-ի պետի օպերատիվ գծով տեղակալ Դավիթ Մուրադյանի դեմ գործով առաջին դատական նիստը: Ամբաստանյալ Դավիթ Մուրադյանը դատարանից ժամանակ խնդրեց  գործում նոր պաշտպան ներգրավելու համար. նա հրաժարվեց նախաքննության  ընթացքում իր շահերը պաշտպանած փաստաբանի ծառայություններից։ 

 

Դատարանը մինչև օգոստոսի 20-ը ժամանակ տրամադրեց  ամբաստանյալին պաշտպան ներգրավելու համար՝ այդ ընթացքում պաշտպանը հնարավորություն ու ժամանակ կունենա նաև ծանոթանալ գործի նյութերին: Տևական ընդմիջումը պայմանավորված է նաև առաջիկայում մեղադրող Վահագն Մուրադյանի հերթական արձակուրդում գտնվելու հանգամանքով:   

 

Հիշեցնենք, որ ըստ մեղադրանքի,  Դ. Մուրադյանը, 2011թ. դեկտեմբերի 1-ից մինչև 2013թ. փետրվարի 6-ը՝  աշխատելով որպես ՀՀ ԱՆ «Նուբարաշեն»  ՔԿՀ-ի պետի տեղակալ, օժտված լինելով քրեակատարողական հիմնարկի օպերատիվ և բժշկական սպասարկման բաժինները համակարգելու լիազորությամբ, 2012թ օգոստոսից մինչև դեկտեմբերն ընկած ժամանակահատվածում առանձնապես խոշոր չափերի կաշառք է պահանջել և ստացել նույն քրեակատարողական հիմնարկում պատիժը կրող Ա. Հակոբյանից:

 

Նախաքննության տվյալներով Դ. Մուրադյանը միջին ծանրության հանցագործություններ կատարելու համար 5 տարի 6 ամիս ժամկետով ազատազրկման դատապարտված Ա. Հակոբյանից պահանջել և, որպես կաշառք, վերջինից անձամբ և նրա կնոջ միջոցով ստացել է ընդհանուր առմամբ 1.631.320 ՀՀ դրամին համարժեք 4.000 ԱՄՆ դոլար, ինչպես նաև 540.000 ՀՀ դրամ արժողության կահույք: Ձեռք բերված ապացույցների համաձայն` Դ. Մուրադյանը կաշառքը պահանջել է դատապարտյալին առանց բավարար հիմքերի քրեակատարողական հիմնարկի բուժմաս ընդունելու և տևական ժամանակ այնտեղ պահելու, կնոջ հետ ոչ պլանային երկարատև և կարճատև տեսակցություններ տրամադրելուն նպաստելու, ինչպես նաև` պատժախցի վերանորոգումը թույլատրելու, այն կահավորելու և սահմանված կարգի խախտմամբ, բջջային հեռախոս պահելու ու դրանից օգտվելու թույլտվության համար:

 

Նախաքննությամբ պարզվել է նաև, որ 2012թ ընթացքում նույն դատապարտյալի պայմանական վաղաժամկետ ազատմանն իր լիազորությունների շրջանակում նպաստելու համար Դ. Մուրադյանը 2 անգամ կաշառք է պահանջել և ստացել, ապա վերադարձրել` չկարողանալով լուծել նրա պայմանական վաղաժամկետ ազատման հարցը:

ՀՀ հատուկ քննչական ծառայությունում իրականացված նախաքննությամբ ձեռք բերված ապացույցների հիման վրա Դ. Մուրադյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով՝ առանձնապես խոշոր չափերով կաշառք ստանալը: