Փաստ ինֆո

Թերթի զրուցակիցը Գորիսի նախկին քաղաքապետ Սամվել Հարությունյանն է: Թղթակցին նա ներկայացրել է Սյունիքի նախկին մարզպետ Սուրեն Խաչատրյանի` 90-ականների գործունեությունը: Իր խոսքում Ս.Հարությունյանը մասնավորապես պատմել է. «1990 թվականի հոկտեմբերի 21-ին Սուրիկ Խաչատրյանն իր նմանների հետ խաբեությամբ առևանգում է, ապա Գորիսում գտնվող մի շենքում նաև գազանաբար խոշտանգում է մեր ազատամարտի նվիրյալներից մեկին` այդ ժամանակ ՀՅԴ մարտական ջոկատի հրամանատար Լեռմենտ Սարգսյանին և ինձ: Այդ ոճրագործության համար Գորիսի ներքին գործերի բաժին ենք ներկայացրել համապատասխան հայտարարություններ և բացատրություններ, բայց անցած 22 տարվա ընթացքում այդ ոճրագործությունների համար Սուրիկ Խաչատրյանը չի կրել պատասխանատվություն»:

Նախկին քաղաքապետի խոսքով` 1991թ. գորիսեցիներինն ցնցել է նաև Սուրիկ Խաչատրյանի մեկ այլ արարքը: Նա մասնավորապես հիշում է, թե ինչպես է Սյունիքի նախկին մարզպետը «Սպանելու նպատակով կրակել Օրհնիձոր գյուղի բնակիչ, Գորիսի կուլտուրայի բաժնի ժողգործիքների նվագախմբի երգչուհի, ինչպես գորիսեցիներն էին ասում, Սուրիկ Խաչատրյանի սիրուհի Ա.Մ.-ի վրա»:

Շարունակելով պատմությունը` Ս.Հարությունյանն ասել է, որ պատճառը Գորիսում տարածված այն լուրերն են եղել, որ Ա.Մ.-ն Ս.Խաչատրյանին հայտնել է, որ նրանից հղի է, երեխայի է սպասում:

Կնոջը մահամերձ տեղափոխել են Գորիսի հիվանդանոց, որտեղ մեծ դժվարությամբ է հաջողվել փրկել նրա կյանքը, սակայն դեռևս չծնված երեխան մահացել է:

Բացի այդ, Ս.Հարությունյանը հիշատակել է նաև մեկ այլ դեպքի մասին: Խոսքը 1995թ. Գորիսում Անուշավան Ռուշանյանին հրազենային վնասվածք հասցնելուն է վերաբերում:

Թղթակցի հարցին, թե կրակելու պատճառը որն է եղել, Ս.Հարությունյանը պատասխանել է. «Չգիտեմ` ինչու է կրակել: Նրա համար արյուն թափելը հոբբի է»:

Հոդվածն ամբողջությամբ կարդացեք «Առավոտ» օրաթերթի` 12.06.2013թ. համարում: