Փաստ ինֆո

Եվրամիության գոյության ողջ պատմության ընթացքում առաջին անգամ անդամ երկրներից մեկը՝ Հունաստանը, զրկվել է զարգացած երկրի կարգավիճակից և այսուհետ կհամարվի զարգացող երկիր:

Բանն այն է, որ միջազգային վերլուծական «Morgan Stanley Capital International» ընկերությունը այսօր «MSCI Greece» ինդեքսը տեղափոխել է զարգացող երկրների (MSCI Emerging Markets) ինդեքսների խումբ:

«MSCI»-ն Հունաստանի, որպես զարգացած տնտեսություն ունեցող երկրի վերաբերյալ որոշումն ընդունել է 2001թ.-ին: Սակայն 2012թ.-ին անցկացված վերստուգումների արդյունքում ընկերությունը հաղորդել է, որ որոշ չափանիշներով երկիրն արդեն չի համապատասխանում այդ կարգավիճակին: Մասնավորապես «հիմնադրամների վարկավորման հնարավորության և կարճ վաճառքի գործառույթների երկարատև բացակայության պատճառով հունական ֆոնդային շուկան այլևս չի համապատասխանում մյուս զարգացած ֆոնդային շուկաներին»,- նշված է «MSCI»-ի հաղորդագրության մեջ:

Վերջին 6 տարում Աթենքի ֆոնդային ինդեքսը ընկել է 83 տոկոսով: Երկիրը բախվել է տնտեսական ծանր իրավիճակի, որի հետևանքով ստիպված է եղել դրամական օգնություն խնդրել միջազգային վարկատու կազմակերպություններից: Այդպիսի օգնություն նրան ցուցաբերվում է, սակայն դրանք վարկային տրանշներ են և պետական հատվածը ավելի «»սեղմելու» հանձնարարականներ: Իսկ Հունաստանի ճյուղային ոլորտների զարգացման և տրանզիտային հնարավորությունների բնագավառում իրական ներդրումներից նրա հիմնական գործընկերները ձգտում են ձեռնպահ մնալ:

Այս իրավիճակում, թերևս, դա այն գլխավոր պատճառներից մեկն է, որը դրդում է հունական կողմին վերջին ժամանակներում առավել ակտիվ հանդես գալ Ռուսաստանի, Չինաստանի և եվրագոտուց դուրս գտնվող եվրոպական երկրների հետ տնտեսական կապերն ակտիվացնելու օգտին:

Հաղորդագրության մեջ նշվում է, որ Հունաստանի տնտեսության մեջ այսօր տիրող իրավիճակը շատ մասնագետներ համեմատում են 1940-ական և 1950-ական թվականների քաղաքացիական պատերազմին հաջորդած իրավիճակի հետ, որը հաղթահարվեց արդյունաբերական ենթակառուցվածքներում ԱՄՆ-ի և Արևմտյան Եվրոպայի երկրների ներդրումների և Հունաստանի արտաքին ակտիվ քաղաքականության շնորհիվ:

Ըստ որոշ փորձագետների արդեն ավելի քան 5 տարի խոր ճգնաժամի մեջ գտնվող հունական տնտեսության մեջ կատարվում են հիվանդագին և երկարատև ժամանակաշրջան ենթադրող գործընթացներ, որոնք ուղեկցվում են միջոցներ ծախսելու նկատմամբ կոշտ տնտեսման ռեժիմով:

Իսկ որոշ փորձագետներ էլ այն կարծիքն են արտահայտել, որ Հունաստանում տիրող իրավիճակը եվրագոտում տիրող իրավիճակի մի բաղադրիչն է: Եվ ըստ այդ մոտեցման էլ, Եվրոպական կենտրոնական բանկի ղեկավար Մարիո Դրագիի կանխատեսումներով, իրավիճակը եվրագոտում կարող է հանգեցնել համախառն ներքին արդյունքի ցածր ցուցանիշների և, միաժամանակ, գնաճի սպասվող մակարդակի գերազանցման: