Փաստ ինֆո

2013 թվականի մայիսի 13-ին նախաքննության մարմինը Իրանի Իսլամական Հանրապետության քաղաքացի  Ամին Հասանի Սադեղիին մեղադրանք է առաջադրել ՀՀ քրեական օրենսգրքի 215-րդ  հոդվածի 2-րդ մասով՝  թմրամիջոցների մաքսանենգություն,   և ՀՀ քրեական օրենսգրքի 268 հոդվածի 2-րդ մասի 2-րդ կետով՝  առանց իրացնելու նպատակի խոշոր չափերով թմրամիջոցների ապօրինի շրջանառություն:  

 

ԻԻՀ քաղաքացուն մեղադրանք է առաջադրվել առ այն, որ նա 2013 թվականի ապրիլ ամսին ԻԻՀ Զանջան մարզի Զանջան քաղաքում գործով չպարզված հանգամանքներում ձեռք է բերել խոշոր չափի 2.5 գրամ ափիոն տեսակի թմրամիջոց, որի մի մասը օգտագործել, իսկ մյուս մասը` հաստատուն, չոր մաքուր քաշով խոշոր չափի` 1.295 գրամը, փաթեթավորել է պոլիէթիլենային թաղանթով և պահելով իր սպորտային վերնազգեստի ներսի հատվածի աջ անկյունի դարձակարում, 2013 թվականի մայիսի 10-ին` ժամը 07:00-ի սահմաններում, իր անձնական գործածման նպատակով, առանց իրացնելու նպատակի, Իրանի Իսլամական Հանրապետությունից մաքսանենգությամբ` մաքսային հսկողությունից թաքցնելու եղանակով տեղափոխել է Հայաստանի Հանրապետություն: Այն վերջինիս անձնական զննությամբ հայտնաբերվել է ՀՀ ԿԱ ՊԵԿ Սյունիքի տարածաշրջանային մաքսատան Մեղրիի մաքսակետում նախաբացթողումային հսկողության վարչության ՄԴՊ և ԿՄՀՎ աշխատակիցների կողմից:

 

Մինչ դատաքննությունը սկսելն ամբաստանյալ Ամին Հասանի  Սադեղին միջնորդել է դատական քննությունն անցկացնել արագացված կարգով՝  հայտարարելով, որ համաձայն է մեղադրանքի հետ և առաջադրված մեղադրանքում իրեն մեղավոր է ճանաչում: Դատարանը բավարարել է միջնորդությունը:  

 

Սյունիքի մարզի ընդհանուր իրավասության դատարանը՝  դատավոր Ն. Օհանյանի նախագահությամբ,  19-06-2013թ. դատավճռով   Ամին Հասանի Սադեղիին մեղավոր է ճանաչել ՀՀ քրեական օրենսգրքի 215-րդ  հոդվածի 2-րդ մասով և ՀՀ քրեական օրենսգրքի 268-րդ հոդվածի 2-րդ մասի 2-րդ կետով նախատեսված հանցագործությունների կատարման մեջ:

 

Հանցանքների համակցությամբ նշանակված պատիժները մասնակիորեն գումարելու միջոցով,  վերջնական պատիժ է սահմանվել ազատազրկում 4  տարի 6  ամիս ժամկետով, գույքի` մաքսանենգության առարկայի` 1.245 գրամ «ափիոն» տեսակի թմրամիջոցի բռնագրավմամբ:

 

Դատավճիռն օրինական  ուժի մեջ մտնելուց հետո իրեղեն ապացույց ճանաչված և քրեական գործին կից պահվող 1.245 գրամ «ափիոն» տեսակի թմրամիջոցը կբռնագրավվի  և կոչնչացվի:

 

Պատիժ նշանակելիս դատարանը հաշվի է առել, որ ամբաստանյալը հանցագործությունների համար իրեն լիովին մեղավոր է  ճանաչել ու անկեղծորեն զղջացել (տվել է խոստովանական ցուցմունքներ):  Հաշվի է առնվել նաև այն, որ ամբաստանյալը դատապարտված չէ, ըստ իր հայտարարության,  ամուսնացած է, խնամքին են կինն ու 10 ամսական երեխան: