Փաստ ինֆո

«Վերահսկիչ պալատի նախագահը դատախազի և դատախազության հետ կապված որևէ հայտարարություն չի արել և որևէ տեղ չի արել: Վերահսկիչ պալատի նախագահը շատ լավ գիտի, որ ցանկացած կառույցի գնահատականը տալիս է այն օղակը, որը նշանակում է այդ կառույցին կամ որը պատասխանատու է այդ կառույցի գործունեության համար», - Ազգային ժողովի արտահերթ նստաշրջանի հունիսի 18-ի նիստում ՝ ՎՊ 2012թ.-ի հաշվետվության քննարկման ավարտին, հայտարարեց ՎՊ նախագահ Իշխան Զաքարյանը:

Ի.Զաքարյանն այս կերպ արձագանքեց Արդարադատության նախարար Հրայր Թովմասյանի դիտարկմանը, թե ՎՊ նախագահը, թեպետ իր հարցազրույցոււմ արդեն իսկ ժխտել է, բայց պետք է հստակեցում մտցնի «Հայ ազգային կոնգրես» խմբակցության անդամ Գագիկ Ջհանգիրյանի նախօրեի հայտարարության հետ կապված: Պատգամավորը, մասնավորապես, ասել էր. «Վերահսկիչ պալատի նախագահը մեր խմբակցության հետ այս հաշվետվությունը քննարկելիս խոստովանեց, որ վերջին երկու տարիներին պալատի ուսումնասիրությունների արդյունքները ՀՀ դատախազություն այլևս չի ուղարկում, որովհետև հիասթափված է այդ մարմնից»:

Ի.Զաքարյանն ընդգծեց, որ այս տարիների ընթացքում ՎՊ-ն դատախազություն է ուղարկել շուրջ 30 գործ, և չկա մի գործ, որի հետ կապված քրեական գործ չհարուցվի: Նշվեց նաև, որ հարուցված քրեական գործերի հետևանքները գրեթե 90 տոկոսով բավարարել են Վերահսկիչ պալատի և դատախազության մասնագետներին, հասարակությանը:

Հարցադրմանը, թե ինչու ՎՊ-ն ավելի հաճախակի և ավելի շատ գործեր չի ուղարկում դատախազություն, ՎՊ նախագահը նշեց, որ ընդունում է և կարծում, որ «Վերահսկիչ պալատը այս սխալը կշտի և կուղղի»: Միևնույն ժամանակ ՎՊ նախագահը նկատեց, որ նման հարցերն ինքը միանձնյա չի որոշում, այլ դա անում է ՎՊ-ի խորհուրդ, որը կոլեգիալ մարմին է:

Ի.Զաքարյանի կարծիքով՝ հաշվի առնելով այն հանգամանքը, որ 2013թ.-ի ծրագրերը գրեթե 90 տոկոսով շարունակական են, ՎՊ-ն այդ բացը կշտկի և անպայման այն գործերը, որտեղ կտեսնի քրեաիրավական բնույթի խախտումներ, կուղարկի Գլխավոր դատախազություն: