Փաստ ինֆո

Հուլիսի 1-ից կառավարությունը որոշեց բարձրացնել նվազագույն աշխատավարձը:

Պաշտոնական տվյալներով այս բարձրացումն ազդելու է 160 000 աշխատողների վրա:

Իսկ 45 000 դրամից ավելի աշխատավարձ ստացողների մասին կառավարությունը խոստացավ հոգալ հաջորդ տարվա հունվարից:

Բայց պարզվում է՝ գործադիրում պարզել են, որ նվազագույն աշխատավարձ ստացողներից բացի կան էլի մի շարք աշխատողներ, ում աշխատավարձի չափը ենթակա է կարգավորման՝ նվազագույն աշխատավարձի չափից կախված:

Դրանք են հանրապետական գործադիր մարմիններում հայեցողական պաշտոններ զբաղեցնող, մարզպետարանների աշխատակազմերում քաղաքացիական աշխատանք կատարող, դատական դեպարտամենտում տեխնիկական սպասարկում իրականացնող աշխատողները: Նրանց պաշտոնային դրույքափերի նվազագույն շեմը հանդիսանում է նվազագույն աշխատավարձի չափը:

Նվազագույն աշխատավարձի հիման վրա են կառուցված նաեւ ոստիկանությունում տեխնիկական սպասարկում իրականացնող և կոչում չունեցող անձանց, փրկարարական ծառայության ծառայողի, պաշտպանության նախարարության, ազգային անվտանգության ծառայության և ոստիկանության սպայական, ենթասպայական և կրտսեր հրամանատարական կազմի ներկայացուցիչների պաշտոնային դրույքաչափերը:

Ընդ որում, նրանց աշխատավարձերի՝ նվազագույն աշխատավարձի հետ հարաբերակցությունն ամրագրված է իրավական փաստաթղթերով:

Եվ սա դեռ ամբողջը չէ, նվազագույն աշխատավարձին պետք է համաձայնեցվեն նաեւ զինծառայողների դրամական բավարարման, սննդի փոխհատուցման, ինչպես նաեւ նշված խմբերին հատկացվող դրամական օգնությունների չափերը:

Բացի այդ, զինվորականների եւ նրանց հավասարեցված անձանց կենսաթոշակի չափերը եւս ենթական են վերահաշվարկման, «եթե փոխվել է զինծառայողների դրամական բավարարման կամ սննդի փոխհատուցման գումարի չափը»: Եվ սա էլ իր հերթին հաշվարկվու է հիմք ընդունելով նվազագույն աշխատավարձի չափը:

Բայց, ինչպես գրված է կառավարության վաղվա նիստի օրակարգում ընդգրկված համապատասխան որոշման նախագծում, «հաշվի առնելով այն հանգամանքը, որ առկա ֆինանսական սահմանափակումների շրջանակներում նախատեսվում է բարձրացնել միայն զինծառայողների պաշտոնային դրույքաչափերը», մնացած բոլորի դեպքում կառավարությունը ստիպված է փոփոխություններ կատարել իր նախկինում կայացրած որոշումների մեջ:

Այսպիսով, ստացվում է, որ կառավարությունը նախ հայտարարեց նվազագույն աշխատավարձը բարձրացնելու մասին, հետո նոր սկսեց մտածել դրա իրավական եւ տնտեսական հետեւանքների մասին: Հիմա էլ ստիպված է ինքն իրեն խմբագրել, այլապես երկրի բյուջեյում առկա բոլոր գումարները ստիպված կլինի ուղղել աշխատավարձերի, կենսաթոշակների եւ դրանց հավասարեցված այլ հատկացումները վճարելուն:

Հեղինակ` Նելլի Դանիելյան