Փաստ ինֆո

Ուիմբլդոնյան մրցաշարը լուսաբանող բրիտանական BBC կորպորացիան խախտել է արքունական արարողակարգը՝ հինգշաբթի օրը ուղիղ եթերում հնչեցնելով արքայազն Չարլզի կնոջ դիտարկումը, թե ինքը չափազանց ծեր է թենիս խաղալու համար:

Կանոնակարգի համաձայն, լրագրողներին արգելվում է ձայնագրել և հեռարձակել արքայական ընտանիքի մասնավոր զրույցները: Անգլիական լրատվամիջոցների հաղորդմամբ, հեռուստադիտողները շոկ են ապրել՝ ուղիղ եթերում լսելով Կորնուոլի դքսուհու հետևյալ արտահայտությունը. «Վաղուց արդեն թենիս չեմ խաղում, և վախենում եմ այլևս չվերադառնալ այդ զբաղմունքին, թեպետ երբեմն ռակետ բռնելու անզուսպ ցանկություն է առաջանում»:

Այդ խոսքերը նա արտասանել է Ուիմբլդոնի նախկին չեմպիոններին ողջունելու ժամանակ ունեցած առանձնազրույցում: Անվանի մարզիկները BBC-ի փորձագետներն են այս մրցաշարում: Անհայտ պատճառներով դքսուհու մոտենալուց հետո նրանց խոսափողները չեն անջատվել: Ի դեպ, արքայական ընտանիքի անդամի խոստովանությունն այնպիսի անակնկալի է բերել աշխարհի նախկին ուժեղագույն թենիսիստ, ամերիկացի Ջոն Մաքինրոյին, որ նա շտապել է հավաստիացնել դքսուհուն, թե նա ամենևին էլ ծեր չէ թենիս խաղալու համար: Դա միայն ավելի զավեշտալի է դարձրել խոսակցությունը:

Արքայազն Չարլզի և նրա կնոջ՝ Կամիլայի նստավայրում միջադեպը չեն կարևորել՝ նշելով, որ կատարվածը լուրջ խնդիր չէ: Իսկ BBC-ում, որն Ուիմբլդոնի հեռարձակման պաշտոնական գործընկերն է 1937 թվականից, հրաժարվել են մեկնաբանություններից:

Թենիսի համաանգլիական ակումբի տարածքում գործող վարքագծի խիստ կանոններին պարտավոր են ենթարկվել ոչ միայն մարզիկները, լրագրողները և սպասարկող անձնակազմը, այլև բարձրաստիճան հյուրերը: