Փաստ ինֆո

Երևանի Շենգավիթ վարչական շրջանի դատարանում՝ դատավոր Ալեքսանդր Ազարյանի նախագահությամբ, ավարտվել է  սոցիալական ոլորտի չարաշահումների վերաբերյալ հերթական գործով դատաքննությունը:

 

Իր մեղադրական ճառում ՀՀ  գլխավոր դատախազության պետական  շահերի պաշտպանության վարչության ավագ դատախազ   Հ.Ենոքյանը նշել է, որ 7 ամբաստանյալների վերաբերյալ այս գործի առանձնահատկությունը նաև այն է, որ պետական բյուջեից հատկացված կենսաթոշակների գումարների հափշտակության արդյունքում  խաթարվել է կենսաթոշակային ոլորտի պետական  կառավարման լիազոր մարմնի` ՀՀ աշխատանքի և սոցիալական հարցերի նախարարության սոցիալական ապահովության պետական ծառայության, բնականոն գործունեությունը: Ըստ մեղադրողի՝ խեղաթյուրվել են այդ ոլորտը կարգավորող  «Պետական կենսաթոշակների մասին» ՀՀ օրենքի և այն կանոնակարգող իրավական ակտերի պահանջները, բազմաթիվ տարեց, միայնակ և վատառողջ կենսաթոշակառուներ մինչ օրս չեն կարողացել ստանալ իրենց օրինական կենսաթոշակների գումարները:

 

Մեղադրող կողմը գտնում է, որ  քրեական գործի  նախաքննությամբ և դատաքննությամբ  հիմնավորվել է   մեղադրանքը: Ըստ այդմ,  Սոցիալական ապահովության պետական ծառայության աշխատակազմի վճարային ծառայության պետի՝ 2002թ. հուլիսի 1-ի հրամանով` մինչև 2010թ. դեկտեմբերի 30-ը  Երևան քաղաքի «Շենգավիթ-1» տարածքային ստորաբաժանման պատասխանատուի պաշտոնը զբաղեցրած  ամբաստանյալ Արմեն Գրիգորյանի հանձնարարությամբ տեսուչ-վճարողները պարզել են Հայաստանի Հանրապետությունից բացակայող կամ կենսաթոշակների վճարային ցուցակներից չհանված հանգուցյալ կենսաթոշակառուների տվյալները և, օգտվելով այդ հանգամանքներից, 2006-2010թթ. ընթացքում վճարային ցուցակներում կեղծելով այդ կենսաթոշակառուների ստորագրությունները` նրանց անվամբ անհիմն ելքագրել են իրենց վստահված կենսաթոշակի գումարները և Արմեն Գրիգորյանի հետ խմբով յուրացման եղանակով հափշտակել են առանձնապես խոշոր չափերի` ընդհանուր 4.841.529 դրամ կենսաթոշակի գումարներ:

 

Արմեն Գրիգորյանը, Էմիլ Մաճկալյանի հետ` խմբով, վերը նկարագրված եղանակով յուրացմամբ հափշտակել է անհիմն ելքագրված ընդհանուր` 2.821.397 ՀՀ դրամ կենսաթոշակի գումար, որից վերականգնել է Կարապետ և Սոնա Ջանբազյանների գումարից` 655.000 ՀՀ դրամը:   Արմեն Եղիազարյանի հետ խմբով,  վերը նկարագրված եղանակով, յուրացմամբ հափշտակել է անհիմն ելքագրված  ընդհանուր` 132.394 ՀՀ դրամ կենսաթոշակի գումար: Սամվել Հարությունյանի հետ խմբով,  վերը նկարագրված եղանակով յուրացմամբ հափշտակել է անհիմն ելքագրված  ընդհանուր` 257.814 ՀՀ դրամ կենսաթոշակի  գումար: Կարինե Պողոսյանի հետ խմբով,  վերը նկարագրված եղանակով յուրացմամբ հափշտակել է անհիմն ելքագրված  ընդհանուր` 807.866 ՀՀ դրամ կենսաթոշակի գումար: Աննա Նիկողոսյանի հետ խմբով,  վերը նկարագրված եղանակով յուրացմամբ հափշտակել է անհիմն ելքագրված  ընդհանուր` 822.058 ՀՀ դրամ կենսաթոշակի գումար:

 

Բացի Արմեն Գրիգորյանի հետ նախնական համաձայնությամբ յուրացման եղանակով կատարած հափշտակություններից, ամբաստանյալներ Էմիլ Մաճկալյանը, Արմեն Եղիազարյանը, Աննա Նիկողոսյանը, ինչպես նաև Կամո Պետրոսյանը 2006-2010թթ. ընթացքում իրավունք վերապահող և պաշտոնական փաստաթուղթ հանդիսացող վճարային ցուցակներում ընդգրկված կենսաթոշակառուների տվյալների դիմաց ստորագրությունները կեղծելով, յուրացման եղանակով կատարել են նաև այլ հափշտակություններ: Մասնավորապես,  Էմիլ Մաճկալյանը յուրացմամբ հափշտակել է խոշոր չափերով` ընդհանուր  1.147.456  ՀՀ դրամ կենսաթոշակի գումար, որից նախաքննության ընթացքում վերականգնել է 254.658 դրամը:  Աննա Նիկողոսյանը յուրացմամբ հափշտակել  է զգալի չափերի` ընդհանուր 65.214 ՀՀ դրամ կենսաթոշակի գումար, որը նախաքննության ընթացքում ամբողջությամբ վերականգնել է:   Կամո Պետրոսյանը յուրացմամբ հափշտակել  է առանձնապես խոշոր չափերով` ընդհանուր 4.386.022 ՀՀ դրամ կենսաթոշակի գումարներ, որից վերականգնվել է 2.020.000 և 41.750 դրամը:   Արմեն Եղիազարյանը յուրացմամբ հափշտակել  է խոշոր չափերով՝ ընդհանուր  1.026.480 ՀՀ դրամ կենսաթոշակի գումար, որն  ամբողջությամբ, ինչպես նաև Արմեն  Գրիգորյանի հետ խմբով հափշտակած 132.394 դրամը  նախաքննության ընթացքում վերականգնել է: Արմեն  Գրիգորյանը կամովին վերականգնել է հանցագործությամբ պատճառված վնասից 2.421.000 ՀՀ դրամ գումարը:

 

Դատարանում բոլոր ամբաստանյալներն իրենց մեղավոր  են ճանաչել առաջադրված մեղադրանքում, օգտվելով իրենց դատավարական իրավունքից՝ հրաժարվել դատարանում ցուցմունք տալուց և պնդել իրենց ինքնախոստովանական նախաքննական ցուցմունքները:

 

Մեղադրողը միջնորդել է ամբաստանյալ Արմեն  Գրիգորյանին մեղավոր ճանաչել ՀՀ քրեական օրենսգրքի 179-րդ հոդվածի 3-րդ մասի 1-ին կետով` առանձնապես խոշոր չափերով յուրացում  կատարելը, և նրա նկատմամբ  վերջնական պատիժ նշանակել ազատազրկում 6  տարի ժամկետով՝   1.909.135 դրամը չգերազանցող  գույքի բռնագրավմամբ,  որոշակի պաշտոններ զբաղեցնելու իրավունքից զրկելով 3  տարի ժամկետով: Կամո Պետրոսյանին մեղավոր ճանաչել ՀՀ քրեական օրենսգրքի 179-րդ հոդվածի 3-րդ մասի 1-ին կետով  և 325-րդ հոդվածի 1-ին մասով՝ փաստաթղթեր կեղծելը,  և նրա նկատմամբ վերջնական պատիժ նշանակել ազատազրկում՝ 5  տարի 6  ամիս ժամկետով, 1.794.272 դրամը չգերազանցող  գույքի բռնագրավմամբ,  որոշակի պաշտոններ զբաղեցնելու իրավունքից զրկելով 3 տարի ժամկետով:

 

Էմիլ  Մաճկալյանը, ըստ մեղադրողի, պետք է  մեղավոր ճանաչվի ՀՀ քրեական օրենսգրքի 179-րդ հոդվածի 2-րդ մասի 2-րդ, 3-րդ կետերով՝ մի խումբ անձնանց կողմից նախնական համաձայնությամբ խոշոր չափերի յուրացում կատարելը, և 325-րդ հոդվածի 1-ին մասով:   ՀՀ քրեական օրենսգրքի 179-րդ հոդվածի 2-րդ մասի 2-րդ և 3-րդ կետերով   նրա նկատմամբ սահմանել պատիժ` ազատազրկում՝ 3  տարի 6  ամիս ժամկետով, որոշակի պաշտոններ զբաղեցնելու իրավունքից զրկելով 2  տարի ժամկետով, ՀՀ քրեական օրենսգրքի 325-րդ հոդվածի 1-ին մասով Էմիլ Մաճկալյանի նկատմամբ սահմանել պատիժ` ազատազրկում 1 տարի ժամկետով: Միաժանակ, մեղադրողը միջնորդել է կիրառել «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ազգային ժողովի՝ 2011թ. մայիսի 26-ի որոշման 2-րդ մասի 4-րդ կետը. նրան ազատել ՀՀ քրեական օրենսգրքի 179-րդ հոդվածի 2-րդ մասի 2-րդ և 3-րդ կետերով և 325-րդ հոդվածի 1-ին մասով նշանակված պատժի կրումից:

 

Մեղադրողը միջնորդել է   ամբաստանյալ Արմեն  Եղիազարյանին մեղավոր ճանաչել ՀՀ քրեական օրենսգրքի 179-րդ հոդվածի 2-րդ մասի 2-րդ, 3-րդ կետերով և 325-րդ հոդվածի 1-ին մասով:  ՀՀ քրեական օրենսգրքի 179-րդ հոդվածի 2-րդ մասի 2-րդ և 3-րդ կետերով   նրա նկատմամբ սահմանել պատիժ` ազատազրկում՝ 3  տարի ժամկետով` որոշակի պաշտոններ զբաղեցնելու իրավունքից զրկելով 2  տարի ժամկետով, ՀՀ քրեական օրենսգրքի 325-րդ հոդվածի 1-ին մասով` ազատազրկում՝ 1  տարի ժամկետով: Միաժամանակ, մեղադրողը միջնորդել է կիրառել   «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ազգային ժողովի՝ 2011թ. մայիսի 26-ի որոշման 1-ին մասի 1-ին կետը. նրան ազատել ՀՀ քրեական օրենսգրքի 179-րդ հոդվածի 2-րդ մասի 2-րդ, 3-րդ կետերով և 325-րդ հոդվածի 1-ին մասով նշանակված պատժի կրումից:

 

Ամբաստանյալ Կարինե  Պողոսյանին մեղավոր ճանաչել ՀՀ քրեական օրենսգրքի 179-րդ հոդվածի 2-րդ մասի 2-րդ, 3-րդ կետերով և 325-րդ հոդվածի 1-ին մասով: ՀՀ քրեական օրենսգրքի 179-րդ հոդվածի 2-րդ մասի 2-րդ, 3-րդ կետերով  նրա նկատմամբ սահմանել պատիժ` ազատազրկում՝ 3  տարի 6  ամիս ժամկետով` որոշակի պաշտոններ զբաղեցնելու իրավունքից զրկելով 2  տարի ժամկետով, ՀՀ քրեական օրենսգրքի 325-րդ հոդվածի 1-ին մասով՝ ազատազրկում՝ 1  տարի ժամկետով:  Մեղադրողը միջնորդել է կիրառել «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ազգային ժողովի՝ 2011թ. մայիսի 26-ի որոշման 1-ին մասի 1-ին կետը. նրան ազատել ՀՀ քրեական օրենսգրքի 325-րդ հոդվածի 1-ին մասով նշանակված պատժի կրումից: Կարինե Պողոսյանի նկատմամբ վերջնական պատիժ նշանակել ազատազրկում՝ 3  տարի 6 ամիս ժամկետով, որոշակի պաշտոններ զբաղեցնելու իրավունքից զրկելով 2 տարի ժամկետով:

 

Ամբաստանյալ Սամվել  Հարությունյանին մեղավոր ճանաչել ՀՀ քրեական օրենսգրքի 179-րդ հոդվածի 2-րդ մասի 2-րդ կետով և 325-րդ հոդվածի 1-ին մասով:   ՀՀ քրեական օրենսգրքի 179-րդ հոդվածի 2-րդ մասի 2-րդ կետով  նրա նկատմամբ սահմանել պատիժ` ազատազրկում՝ 3   տարի 6   ամիս ժամկետով` որոշակի պաշտոններ զբաղեցնելու իրավունքից զրկելով 2  տարի ժամկետով, ՀՀ քրեական օրենսգրքի 325-րդ հոդվածի 1-ին մասով՝  ազատազրկում՝ 1  տարի ժամկետով: Կիրառելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ազգային ժողովի՝ 2011թ. մայիսի 26-ի որոշման 1-ին մասի 1-ին կետը` նրան ազատել ՀՀ քրեական օրենսգրքի 325-րդ հոդվածի 1-ին մասով նշանակված պատժի կրումից, Սամվել Հարությունյանի նկատմամբ վերջնական պատիժ նշանակել ազատազրկում՝ 3 տարի 6  ամիս ժամկետով` որոշակի պաշտոններ զբաղեցնելու իրավունքից զրկելով 2 տարի ժամկետով:

 

Ամբաստանյալ Աննա  Նիկողոսյանին մեղավոր ճանաչել ՀՀ քրեական օրենսգրքի 179-րդ հոդվածի 1-ին մասով, 179-րդ հոդվածի 2-րդ մասի 2-րդ, 3-րդ կետերով և 325-րդ հոդվածի 1-ին մասով: ՀՀ քրեական օրենսգրքի 179-րդ հոդվածի 1-ին մասով  նրա նկատմամբ սահմանել պատիժ` ազատազրկում՝ 1  տարի ժամկետով: Կիրառելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ազգային ժողովի 2011թ. մայիսի 26-ի որոշման 1-ին մասի 1-ին կետը. նրան ազատել ՀՀ քրեական օրենսգրքի 179-րդ հոդվածի 1-ին մասով  նշանակված պատժի կրումից:

 

ՀՀ քրեական օրենսգրքի 179-րդ հոդվածի 2-րդ մասի 2-րդ, 3-րդ կետերով  նրա նկատմամբ սահմանել պատիժ` ազատազրկում՝ 3 տարի 6 ամիս ժամկետով, որոշակի պաշտոններ զբաղեցնելու իրավունքից զրկելով 2 տարի ժամկետով, ՀՀ քրեական օրենսգրքի 325-րդ հոդվածի 1-ին մասով  Աննա Նիկողոսյանի նկատմամբ սահմանել պատիժ` ազատազրկում՝ 1 տարի ժամկետով: Կիրառելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ազգային ժողովի՝ 2011թ. մայիսի 26-ի որոշման 1-ին մասի 1-ին կետը. նրան ազատել ՀՀ քրեական օրենսգրքի 325-րդ հոդվածի 1-ին մասով նշանակված պատժի կրումից, Աննա Նիկողոսյանի նկատմամբ վերջնական պատիժ նշանակել ազատազրկում՝ 3  տարի 6 ամիս ժամկետով` որոշակի պաշտոններ զբաղեցնելու իրավունքից զրկելով 2  տարի ժամկետով, որպիսի պատիժը պետք է կրի ՀՀ ԱՆ համապատասխան քրեակատարողական հիմնարկում:

 

Մեղադրող Ենոքյանը պնդել է ՀՀ գլխավոր դատախազության  քաղաքացիական հայցը, որով խնդրել է  ամբաստանյալ Կամո Պետրոսյանի մասով բավարարել 1.794.272 դրամի չափով, ամբաստանյալ Էմիլ Մաճկալյանի մասով` 205.798 դրամի չափով, իսկ ամբաստանյալներ Արմեն Գրիգորյանի, Էմիլ Մաճկալյանի, Կարինե Պողոսյանի, Սամվել Հարությունյանի և Աննա Նիկողոսյանի մասով` համապարտության կարգով 1.909.135 (1.859.135) դրամի չափով գումար բռնագանձել: