Փաստ ինֆո

Վերահսկիչ պալատի 2012թ.-ի հաշվետվության մեջ նշված շինարարության ոլորտում ծրագրերի մի մեծ մասն իրականացվում է վարկային պայմանագրերով ներգրավված միջոցներով, եւ դրանց կատարման նկատմամբ եռակի վերահսկողության մեխանիզմ է գործում` Կառավարության, Վերահսկիչ պալատի եւ ֆինանսավորող միջազգային կազմակերպության կողմից: Այս մասին Ազգային ժողովի հունիսի 17-ի արտահերթ նստաշրջանում ներկայացնելով կառավարության դիրքորոշումը` նշեց ՀՀ տարածքային կառավարման նախարար, փոխվարչապետ Արմեն Գեւորգյանը` հավելելով, որ այս ծրագրերի դեպքում ընթացակարգերը կանոնակարգվում են այդ կազմակերպությունների հետ կնքված համապատասխան փաստաթղթերով:

«Կարծում ենք նաեւ, որ ծրագրերի գնահատման չափանիշների առումով մեթոդաբանական հստակեցումների անհրաժեշտություն կա: Թերեւս պետք է գնահատել ծրագրի ռիսկայնությունը, այսինքն` արդյոք նկատված թերությունները կարող են ռիսկային լինել ընդհանուր ծրագրի իրականացման տեսանկյունից, թե ոչ: Երաշխիքային ժամկետում արձանագրված թերությունները կամ մեծ ծավալի մեջ փոքր տոկոս կազմող խախտումներն ընդհանուր ծրագիրը չեն կարող ռիսկային դարձնել»,-ընդգծեց ՀՀ փոխվարչապետը:

Ըստ նրա` վերլուծությունները ցույց են տալիս, որ կատարվող կոնկրետ շինարարական ծրագրերը կամ միջոցառումները, «ըստ էության, ծառայում են ի սկզբանե նախանշված նպատակներին, ապահովում են համապատասխան իրավական ակտերով եւ պայմանագրերով սահմանված արդյունքներ»:

Միեւնույն ժամանակ նա նկատեց, որ, այո, կան առանձին ծրագրեր, որոնց իրականացման ընթացքում գործադիրն ինքն է բացահայտել խնդիրներ` կապված ծրագրերի բովանդակության ու իրականացման ընթացքի հետ: Ա.Գեւորգյանը, մասնավորապես, մատնանշեց Գյումրիի տեխնոպարկի եւ «Աջակցություն ՓՄՁ սուբյեկտներին» ծրագրերը:

Ա.Գեւորգյանը տեղեկացրեց, որ գործող գներով շինարարական աշխատանքների արժեքի հաշվարկման կարգում փոփոխություններ կատարելու նպատակով Քաղաքաշինության նախարարության կողմից իրականացվում են քննարկումներ` Վերահսկիչ պալատի, Ֆինանսների նախարարության, Երեւանի ճարտարապետության եւ շինարարության պետական համալսարանի, շինարարների միության եւ այլ շահագրգիռ մարմինների հետ: «Համոզված ենք, որ առկա խնդիրների համար արդյունավետ լուծումներ կգտնվեն»,-նշեց նա:

Փոխվարչապետը տեղեկացրեց նաև, որ կառավարությունը եւս ծրագրերի նկատմամբ վերահսկողության ուղղությամբ աշխատանքներ է իրականացրել: Գործադիրի կազմում գործող տասնվեց ստուգում իրականացնող մարմինների կողմից 2012թ. ընթացքում իրականացվել է 15 178 ստուգում:

ՀՀ ֆինանսների նախարարության Ֆինանսական վերահսկողության տեսչության կողմից 2012թ-ին 72 ստուգում եւ 23 ուսումնասիրություն է իրականացվել եւ ամփոփվել: Արդյունքում, 2008-2012թթ. արձանագրված գումարներից վերականգնվել է 672մլն 391,4 հազար դրամ եւ վերաձեւակերպվել 450 մլն 177 հազ. դրամ` ընդհանուր առմամբ 1 մլրդ 122,5 մլն դրամ:

Ա.Գեւորգյանը վստահեցրեց, որ պետական տեսչական բոլոր մարմինների աշխատանքների առավել արդյունավետ կազմակերպման, ռիսկերի գնահատման վրա հիմնված նոր մեթոդաբանությամբ վերահսկողություն իրականացնելուն ուղղված բարեփոխումները կառավարության օրակարգում են: