Փաստ ինֆո

«Ես ինքս չեմ գրանցել որևիցե օֆշորային գոտում ձեռնարկություն և որևիցե մեկին լիազորություն չեմ տվել իմ անունից որևիցե օֆշորային գոտում ձեռնարկություն գրանցել»,- Ազգային ժողովի այսօրվա նիստում հայտարարեց ՀՀ վարչապետ Տիգրան Սարգսյանը՝ անդրադառնալով վերջին օրերին իր անվան հետ կապված տարածվող տեղեկություններին: Նա հավելեց, որ իր անձի վերաբերյալ մեղադրանքներին անդրադառնում է ԱԺ դահլիճում, քանի որ դրանք հնչել են հենց այս դալիճում:

Վարչապետն ընդգծեց, որ վերջին 25 տարիների ընթացքում իր մասնագիտական գործունեությունը տնտեսական, ֆինանսական ոլորտում էր, և փողերի լվացման դեմ պայքարի մեխանիզմները, հայեցակարգը Հայաստանի Հանրապետությունում ներդրվել են իր անմիջական ղեկավարությամբ: «Այս ամենը թույլ է տալիս ենթադրել, որ մի փոքր պատկերացում ունեմ, թե ինչ բան է օֆշորային գոտի, օֆշորային հաշիվներ, փողերի լվացում: Ես հիմա մեղադրվում եմ, որ օֆշորային գոտում իմ անունով ստեղծել եմ ձեռնարկություն, նպատակ ունենալով խլել Հայաստանում ինչ-որ մեկի բիզնեսը կամ կառուցել սխեմա, որով ինձ պետք է հատուցեն: Ֆինանսական համակարգի հետ փոքր ինչ առնչություն ունեցող մարդը կհավաստի, որ սա անհեթեթություն է, որովհետև ավելի անհեթեթ սխեմա մշակել, այն էլ՝ այդ ոլորտի հետ քչից, թե շատից ծանոթ մարդու, ուղղակի, կարծում եմ, բացատրությունների կամ հիմնավորումների կարիք էլ չկա, որ այդպիսի անհեթեթություն իմ մտքով չէր կարող անցնել՝ այդպիսի անհեթեթ սխեմա մշակել»,-նշեց Տ.Սարգսյանը:

Ըստ վարչապետի, «որևիցե մեկի համար դժվարություն չէ այսօր օֆշորային գոտում ստեղծել ձեռնարկություն Նիկոլ Փաշինյանի անունով՝ չունենալով Նիկոլ Փաշինյանի թույլտվությունը դրա համար, և այդպիսի օրինակները բազմազան են»: Տ.Սարգսյանի պարզաբանմամբ, դա օֆշորայաին գոտիների առանձնահատկությունն է:

«Հասկանալի է, որ այս պատմությունն ունի բոլորովին այլ նպատակ: Բոլորն էլ շատ լավ հասկանում են, որ այսպիսի ձևերով փողեր չեն լվանում, այսպիսի ձևերով ինչ-որ տարօրինակ գործարքներ չեն անում, այլ նպատակը շատ պարզ է՝ եթե ուզում ես որևիցե մեկին վարկաբեկել, ապա շատ պարզ ձև է և հնարավորություն»,-ընդգծեց Տ.Սարգսյանը: Նա հավելեց նաև, որ մանրակրկիտ պարզաբանումներ է տվել «Հայկական ժամանակ» օրաթերթի հարցապնդմանը, թե որտեղ է գտնվել 2010թ.-ի մայիսի 6-ին, երբ գրանցվել է այդ ձեռնարկությունը: Վարչապետը, մասնավորապես, հայտնեց, որ այդ օրը պաշտոնական այցով գտնվել է Պրահայում՝ բազմաթիվ լրագրողների ուղեկցությամբ, և չէր կարող օրվա ընթացքում աննկատ մեկնել Կիպրոս՝ ձեռնարկություն գրանցելու համար: