Փաստ ինֆո

ՀՀ նախագահի նախկին թեկնածու, ԱԻՄ նախագահ Պարույր Հայրիկյանն այսօր դատարանում հայտարարեց, որ այս տարվա հունվարի 31-ին ժամը 23-ից հետո ամբաստանյալ Խաչատուր Պողոսյանն է իր վրա կրակել: Ըստ նրա, իրեն ցանկացել են սպանել, սակայն իր բախտը բերել է, և սպանությունն ավարտին չի հասցվել: Նա հավելեց՝ մարդն ապրում կամ մահանում է Տիրոջ կամքով:

Գործով տուժողը հայտնեց, որ մահափորձի օրը մեքենայից դուրս է եկել, մտել շքամուտք, ապա վերադարձել մեքենայի մոտ՝ պայուսակի հետևից, որը վերցնելուց հետո նկատել է մի անձնավորության՝ նա ձեռքը պարզել էր, զենք չէր երևում, «փաթաթած էր ինչ-որ բանով»: Տուժողը հենվել է հարևանի մեքենային, որի հետևանքով մեքենայի կառավարման ազդանշանը միացել է: Արձակված կրակոցից ցավ է զգացել կրծքավանդակում, հետ շպրտվել, երկրորդ կրակոցն արդեն չի կպել նշանակետին:

Առաջին կրակոցից հետո փամփուշտը մնացել էր մարմնի մեջ և վիրահատության անհրաժեշտություն առաջացել: Պ.Հայրիկյանը մոտ մեկ ամիս բուժում է ստացել Եվրոպայում, 7 ժամ տևած վիրահատություն անցել և դեռևս տևական ժամանակ պետք է ապաքինվի:

Պարույր Հայրիկյանն ընդգծեց, որ մահափորձը քաղաքական գործչի դեմ էր և նպատակ ուներ վախեցնել ոչ թե իրեն, այլ մարդկանց: Պ.Հայրիկյանն անդրադարձավ անցյալ դարի 60-ական թվականներից սկիզբ առած իր քաղաքական գործունեությանը, քաղբանտարկյալի իր կենսագրության որոշ հատվածներին: Նա ընդգծեց, որ այս մահափորձն իր նկատմամբ առաջին մահափորձը չէ. 1992թ.-ից հետո իր դեմ մահափորձի վերաբերյալ 3 գործ էր հարուցվել, որոնք առ այսօր չեն բացահայտվել: ՀՀ նախկին նախագահ Ռոբերտ Քոչարյանի կողմից ԱԻՄ գրասենյակը փակելը նույնպես, նրա գնահատմամբ, քաղաքական սպանություն է:

Պ.Հայրիկյանը հայտարարեց, որ ամբաստանյալներին ճանաչում է գործի բերումով և նախագահական ընտրություններից: Իր համար մարդկայնորեն անընդունելի է ՀՀ նախագահի թեկնածու, մահափորձը կազմակերպելու մեջ մեղադրվող Վարդան Սեդրակյանի հայտարարությունն առ այն, որ «իմ մեքենան ավելի թանկ արժե, քան Պարույր Հայրիկյանը»:

Երևանի Կենտրոն և Նորք-Մարաշ վարչական շրջանների դատարանում՝ դատավոր Գագիկ Պողոսյանի նախագահությամբ, Պ.Հայրիկյանի մահափորձի գործով վաղվա դատական նիստում կհետազոտվեն գործի ապացույցները: