Փաստ ինֆո

Կիրակի օրը ելույթ ունենալով «Fox News»-ի եթերում, ԱՄՆ-ի նախկին փոխնախագահ Դիկ Չեյնին չի բացառել այն հանգամանքը, որ քանի որ Սնոուդենը նախընտրել է թաքնվել Հոնկոնգում, ուրեմն, չի բացառվում, որ նա չինական լրտես է եղել: «Ես կասկածանքով եմ մոտենում այդպիսի տվյալներին, քանի որ նա ուղևորվել է Չինաստան: Դա այն տեղը չէ, որտեղ մարդ սովորաբար ցանկանում է գնալ, եթե պայքարում է ազատության համար: Հավանաբար Չինաստանը պատրաստ կլինի նրան ապաստան տրամադրել այն բանի դիմաց, ինչը որ նա գիտի, կամ չգիտի»,- նշել է Չեյնին:

Իսկ չինական ԶԼՄ-ներն այսօր գրում են, որ Կենտրոնական հետախուզական վարչության նախկին աշխատակցի արտահանձնումը կնշանակեր, որ թե Հոնկոնգը և թե Չինաստանը կկորցնեն իրենց դեմքը: «Եթե Սնոուդենը արտահանձնվի ԱՄՆ-ին, դա կնշանակի, որ Հոնկոնգի վարչական ապարատը և Չինաստանի կենտրոնական կառավարությունը կկորցնեն իրենց դեմքերը: Ի տարբերություն սովորական հանցագործների, Սնոուդենը որևէ մեկին ֆիզիկական վնաս չի հասցրել: Նրա հանցանքը կայանում է այն բանում, որ նա ի ցույց է դրել ամերիկյան կառավարության կողմից մարդու իրավունքների խախտումները»,- գրել է «Global Times» թերթը:

Թերթը նշել է, որ Սնոուդենը վստահ է Հոնկոնգում ժողովրդավարության և ազատության գոյության վրա: Այդ իսկ պատճառով արտահանձնումը «կդառնա ոչ միայն Սնոուդենի հավատի նկատմամբ դավաճանություն, այլև այն կհիասթափեցնի այն բազմաթիվ ձայներին, որոնք այսօր հնչում են ամբողջ աշխարհում»:

«Պեկինը պետք է կայունություն ցուցաբերի և զիջումների չգնա գոնե նաև այն պատճառով, որ Վաշինգտոնը փորձում է ճնշումներ գործադրել: Սնոուդենի արտահանձնման հետևանքները շատ ավելի կործանարար կլինեն, քան այլընտրանքային տարբերակը, քանի որ տեղացի բնակչության արձագանքը կարող է հիմնախնդրի վերածվել ինչպես Հոնկոնգի, այնպես էլ մայրցամաքային Չինաստանի համար», նշել է պարբերականը:

Հիշեցնենք, որ Կենտրոնական հետախուզական վարչության նախկին աշխատակից Էդվարդ Սնոուդենը լրատվամիջոցներին հայտնել էր, որ ԱՄՆ հատուկ ծառայությունները մուտք ունեն դեպի այն սերվերներ, որոնք տնօրինվում են աշխարհի խոշորագույն համացանցային ընկերությունների կողմից:

Բացի այդ նա հաղորդել է, որ «Verizon» հեռակապային ընկերության օգտատերերի միլիոնավոր հեռախոսային խոսակցությունները գաղտնալսվում են, որը ըստ Սնոուդենի մարդու մասնավոր կյանքի նկատմամբ միջամտություն է:

Էդվարդ Սնոուդենը մայիսի 20-ին ժամանել էր Հոնկոնգ:

Ավելացնենք նաև, որ ավելի վաղ, իր հերթին, ՌԴ ԱԳ նախարար Սերգեյ Լավրովը հայտարարել է, որ ԱՄՆ-ից փախած Կենտրոնական հետախուզական վարչության (ԿՀՎ) աշխատակից Էդվարդ Սնոուդենին քաղաքական ապաստան հատկացնելու հարցը Մոսկվան պատրաստ է քննարկել, եթե նման բովանդակությամբ խնդրագիր ստացվի: Իսկ ի հավելումն ՌԴ արտաքին գործերի գերատեսչության ղեկավարի այս հայտարարության ՌԴ նախագահի մամլո քարտուղար Դմիտրի Պեսկովը հայտարարել էր, որ, եթե Սնոուդենից ստացվի քաղաքական ապաստան ստանալու դիմում, ապա այն կքննարկվի: