Փաստ ինֆո

Եվրոպայի խորհրդի Խորհրդարանական վեհաժողովի նախագահ Ժան-Կլոդ Մինյոնը հունիսի 20-ին նշվող Փախստականների համաշխարհային օրվա կապակցությամբ նախօրեին հանդես է եկել հայտարարությամբ՝ ուշադրություն հրավիրելով սիրիացի և ամբողջ աշխարհում այլ փախստականների տառապանքների վրա:

«Եվրոպային կոչ եմ անում անհապաղ դրսևորել առավել համերաշխություն, թեթևացնել փախստականների տառապանքները և ցուցաբերել օգնություն»,-մասնավորապես հայտարարել է ԵԽԽՎ նախագահը:

Նա հատուկ ուշադրություն է հրավիրել սիրիացի փախստականների վիճակի վրա. «Սիրիացի փախստականների առանց այն էլ դրամատիկ վիճակն անընդհատ վատթարանում է, նրանց տառապանքները հասնում են աննախադեպ աստիճանի: Երկրից փախել է 1,5 մլն մարդ: Սա իսկական հումանիտար աղետ է:

Չափազանց երկար ժամանակ շարունակվող իրավիճակի կարգավորման շուրջ քաղաքական համաձայնության բացակայության պայմաններում հումանիտար ճգնաժամը փակուղի է մտնում և փախստականներին հասցնում ավելի քան լուրջ և խորը հարվածներ:

Փախստականների որոշ կատեգորիաներն առավել խոցելի են: Այդպիսիք են, օրինակ, կես միլիոնից ավելի երեխաները, ովքեր զրկված են ընտանեկան օջախից, չեն հաճախում դպրոց, հաճախ օտարված են սեփական ընտանիքներից և իրենց լքված են զգում, հակամարտության համար վճարելով ամենաբարձր գինը: Հաճախ նրանք լքում են հարազատ վայրերը իրենց մայրերի, քույրերի կամ տատիկների հետ, ովքեր ինքնին թույլ են, հատկապես այն դեպքերում, երբ հղի են»: