Փաստ ինֆո

Գնալով խտանում է Հենրիկ Մխիթարյանին առնչվող իրավիճակի անորոշությունը՝ ավելի խորհրդավոր դարձնելով «Լիվերպուլ» տեղափոխվելու հետ կապված պատմությունը: «Շախտյորի» գլխավոր տնօրեն Սերգեյ Պալկինը շարունակում է պնդել, որ հայ ֆուտբոլիստի հարցով որևէ շփում չի եղել անգլիացիների հետ, իսկ «Mirror.co.uk»-ը խորհուրդ է տալիս չվստահել Հայաստանից ստացվող այն տեղեկություններին, որ կողմերը համաձայնության են եկել գործարքի հարցում:

Ահավասիկ, Պալկինը պատասխանելով Մխիթարյանի ապագայի վերաբերյալ «Спорт День за Днем» գործակալության հարցին, մասնավորապես նշել է. «Որոշակի է միայն այն, որ նա չի ներկայացել «Շախտյորի» հավաքին, թեպետ պարտավոր էր դա անել: Պատճառը չգիտենք: Եթե Մխիթարյանը առաջիկայում չմիանա թիմին, ստիպված կլինենք տուգանել նրան: Նա որևէ շփում չունի «Լիվերպուլի» հետ: Վստահ եմ, որ բանակցությունների մասին բոլոր հաղորդագրություններն ընդամենը ասեկոսե են: «Շախտյորը» Մխիթարյանի հարցով առաջարկ չի ստացել «Լիվերպուլից»: Իսկ ֆուտբոլիստի վարքագծի վերաբերյալ նույնիսկ ենթադրություններ չունեմ: Պատասխանը փորձեք նրանից ստանալ: Հստակ գիտեմ միայն, որ խաղընկերների և մարզիչների հետ ընդհարումներ չի ունեցել, իսկ «Շախտյորից» հեռանալու ցանկության մասին չի արտահայտվել»:

Իսկ «Mirror.co.uk»-ը գրում է. «Մի կարծեք, թե ճիշտ են Հայաստանից ստացվող այն տեղեկությունները, որ «Լիվերպուլը» և «Շախտյորը» 20 մլն ֆունտով համաձայնեցրել են գործարքը: Նրա տրանսֆերային իրավունքների հարցում վերստին խառնաշփոթ է՝ կապված դրանք տնօրինող երրորդ կողմի հետ»: