Փաստ ինֆո

Ազգային ժողովի Էթիկայի հարցերով ժամանակավոր հանձնաժողովն այս պահին քննության փուլում որևէ դիմում չունի: Այս մասին հանձնաժողովի նախօրեի նիստի ավարտից հետո տեղեկացրեց հանձնաժողովի նախագահ Դավիթ Հարությունյանը:

Ըստ նրա՝ խնդիրն ամենևին դիմումների քանակը չէ, և ոչ էլ այն, թե քանի դիմում է մերժվել կամ քանիսը՝ բավարարվել: «Մի կողմից նաև կարող է որոշ մարդկանց մոտ դժգոհություն լինել, թե ինչու ենք մենք ստանում դիմումներ, որոնք անհիմն են: Ես դրան շատ հանգիստ եմ վերաբերվում, որովհետև հանձնաժողովը կայացման փուլում է, և ես կարծում եմ, որ հանձնաժողովի որոշումներն առ այս պահը, բացի մեկ որոշումից, փաստացի ընդունվել են կոնսենսուսով, ինչը խոսում է այն մասին, որ հանձնաժողովն իրականում կատարում է իր առաքելությունը»,-ընդգծեց Դ.Հարությունյանը:

Ինչ վերաբերում է «Հայ ազգային կոնգրես» խմբակցության ներկայացուցիչ, հանձնաժողովի փոխնախագահ Լյուդմիլա Սարգսյանի հանձնաժողովի նիստերին չմասնակցելուն, ապա. «Իրականում դա իրենց պարտականությունն է մասնակցել նիստերին, սակայն հասկանում եմ դա որպես քաղաքական քայլ, և եթե ավելի լուրջ քաղաքական քայլեր չկան, ապա նման քայլերն արդարացված են»: Ի պատասխան «Փաստինֆո»-ի հարցի՝ Դ.Հարությունյանը հայտնեց, որ ՀԱԿ-ի ներկայացուցիչը հանձնաժողովին երբևէ և որևէ կերպ չի տեղեկացրել իր չմասնակցելու որոշման մասին: