Փաստ ինֆո

Ռուսաստանյան «Գազպրոմ» ընկերության պաշտոնական կայքը տեղեկատվություն է հրապարակել ընկերության վարչության նախագահ Ալեքսեյ Միլլերի եւ Հայաստանի էներգետիկայի եւ բնական պաշարների նախագահ Արմեն Մովսիսյանի աշխատանքային հանդիպման մասին, հայտնելով, որ դրա ընթացքում քննարկվել են Հայաստանի սպառողներին մատակարարվող ռուսական գազի գնագոյացման հետ կապված հարցեր:

Պաշտոնական հաղորդագրությունը նաեւ հայտնում է, որ հանդիպման ընթացքում խոսվել է նաեւ «Գազպրոմի» մասնաբաժինը «ՀայՌուսգազարդ» ընկերությունում 100%-ի հասցնելու հնարավորության մասին:

Հիշեցնենք, որ այժմ «Գազպրոմը» տիրապետում է «ՀայՌուսգազարդի» 80 տոկոսին, մնացած 20 տոկոսը ՀՀ կառավարության սեփականությունն է:

Ռուսական կողմի տարածած այս տեղեկատվությունը հայաստանյան պատասխանատուներն առայժմ ոչ հերքում են, ոչ էլ հաստատում:

Ու թեեւ «Գազպրոմ»-ի նման բիզնես ծրագրերը թերեւս զարմանալի չեն, բայց զարմանալի է դրանց վերաբերյալ հայկական կողմի պահպանած գաղտնիությունը:

Հիշեցնենք. գազի նոր սակագնի հաստատման օրը, պատասխանելով լրագրողների հարցերին, ՀԾԿՀ նախագահ Ռոբերտ Նազարյանը հայտնել էր, որ գազի նոր գինը հայ սպառողների համար սոբսիդավորվելու է Ռուսաստանի կողմից, թե ինչ միջոցներով, չէր հստակեցրել, հայտնելով, թե բանակցություններն ընթացքի մեջ են:

Եվ ահա, ռուսական կողմից արված հայտարարությունը, փաստորեն, բացահայտեց, գազի սուբսիդավորման իրական գինը:

Ռուսական ընկերությանը հանձնելով «ՀայՌուսգազարդ»-ի 20 տոկոս մասնաբաժինը, Հայաստանի կառավարությունը, ըստ էության, կզրկվի այդ ոլորտում ունեցած իր թեեւ չնչին, բայցեւայնպես’ գոնե ինչ-որ չափով մասնակցությունից:

Պարզվում է, որ գազի գինը հայ սպառողների համար 30 տոկսով նվազեցնելու դիմաց ռուսական կողմը բավական մեծ գին է պահանջել Հայաստանից:

Դեռ պաշտոնապես հայտնի չէ, թե ինչ պատասխան է տվել Արմեն Մովսիսյանը ռուսական այս առաջարկին, բայց ենթադրելի է, որ սուբսիդավորման դիմաց արված առաջարկին չհամաձայնելու այլընտրանք մեր կառավարությունը թերեւս չունի:

Հեղինակ` Նելլի Դանիելյան