Փաստ ինֆո

ՀՀ վերաքննիչ քրեական դատարանի վարույթում է Արման Հովսեփյանի և Շահեն Չանդոյանի գործով բերված բողոքների քննությունը:

Ըստ դատավճռի` Գեղարքունիքի մարզի Գանձակ գյուղի բնակիչ Շ.Չանդոյանը, ով դեպքի օրը ընկերների հետ խնջույքի է եղել, մորաքրոջ տղայի` Վիգեն Սահակյանի հետ տուն գնալու ճանապարհին ցանկացել է ծխախոտ և էլի ինչ-որ «բան-ման» գնել, իսկ Գավառի խանութներից այդ ժամին աշխատել է միայն «Միշայի խանութը»:

Խանութում այդ ժամին աշխատելիս է եղել խանութի տիրոջ որդին` Արման Հովսեփյանը: Ըստ դատական ակտի` Շահենն արհամարհական տոնով հարցրել է, թե որտեղ է խանութի տերը, քանի որ ինքը նիսիայով է ապրանք վերցնելու: Բանակցելուց հետո Արմանը տվել է Շահենի նախընտրած սիգարետը և պարտքացուցակում ցանկացել է գրանցել վերջինիս պարտքը` վերցրած սիգարետի համար, ինչը դուր չի եկել Շահենին: Սկսվել է քաշքշուկ:

Բարձրացած աղմուկի պատճառով խանութ է մտել դրսում` մեքենայում սպասող Շահենի մորաքրոջ տղան` Վիգենը: Կարճ ասած` սկսվել է վիճաբանություն, որի ժամանակ էլ Վիգենը հայհոյել է Արմանին, «Պեպսիի» շշով հարվածել նրան:

Վիճաբանությանը խառնվել է Արմանի մայրը, ում նկատմամբ Վիգենը և Շահենն անհարգալից վերաբերմունք են դրսևորել: Սակայն Արմանը չի հանդուրժել մոր նկատմամբ նման վերաբերմունքը և մոտենալով ցուցափեղկին` վերցրել է այնտեղ դրված դանակն ու հարվածել իր առջև կանգնած Շահեն Չանդոյանի որովայնին, ով փորձել է Արմանի` խանութից դուրս գալը կանխել: Շահենին հարվածելուց հետո Արմանը դանակի 5 մահացու հարված է հասցրել նաև Վիգեն Սահակյանին, ով ստացած վնասվածքներից մահացել է:

Գեղարքունիքի մարզի ընդհանուր իրավասության առաջին ատյանի դատարանը Ա.Հովսեփյանին մեղավոր էր ճանաչել` ՀՀ քրեական օրենսգրքի 105-րդ հոդվածի 1-ին մասով և դատապարտել ազատազրկման` 3 տարի ժամկետով, իսկ Շ.Չանդոյանին` 113-րդ հոդվածի 2-րդ մասի 3-րդ և 6-րդ կետերով և դատապարտել ազատազրկման` 2 տարի ժամկետով:

Դատավճռի դեմ վերաքննիչ բողոքներ են բերել պաշտպանական և մեղադրող կողմերը: Պաշտպանն ակնկալում է պատժի մեղմացում, իսկ մեղադրողը` պատիժների խստացում` երկու ամբաստանյալների համար էլ պահանջելով ազատազրկում` 4 տարի ժամկետով:

Հոդվածն ամբողջությամբ կարդացեք «Ժամանակ» օրաթերթի` 13.06.2013թ. համարում: