Փաստ ինֆո

Թերթի ուշադրության կենտրոնում է վերջերս լրատվական միջոցներում հրապարակված այն տեղեկությունը, որ ԼՂՀ նախկին զինվորական դատախազ, ԼՂՀ նախագահի նախկին խորհրդական Արմեն Զալինյանը եղել է Վարդան Սեդրակյանի «խորհրդականը»:

«Առաջին լրատվականը» հրապարակել էր, թե Ա.Զալինյանը սերտ կապեր ունի Ռուսաստանի որոշ քաղաքական ուժերի հետ և Սեդրակյանն իր քաղաքական քայլերը կատարելուց առաջ Զալինյանից է ստացել տեղեկություն` հայաստանյան քաղաքական վերնախավի, խնդիրների, երկրում տիրող իրավիճակի, կոնկրետ պաշտոններ զբաղեցնող անձանց դիրքորոշման վերաբերյալ»,- գրում է թերթը:

Ըստ նույն տեղեկությունների` Ա.Զալինյանը ԼՂՀ-ում պաշտոնանկ է արվել կաշառքի, առանձնապես մեծ չափերի գումարներ շորթելու պատճառով:

Թերթի թղթակիցը զրուցել է Ա.Զալինյանի հետ` պարզելու մի շարք հարցեր, այդ թվում` թե ինչ կապ ունի նա Վ.Սեդրակյանի հետ:

Ա.Զալինյանը նշել է, որ Վ.Սեդրակյանը իր բարեկամն է` կնոջ հորեղբոր աղջկա ամուսինը: Իսկ իր և Սեդրակյանի կապի մասին Զալինյանն ասել է. «Բացարձակապես ոչ մի առնչություն: Այդ հարցի վերաբերյալ արդեն պատասխանել է Վ.Սեդրակյանի փաստաբան Սիրունյանը, որ ես ու Սեդրակյանը բարեկամներ ենք, սակայն դա ոչ մի կապ չունի մահափորձի կազմակերպման հետ: Պետք է Ձեզ ասեմ, որ այդ հրապարակված նյութի մեջ գոյություն ունի մեկ ճշմարտություն, որ Վ.Սեդրակյանն իմ բարեկամն է: Ընդամենը դա»:

Իսկ այն հարցին, թե Ա.Զալինյանն ինչպես է բացատրում այն տեղեկությունը, թե Սեդրակյանը խորհրդակցել է իր հետ, Ա.Զալինյանն ասել է. «Մենք բարեկամներ ենք: Իսկ երբ հավաքվում ենք, բնականաբար, քննարկում ենք տարբեր հարցեր, կիսում ենք մեր մտքերը:

Նշեմ, որ լինելով դատախազ` ես քաջ գիտակցում եմ այս հանցագործության վտանգավորությունը պետության համար, այդ իսկ պատճառով ինձ համար բարեկամը կամ հարազատը չի կարող որևէ նշանակություն ունենալ»:

Հոդվածն ամբողջությամբ կարդացեք «Ժողովուրդ» օրաթերթի` 19.06.2013թ. համարում: