Փաստ ինֆո

Սլովակիայում անցկացված Եվրոպայի երրորդ խմբի առաջնությունում թեթև ատլետիկայի Հայաստանի հավաքականը 15 երկրների ընդհանուր հաշվարկում գրավեց 9-րդ տեղը: Դա երկու աստիճանով ցածր է նախանցած տարվա արդյունքից:

Մեր երկրի 23 մարզիկ-մարզուհուց միայն չորսին հաջողվեց հայտնվել առանձին մրցաձևերի առաջին եռյակում. Ամալյա Շառոյանը (400 մ արգելավազք, 1 րոպե 00,5 վրկ), Վարդան Փահլեւանյանը (հեռացատկ, 774 սմ), Լևոն Աղասյանը (եռացատկ, 15 մ 67 սմ) գրավեցին 2-րդ տեղը, իսկ Աշոտ Հայրապետյանը 8 ր 53,14 վրկ արդյունքով երրորդն էր 1500 մ վազքում: ՀՀ հավաքականին առավել շատ միավորներ բերեցին 4 մրցաձևի մասնակցած Ամալյա Շառոյանը (45 նիշ), ինչպես նաև Դիանա Խուբեսերյանը (41), Սաթենիկ Հովհաննիսյանը (32), Աշոտ Հայրապետյանը (30) և Արամ Դավթյանը (24): Ծրագրում ընդգրկված էր ատլետիկական 40 մրցաձև, որոնցից տղամարդկանց և կանանց ձողացատկի ու կանանց խոչընդոտավազքի մրցումներին մեր մարզիկները  չմասնակցեցին, քանզի Հայաստանում այդ ձևերը տարածված չեն: Ցավոք, զրոյական ցուցանիշ ունեցանք նաև տղամարդկանց 100 մետր եւ 4x100 մ փոխանցումավազքում:

Մրցաշարին մասնակցեցին նաև տանտերերի, Լատվիայի, Լյուքսեմբուրգի, Մոլդովայի, Ադրբեջանի, Վրաստանի, Իսլանդիայի, Բոսնիայի, Անդորայի, Մակեդոնիայի, Չեռնոգորիայի, Մալթայի, Ալբանիայի թիմերը, ինչպես նաև, այսպես կոչված՝ փոքր երկրների հավաքականը:

Ամփոփելով մասնակցության արդյունքները Հայաստանի ազգային հավաքականի գլխավոր մարզիչ Միշա Հայրապետյանը մասնավորապես նշեց. «Հայաստանի և մասնակից մյուս 14 երկրների պայմանների միջեւ սար ու ձորի տարբերություն է: Ընդամենը 452 հազար բնակիչ ու 316 քկմ տարածք ունեցող Մալթայում միջազգային բարձրագույն չափանիշներին համապատասխանող աթլետիկական հինգ մարզադաշտ կա: Մենք կարողանում ենք մրցումներ անցկացնել միայն Արտաշատում, որի մարզադաշտի պայմանները, մեղմ ասած, չեն բավարարում ամենահամեստ պահանջներին: Պարզապես յոլա ենք գնում: Հուսադրող է թերեւս այն, որ մեր ֆեդերացիայի նախագահ Ռոբերտ Էմմյանը անցյալ տարի հանդիպելով երկրի ղեկավար Սերժ Սարգսյանին՝ ստացել է «Հրազդան» մարզադաշտում ժամանակակից վազքուղիներ տեղադրելու և մրցումային այլ հատվածներ պատրաստելու հարցում աջակցության հավաստիքը:  500 հազար եվրո է անհրաժեշտ, որից 160 հազարը պատրաստ է տրամադրել, եթե չեմ սխալվում, եվրոպական ֆեդերացիան: Հաշվի առնելով, որ երաշխիքը երկրի ղեկավարի մակարդակով է, հուսով ենք և հավատում ենք, որ խնդիրը կլուծվի: Ճիշտ է, երբեմն հաշված մարզիկների համար հաջողվում է արտագնա ուսումնամարզական հավաք կազմակերպել, սակայն դա խնդրի հիմնավոր լուծում չէ: Եթե ցանկանում ենք զարգացած թեթև ատլետիկա  ունենալ՝ նախևառաջ պետք է սկսենք պայմաններից…»: