Փաստ ինֆո

«Արմավիա» ընկերության թռիչքային անձնակազմի անդամները այդպես էլ չեն ստացել դեռեւս ուրբաթ օրը իրենց ղեկավարության խոստացած աշխատավարձերը:

Մեր զրուցակից օդաչու Տիգրան Ասլանյանը նշեց, որ ընկերությունն իրեն աշխատավարձ է պարտք անցած տարվա օգոստոս ամսվանից սկսած: Իսկ վերջին անգամ, 2012թ-ի հուլիս ամսվա աշխատավարձը օդաչուն ստացել է դեկտեմբերին:

«Թռիչքային անձնակազմը, որ մի 80 հոգի էին, դրանցից մի 50 հոգուն երեւի պարտք են, նույնիսկ այն աշխատողները, ովքեր 1-1,5 տարի առաջ թողել-գնացել են «Արմավիա»-ից, նրանց էլ են պարտք մնացել»,- տեղեկացրեց Տիգրան Ասլանյանը:

Հիշեցնենք. Ընկերության աշխատակիցները պարբերաբար հավաքվում են Միխայիլ Բաղդասարովին պատկանող «Միկա Լիմիթեդ»-ի գրասենյակի մոտ՝ պահանջելով իրենց չվճարված աշխատավարձերը:

Վերջին այսպիսի հավաքի ժամանակ, հունիսի 14-ին, ընկերության տնօրեն Նորայր Բելույանը լրագրողներին հայտարարել էր, թե աշխատավարձերն աստիճանաբար մարվում են: «Ամեն օր աշխատավարձ տրվում է, մի օր քիչ, մի օր շատ, բայց բոլորին հերթականությամբ աշխատավարձերը տրվում են», - վստահեցրել էր տնօրենը:

Օդաչուն, ով իր ղեկավարի այս խոսքերին ծանոթացել էր մամուլից, այդ հավաստիացումները «սուտ» որակեց: Նրա ենթադրությամբ, վճարվում են միայն ցածր աշխատավարձ ստացող «վերգետնյա» գրասենյակային աշխատողները: «Ոչ օդաչուները, ոչ ինժեներները, ոչ ուղեկցորդները դեռ չեն վճարվել»,- տեղեկացրեց Տիգրան Ասլանյանը հավելելով. «Օդաչուներին միլիոններ են պարտք»:

Մեր զրուցակիցը հայտնեց, որ մտադիր են շարունակել պայքարը եւ վաղը դարձյալ կհավաքվեն «Արմավիայի» սեփականատիրոջ գրասենյակի մոտ:

Հիշեցնենք. Ուրբաթ օրը, «Արմավիա»-ի տնօրեն Նորայր Բելույանը լրագրողներին հայտնել էր, որ «Ավիա-Սերվիս» ընկերությունն արդեն փոխանցել է «Արմավիա»-ին ունեցած պարտքը, եւ հենց այդ գոմարներից էլ ընկերությունը պետք է վճարի իր աշխատակիցներին պարտք մնացած աշխատավարձերը:

Իսկ մինչ այդ Գագիկ Ծառուկյանի մամուլի խոսնակ Իվետա Տոնոյանը «Փաստինֆո»-ին ասել էր, որ «Ավիա-Սերվիս»-ը «Արմավիա»-ին որեւէ պարտք չունի:

Նշենք, որ «Ավիա-Սերվիս» ընկերությունը, որ զբաղվում է ավիաուղևորների համար սննդի պատրաստմամբ ու մատակարարմամբ, պատկանում է «Մուլտի գրուպ» կոնցեռնին:

Հեղինակ` Նելլի Դանիելյան