Փաստ ինֆո

«Մենք առանց ընդմիջման կշարունակենք ձեռնարկել անհրաժեշտ միջոցներ և ցերեկը, և գիշերը՝ այնքան ժամանակ, քանի դեռ մարգինալացված տարրերը չեն հեռանում, և հրապարակը նորից բաց չէ մարդկանց համար»,- հայտարարել է Ստամբուլի նահանգապետ Ավնի Մութլուն:

Հավատարիմ այդ սկզբունքին, երեկ ամբողջ օրը թուրքական ոստիկանությունը շարունակել է ցուցարարներին Ստամբուլի Թաքսիմ հրապարակից դուրս մղելու կոշտ ճնշումները: Կրկին կիրառության մեջ են դրվել արտասվաբեր գազն և ձեռքի տակ գտնվող այլ միջոցներ:

Վարչապետ Էրդողանը հայտարարել է, որ այլևս մտադիր չէ հանդուրժել բողոքները: Անցյալ գիշեր և այսօր առավոտյան Գեզի այգում հավաքված ցուցարարների և ոստիկանության ընդհարումները շարունակվել են առանց փոխզիջման նշանների:

Խորհրդարանին ուղղված իր ուղերձում, որը ուղիղ հեռարձակվել է թուրքական հեռուստատեսությամբ, Էրդողանը կրկին ընդգծել է, որ իր դիրքորոշումը ցուցարարների նկատմամբ մնում է սահմանային կոշտ դիրքերում: «Նրանք, ովքեր այժմ գտնվում են Թաքսիմում և անկեղծ համոզմունքներով մասնակցում են ցույցերին, ես կոչ եմ անում հեռանալ այդտեղից: Իսկ նրանց, ովքեր ցանկանում են, որ ցնցումները շարունակվեն, ես ասում եմ. «Ամեն ինչ ավարտված է: Այս պահից մեր հանդուրժողականությունը սպառվել է»:

Թուրքիայի վարչապետն ասել է, որ իրենք ոչ միայն վերջ կտան այս ակցիաներին, այլև կսանձեն բոլոր սադրիչներին և ահաբեկիչներին, «ոչ մեկը անպատիժ չի մնա»:

Հիշեցնենք, որ բազմամարդ ցույցերը և ոստիկանության հետ բախումները սկսվեցին գրեթե երկու շաբաթ առաջ:

Զանգվածային բողոքների մասնակիցները հանդես են գալիս Գեզի այգում իշխանությունների կողմից պլանավորված առևտրի և ժամանցի կենտրոնի կառուցման դեմ:

Այս շարժմանը աստիճանաբար միացան այսօրվա թուրքական կառավարությունից դժգոհ ցուցարարների նոր խմբեր:

Թուրքիայի բազմաթիվ քաղաքներ ընդգրկած բողոքների ալիքի մասնակիցները հայտարարում են, որ Էրդողանը և նրա կառավարությունը վերածվում են ավտորիտար ռեժիմի և փորձում են աշխարհիկ հասարակությանը պարտադրել պահպանողական իսլամիստական արժեքներ:

Բողոքի 13 օրերի ընթացքում ցուցարարներից 4 մարդ է զոհվել: Ավելի քան 5 հազար հոգի ստացել են ամենատարբեր մարմնական վնասվածքներ: Իսկ հարյուրավորներն էլ՝ ձերբակալվել են: